Paturoꞌ
Bunduꞌna paturoꞌna Salomo
1
Deꞌe miꞌi paturoꞌ-paturoꞌ to napahaweꞌ Salomo ánáꞌna Daudiꞌ, daturaꞌ toSáráeliꞌ.2 Tunggáiána paturoꞌ deꞌe ia miꞌi motulungi tauna bona:
mewaliꞌheꞌ bukeꞌ pekiri,
moisáheꞌ apa to hangaa-ngaa rabábehi i lalu katueꞌraꞌ,
hai moisáheꞌ molempónga laluita to kaladu.
3 Paturoꞌ-paturoꞌ deꞌe rapahaweꞌ i tauna
bona mewaliꞌheꞌ mapánde,
hai tueꞌ i kamanótó, i kahintimbá, hai i kamanoroꞌ.
4 Paturoꞌ deꞌe motulungi tauna to maleheꞌ mani
to tiꞌara mani hangka iumbá pekiriraꞌ,
bona mataru pekiriraꞌ, mewaliꞌheꞌ mapánde, hai bukeꞌ kanótó lalu.
5 Tauna to manótó pekiriraꞌ hai handaꞌ miꞌi to raisá,
maroꞌa ane mopailaluheꞌ paturoꞌ-paturoꞌ deꞌe,
bona tetámbái kamapánderaꞌ,
hai mampopolumaoheꞌ potimbá to ralámbiꞌ.
6 Laluita deꞌe mopaturoꞌ tauna bona moisáheꞌ molempónga
pándiriꞌ hai laluita to maꞌángkárá to rahuwárá tauna to mapánde.
7 Ane nuꞌundeꞌ mewaliꞌ tauna to mapánde,
to hangaa-ngaa nupaioru ia miꞌi mengkoruꞌkoꞌ i PUEꞌ,a
agáiáná tauna to bebe mokáhihiꞌ kapánde hai paturoꞌ.
Hangaa-ngaa motibaaꞌkeꞌ paturoꞌ to maroꞌa
8 Ee ánáꞌkuꞌ, nupehádingi paturoꞌna umámu,
hai ineeꞌ nukáláliꞌá paturoꞌna inámu,
9 láwiꞌ paturoꞌ iti nodo tatali to rabungaꞌi i wuáꞌmu,
hai áwóló to mengkilaꞌ i támbólómu.
10 Ee ánáꞌkuꞌ, ane nanáráhikoꞌ tauna to madósá,
ineeꞌ nupeuláꞌi.
11 Ane rápáꞌna rauliꞌ “Maikoꞌ meuláꞌ i kaiꞌ.
Laokeꞌ moekáki tauna, heáná peá to talámbiꞌ,
kehapiꞌ tiꞌara ara salaꞌna.
12 Kitaꞌ ina mopatunakeꞌ tauna to maroꞌa katueꞌraꞌ,
bona laoheꞌ i duniáꞌraꞌ tomate.
13 Ina moalakeꞌ párewáraꞌ to masuliꞌ hólóna,
bona támbintaꞌ bukeꞌ hai párewá to taperampaꞌi iti.
14 Maikoꞌ meuláꞌ i kaiꞌ! Párewá to taperampaꞌi iti
ina tagáláꞌ, hibali-bali kahandaꞌna.”
15 Ane rauliꞌ noꞌonoꞌ ánáꞌkuꞌ, ineeꞌkoꞌ meuláꞌ i hira.
Ineeꞌkoꞌ mampeuláꞌi peundeꞌáraꞌ,
16 láwiꞌ rapoinao pemiꞌi mobábehi to kadake
mopapate tauna.
17 Ane tádáhi moita tauna motáꞌá heáꞌ,
bateꞌna tiꞌara ina mesuaꞌ.
18 Agáiáná tauna to kadake iti peisá rapándiriꞌ
nodo tauna to motáꞌá heáꞌ.
Hira riꞌi haduduáraꞌ to kana.
19 Noꞌonoꞌ miꞌi to mewaliꞌ i tauna
to mampeliꞌ kapebukuna hangko i párewá to naperampaꞌi.
Ia haduduána to ina mate.
Ineeꞌkou mosasalaꞌi kanótó lalu
20 Kanótó lalu rapándiriꞌ nodo hadua towawineb
to mekióꞌ-kióꞌ i tangaꞌ rárá
hai i kahirámpuá tauna to handaꞌ bona rahádi wambaꞌna.
21 Ia mokióꞌ tauna hangko i wongko bente,
hai mopahaweꞌ laluitana i lindoꞌna babaꞌá bente kótá.
22 Nauliꞌ kanótó lalu, “Kómu to tiꞌara hangka iumbá pekirimi,
hangapa mani kamaruemi niundeꞌ peá oaꞌ noꞌonoꞌ?
Kómu to paka mesasalaꞌi, hangapa mani kamaruemi mesasalaꞌi?
Kómu to bebe, hangapa mani kamaruemi
mokáhihiꞌ paturoꞌ?
23 Nipehádingi pekámbároángkuꞌ.
Ina kupobubuhaikou apa to ara i lalungkuꞌ,
hai ina kupopahaweꞌikou laluita.
24 I tempóngkuꞌ mokióꞌkou, tiꞌaraꞌaꞌ nipehádingi,
i tempóngkuꞌ mewáwáhá, tiꞌarakou mau.
25 Mogalo riꞌi paturoꞌkuꞌ, tiꞌara nipehádingi,
hai tiꞌarakou mampeuláꞌi pekámbároángkuꞌ.
26-27 Onoꞌ miꞌi haneꞌi i tempómi hurewuꞌ,
ina kupatawaikou.
Ane kapári morumpakou nodo peangi
hai molámbiꞌmokou huleáká,
ina kupopisiꞌákou.
28 Tempó onoꞌ, ina nikióꞌaꞌ, agáiáná tiꞌara ina kuhániki.
Kehapiꞌaꞌ nipeliꞌ, agáiáná tiꞌaraꞌaꞌ ina nilámbiꞌ,
29 láwiꞌ mokáhihiꞌkou paturoꞌ
hai tiꞌarakou mengkoruꞌ PUEꞌ.
30 Tiꞌarakou mampehádingi paturoꞌkuꞌ
hai tiꞌarakou motarima upu-upu pekámbároángkuꞌ,
31 onoꞌ miꞌi haneꞌi ina nihádiá wuaꞌna
bábehiámi hai poliwomi to kadake.
32 Tauna to tiꞌara hangka iumbá pekiriraꞌ
ina mate ánti katiꞌáráraꞌ mepehádingi,
hai tauna to bebe
ina tuna ánti salaꞌraꞌ haduduáraꞌ.
33 Agáiáná heáná to mampehádingiaꞌ
ina tueꞌ i kamaroꞌa-roꞌa,
ina tinda laluna,
tiꞌara paraluu malááꞌ i kapári to rumihi.”