Paturoꞌ i tauna to maleheꞌ mani
3
Ee ánáꞌkuꞌ, ineeꞌ nukáláliꞌá paturoꞌkuꞌ,hangaa-ngaa nupailalu párentángkuꞌ,
2 bona matinuwuꞌkoꞌ
hai maroꞌa katueꞌmu.
3 Ineeꞌkoꞌ mengkaroo mampokaꞌahiꞌ hángká rángámu,
tetidaꞌkoꞌ oaꞌ i hira
nodo áwóló to mentakaꞌ i támbólómu,
hai nupailalu nodo to nuꞌukiꞌ i watu poukiꞌá.
4 Ane nubábehi noꞌonoꞌ, ina rapokaꞌahiꞌkoꞌ hai rabiláꞌ
i peitána Pueꞌ Ala hai tauna.
5 Mepoináláimokoꞌ i PUEꞌ hangko i lalumu ntepuꞌu,
hai ineeꞌkoꞌ mohárungá pekirimu haduduámu.
6 Nubuhinao Pueꞌ i upu-upu to nubábehi,
bona Natudeꞌákoꞌ rárá to maroꞌa.
7 Ineeꞌkoꞌ mampepemahile láwiꞌ nurekeꞌ mapándemokoꞌ.
Hangaa-ngaa mengkoruꞌkoꞌ i PUEꞌ hai nukaraohi to kadake.
8 Ane nubábehi noꞌonoꞌ, ina maroꞌa powátámu,
hai maróhó buꞌumu.
9 Nupomahile PUEꞌ moliu popenómbá to nuhuhuꞌ,
hangko i hanggááꞌ polámbiꞌámu hai ulu wuaꞌ powiáꞌmu.
10 Ane nubábehi noꞌonoꞌ, pemboliámu pare ina bukeꞌ,
hai pemboliá uwai anggoroꞌ ina raóntóki haweꞌ lumbeáꞌ.
11 Ee ánáꞌkuꞌ, ineeꞌ nukáláliꞌá paturoꞌna PUEꞌ,
hai ineeꞌkoꞌ luleꞌ i pepaingáꞌiNa.
12 Láwiꞌ PUEꞌ mopaturoꞌ tauna to Napokaꞌahiꞌ,
nodo umaꞌ mokámbáróá ánáꞌna to napomahile.
13 Morasiꞌ miꞌi tauna to mopári-pári molámbiꞌ
kanótó lalu hai kapánde,
14 láwiꞌ kanótó lalu iti melumbuꞌ mani pobunduꞌána
hangko i peráꞌ hai buláwá.
15 Kanótó lalu mobunduꞌ mani hangko i watu akeꞌ,
tiꞌara ara hasibaliána hangko i apa peá to nulámbiꞌ.
16 Tauna to tueꞌ i kanótó lalu ina matinuwuꞌ,
ina molámbiꞌheꞌ kapebuku hai pebiláꞌ.
17 Katueꞌraꞌ ina maroꞌa,
hai upu-upu to rabábehi ina moánti roꞌa ngkatueꞌ.
18 Kanótó lalu nodo kau to mopaꞌara katueꞌ i tauna.a
Heáná to motibaaꞌ kanótó lalu
ina rauliꞌ tauna to maroꞌa katueꞌna.
19 Ánti kamapándeNa,
PUEꞌ mopaꞌara langiꞌ hai tampoꞌ.
20 Ia mampopesuwuꞌ uwai hangko i lapi tampoꞌ,
hai mopaꞌara namu hangko i gawu.
21 Ee ánáꞌkuꞌ, potimbá hai kanótó lalu
hangaa-ngaa ara oaꞌ i lalumu.
Ineeꞌ nukábáhá.
22 Ane nubábehi noꞌonoꞌ, ina maroꞌa katueꞌmu,
kanótó lalu ina nodo áwóló i támbólómu.
23 Ina tepelaekoꞌ hangko i kamarugiꞌ,
hai tiꞌarakoꞌ ina manawoꞌ.
24 Tempómu maturu-turu, tiꞌarakoꞌ paraluu malááꞌ,
ina letaꞌ mposoꞌkoꞌ.
25 Ineeꞌ nupakalááꞌ huleáká to merumpa hangkaꞌ-hangkaꞌ,
ba rugiꞌ to merampe i tauna to kadake,
26 láwiꞌ PUEꞌ ina mokámpáikoꞌ,
tiꞌarakoꞌ ina Napatodáhi molámbiꞌ rugiꞌ.
Paturoꞌ bona mobábehikeꞌ to maroꞌa
27 Ane arai tauna to membiáꞌ tulungi i hio,
ane nubukuntoi, ineeꞌkoꞌ masandaꞌ ina motulungi.
28 Ineeꞌ nuhángáꞌá hángká rángámu,
“Mesuleꞌmokoꞌ, kahalo rái ina kuweꞌikoꞌ,”
mole riꞌi to napembiáꞌ aranto i hio.
29 Ineeꞌkoꞌ moliwo mobábehi to kadake
i hantámbiámu to mampoináláikoꞌ.
30 Ineeꞌkoꞌ mosisalaꞌ hai tauna to maroꞌa
ane tiꞌarantoi mobábehi to kadake i hio.
31 Ineeꞌkoꞌ mahiniꞌ i tauna to maseke,
hai ineeꞌ nupeuláꞌi bábehiána,
32 láwiꞌ PUEꞌ mokáhihiꞌ tauna to kadake bábehiána,
agáiáná Ia mohintuwuꞌ hai tauna to manótó.
33 PUEꞌ mokambo tauna to kadake,
agáiáná mowátiꞌ tauna to manótó.
34 Ia mosalaꞌi tauna to maꞌángkáꞌ hai mesasalaꞌi,
agáiáná mopatongawaꞌ kamaꞌahiꞌNa i tauna to mengkaiwóiꞌ.
35 Tauna to bukeꞌ kanótó lalu ina Nabiláꞌ,
agáiáná tauna to matuꞌa laluna ina Nasalaꞌi.