Ineeꞌ nukábáhá kanótó lalu
4
Ee ánáꞌkuꞌ, nipehádingi paturoꞌna umámi,hai nipailalu bona mewaliꞌkou mapánde.
2 To kupaturoꞌákou deꞌe maroꞌa,
onoꞌ miꞌi haneꞌi ineeꞌ nikáláliꞌá.
3 Tempóngkuꞌ mani kókóiꞌ, toroꞌ maniaꞌ i támbina umángkuꞌ,
hai kanapokaꞌahiꞌkuꞌ inángkuꞌ nodoaꞌ ánáꞌna to haduduána.
4 Kódóꞌ napaturoꞌaꞌ umángkuꞌ, nauliꞌ node:
“Hangaa-ngaa nubuhinao oaꞌ laluitangkuꞌ
hai paturoꞌkuꞌ nupeuláꞌi bona maroꞌa katueꞌmu.
5 Nubuhinao oaꞌ laluitangkuꞌ hai ineeꞌ nukábáhá
bona mewaliꞌkoꞌ to bukeꞌ kanótó lalu.
6 Ineeꞌ nukábáhá kanótó lalu,
nubiláꞌ láwiꞌ iti to mokámpáikoꞌ.
7 To hangaa-ngaa nupaioru ntepuꞌu ia miꞌi
bona mewaliꞌkoꞌ to bukeꞌ kanótó lalu,
nupári-pári bona mewaliꞌkoꞌ to mapánde.
8 Nótó lalu hangaa-ngaa nubiláꞌ hai ineeꞌ nukábáhá,
bona rapomahilekoꞌ.
9 Ánti kanótó lalu, ina rabiláꞌkoꞌ tauna,
nodokoꞌ to rapoweꞌi tatali datu to meawaꞌ.”
10 Ee ánáꞌkuꞌ, nupehádingiaꞌ hai nupailalu maroꞌa paturoꞌkuꞌ
bona matinuwuꞌkoꞌ.
11 Kupaturoꞌmokoꞌ bona mewaliꞌkoꞌ to bukeꞌ kanótó lalu,
hai kupakanótóákoꞌ rárá to manótó.
12 Ane noꞌonoꞌi katueꞌmu, tiꞌarakoꞌ ina tesalempori i polumaoámu,
hai tiꞌarakoꞌ ina tehube ane melangkakoꞌ.
13 Nutibaaꞌ oaꞌ paturoꞌ to kuhángáꞌámokoꞌ, ineeꞌ nukábáhá.
Ane nupeuláꞌi, ina maroꞌa katueꞌmu.
14 Ineeꞌkoꞌ mampeuláꞌi rárá katueꞌraꞌ tauna to kadake,
hai ineeꞌkoꞌ mampeuláꞌi bábehiáraꞌ.
15 Nukaraohi rárá katueꞌraꞌ,
ineeꞌkoꞌ hingkakani hai hira.
16 Tauna to kadake, tiꞌara maniheꞌ peisá letaꞌ
ane tiꞌara maniheꞌ mampopolumao bábehiáraꞌ to kadake.
Tiꞌara maniheꞌ malelue
ane tiꞌara maniheꞌ mopakarugiꞌ tauna.
17 Kakadakeraꞌ hai kamasekeraꞌ,
nodo miꞌi pandeꞌ hai painu i hira.
18-19 Rárá katueꞌraꞌ tauna to kadake makáindi ntepuꞌu,
tiꞌara raisá noumbá haneꞌiheꞌ molámbiꞌ kapári.
Agáiáná rárá katueꞌraꞌ tauna to manótó,
kalao-laoá makaaꞌ duuꞌna mewangkaꞌ ntepuꞌu.a
20 Ee ánáꞌkuꞌ, hangaa-ngaa nupailalu laluitangkuꞌ,
nupehádingi mpakaroꞌa apa to kupaturoꞌákoꞌ.
21 Ineeꞌ nukáláliꞌá agáiáná nupailalu oaꞌ.
22 Tauna to mopailalu ntepuꞌu paturoꞌkuꞌ,
ina maroꞌa katueꞌna hai maróhó wátána.
23 Nukámpái ntepuꞌu lalumu,
láwiꞌ lalumu mopakanótó rárá katueꞌmu.b
24 Ineeꞌkoꞌ mohuwárá laluita to tiꞌara toꞌu
hai to mopakanawoꞌ tauna.
25 Nupailalu tunggáiána katueꞌmu,
nodo tauna to mampeita rárá to manoroꞌ i lindoꞌna.
26 Nupekiri mpakaroꞌa hangko tiꞌara mani nupobágóꞌ,
hai ina nulámbiꞌ tunggáiámu.
27 Ineeꞌkoꞌ mehupeꞌ hangko i rárá to manótó,
nukaraohi bábehiá to kadake.