Pobunduꞌána pepaturoꞌ
2
Ee ánáꞌkuꞌ, ane nutarima polaluitangkuꞌ,hai nupailalu paturoꞌkuꞌ,
2 hangaa-ngaa nupehádingi paturoꞌ to maroꞌa
hai nupári-pári molámbiꞌ kapánde.
3 Ane nupembiáꞌ hangko i lalumu ntepuꞌu
bona molámbiꞌkoꞌ pekiri hai kapánde,
4 ane nupeliꞌ kapánde nodokoꞌ mampeliꞌ peráꞌ
ba párewá to masuliꞌ to rawuni,
5 ina nuisá mengkoruꞌ PUEꞌ
hai ina nuisá kaheánáNa.
6 PUEꞌ peá pentóáꞌána kanótó lalu,
láwiꞌ Ia miꞌi to mampoweꞌikeꞌ paturoꞌ hai kapánde.
7 Ia timama motulungi tauna to bulá laluna,
hai mewaliꞌ lábá i tauna to tiꞌara ara salaꞌiáraꞌ.
8 Ia mokámpái katueꞌna tauna to hintotoꞌ pobutusina,
hai mampeámpárái tauna to tetidaꞌ i Hia.
9 Ane nupeuláꞌi paturoꞌkuꞌ, ina nuisá apa to rauliꞌ
kanótó lalu, kahintimbá, hai kamanoroꞌ,
hai ina nuisá woꞌo noumbá molumaoha katueꞌmu
bona mewaliꞌ maroꞌa.
10 Katueꞌmu ina bukeꞌ hai kanótó lalu,
hai ina góeꞌkoꞌ ánti kamapándemu.
11 Kanótó lalu ina mokádipurákoꞌ,
hai kapánde ina mokámpáikoꞌ,
12 Ane kanótó lalu ara i hio, ina tekámpáikoꞌ
bona tiꞌarakoꞌ mouláꞌ pambiáráraꞌ tauna to kadake hai meákálángi.
13 Tiꞌaraheꞌ mau mouláꞌ rárá to manótó,
agáiáná mouláꞌraheꞌ rárá to makáindi.
14 Góeꞌheꞌ mobábehi to kadake,
raundeꞌ peá mobagiuꞌ tauna ntániꞌna.
15 Tiꞌara manoroꞌ laluraꞌ,
mopakanawoꞌheꞌ hángká rángána.
16 Ane kanótó lalu ara i hio, ina nubuku moewaꞌ
pekeloꞌna towawine to tiꞌara maroꞌa bábehiána,
to mopári-pári monáráhikoꞌ bona malulu lalumu.
17 Towawine iti tiꞌara piꞌi tetidaꞌ i toámána
to napotoama i kamaleheꞌna mani.
Nakáláliꞌá miꞌi podándina i Pueꞌ Ala.
18 Ane laokoꞌ i támbina towawine iti,
hibali peá hai laokoꞌ i duniáꞌraꞌ tomate.
19 Heáná peá to mampoiluhi towawine iti
tiꞌara piꞌi peisá mesuleꞌ hangko ionoꞌ.
20 Onoꞌ miꞌi haneꞌi hangaa-ngaa mampeuláꞌikoꞌ pándiriꞌ
i tauna to maroꞌa bábehiáraꞌ,
hai tueꞌkoꞌ mouláꞌ peundeꞌána Pueꞌ Ala.
21 Láwiꞌ tauna to manótó hai tiꞌara ara salaꞌiáraꞌ
ina toroꞌheꞌ oaꞌ i tampoꞌraꞌ,
22 agáiáná tauna to kadake hai tiꞌara peisá rapoinálái,
ina ratibeheꞌ hangko tampoꞌraꞌ.