Ineeꞌkoꞌ mebuálósi
5
Ee ánáꞌkuꞌ, hangaa-ngaa nupailalu laluitangkuꞌ to bukeꞌ kanótó lalu,nupehádingi mpakaroꞌa paturoꞌ to kupahaweꞌákoꞌ,
2 bona mewaliꞌkoꞌ to bukeꞌ timbá
hai mohuwárákoꞌ oaꞌ laluita to toꞌu.
3 Láwiꞌ polaluitana towawine to masilaka matáni nodo tináháꞌ,
hai maꞌálusuꞌ ntepuꞌu,
4 agáiáná kahópóꞌána mapaiꞌ nodo puru,
hai mataru ntepuꞌu nodo pihoꞌ to momata potimbali.
5 Tauna to mampeuláꞌi peundeꞌána towawine iti,
ina lao i duniáꞌraꞌ tomate.
6 Towawine iti tiꞌara mouláꞌ rárá to menóntó i katueꞌ.
Tiꞌara naisá kameuláꞌna miꞌi i rárá to salaꞌ.
7 Onoꞌ miꞌi haneꞌi deꞌe-deꞌe ánáꞌkuꞌ, nupehádingiaꞌ,
ineeꞌkoꞌ mokáláliꞌá apa to kuhángáꞌámokoꞌ.
8 Nukaraohi towawine iti,
ineeꞌkoꞌ lao i támbina.
9 Ane mombeisákoꞌ hai towawine iti, tiꞌarakoꞌ ina rabiláꞌ,
hai i pare-parena, polámbiꞌámu ina raꞌala tauna to maseke.
10 Kapebukumu ina upu raꞌala tauna,
hai apa to nupowonggoꞌ miꞌi ina raꞌala tauna to tiꞌara nuisá.
11 Kahópóꞌána ina meraruaꞌkoꞌ
ane molámbiꞌkoꞌ hakiꞌ,
12 haneꞌi ina nuꞌuliꞌ, “Moapa riꞌi haneꞌi iatoliu
mokáhihiꞌaꞌ paturoꞌ,
hai tiꞌaraꞌaꞌ mau rakámbáróá?
13 Moapa riꞌi haneꞌi tiꞌaraꞌaꞌ mopailalu laluitana gurungkuꞌ,
ba mampehádingi paturoꞌraꞌ tosaengkuꞌ?
14 Molámbiꞌmoꞌ kapári,
hai raisá miꞌi tauna to handaꞌ.”
15 Onoꞌ miꞌi haneꞌi hangaa-ngaa tetidaꞌkoꞌ i toinámu haduduámu,
ineeꞌ tetakaꞌ lalumu i towawine ntániꞌna.
16 Ineeꞌkoꞌ mampogóeꞌ towawine to tiꞌara toinámu,
17 láwiꞌ kagóeꞌ-góeꞌ hangaa-ngaa nulámbiꞌ peá
hangko i toinámu haduduámu,
tiꞌara hai towawine ntániꞌna.
18 Hampóáꞌworia Pueꞌ mowátiꞌ toinámu,
góeꞌkoꞌ hai towawine to nupotoina
hangko i kamaleheꞌámu.
19 Toinámu malásáꞌ hai makehiꞌ nodo lagiwa,
maroꞌa ane kamalásáꞌna wátána mopagóeꞌkoꞌ,
hai tediiꞌ oaꞌ lalumu ánti pekabilaina.
20 Ee ánáꞌkuꞌ, moapa riꞌi haneꞌi mampokaelukoꞌ towawine to masilaka,
hai mampoiluhikoꞌ toinána tauna ntaniꞌ.
21 Láwiꞌ PUEꞌ moita upu-upuna to rabábehi tauna,
iumbá-umbá peá kalaoáraꞌ, PUEꞌ mampetiro.
22 Tauna to kadake manawoꞌ ánti dósána haduduána,
ia tiꞌara peisá tekábáhá.
23 Ánti kabebena iti, ia tiꞌara mouláꞌ rárá to manótó.
Ia mate láwiꞌ tiꞌara mampehádingi paturoꞌ.