Sura Petóiá i

SURA PETÓIÁ

Laluita to mopakanótó óntóꞌna sura

Óntóꞌna Sura Petóiá ia miꞌi pekakae hai nani. Sura deꞌe raukiꞌ bahangapa tauna i lalu bahangapa átuna parena kamaruena. To sae ntepuꞌu ia miꞌi nani ka-90 to nakáráhi Musa. Nani-nani hai pekakae deꞌe rarámpu toSáráeliꞌ hai rapakeꞌ ane menómbáheꞌ.

Mampopengaa pákáꞌna nani to rarámpu, rápáꞌna: nani petóiá i Pueꞌ Ala ánti kaheánáNa ba ánti bábehiáNa motulungi taunáNaheꞌ, ba ánti pampopewaliꞌNa duniáꞌ hai upu-upu óntóꞌna. Ara woꞌo nani menómbá, nani hai pekakae membiáꞌ tulungi i Pueꞌ Ala bona mampelae taunáNa hai mohukuheꞌ ewáliraꞌ, ba mokámpái datu. Ara woꞌo nani to mopaturoꞌ tauna mokana i daritakánáraꞌ toSáráeliꞌ, nani to mampopaingáꞌi tauna pehukuna Pueꞌ Ala, nani metatangi tempóna Pueꞌ Ala mohuku taunáNa hai ranangiheꞌ ewáliraꞌ ba kótá Ierusale rapakanawoꞌ. Ara woꞌo pekakae membiáꞌ ámpu.

Ara nani to rapakeꞌ tauna hadua-hadua, ara woꞌo to rapakeꞌ tauna ane hirámpuheꞌ menómbá. Ane tabásá Sura Petóiá deꞌe, talámbiꞌ hinángkáꞌ pehádiraꞌ tauna, rápáꞌna: ara to moukiꞌ nani ba pekakae tempóna wiora, góeꞌ, wuli, ba mabukoꞌ.

Bahangapa kánina Iesu molaluita mokábelái Sura Petóiá. Kehapiꞌ teukiꞌ rekeꞌ-rekeꞌna hasábu parena hangko tiꞌara mani mewaliꞌ, ara woꞌo to teukiꞌ mokana i katueꞌna Iesu i duniáꞌ deꞌe hai kamatena. Rápáꞌna, básá gáláꞌna ka-2, 18, 22-24, 41, 68, 118.

Ara hantepóꞌ laluita to tiꞌara mesupaꞌ i to ralimbá deꞌe, ia miꞌi “Sela”. Tiꞌara piꞌi taisá apa lempóna ba apa bunduꞌna.

Óntóꞌna

Sura Petóiá deꞌe ara 150 gáláꞌna to ragáláꞌ woꞌo lima pákáꞌna node:

Sura Kaꞌisáꞌ: Gáláꞌna 1-41. Kahandaꞌna nakáráhi Daudiꞌ mokana i tauna hai pewaliꞌna duniáꞌ. Hangaꞌna Pueꞌ Ala to biásá rapakeꞌ ia miꞌi “PUEꞌ” (YHWH).

Sura Kaduá: Gáláꞌna 42-72. Kahandaꞌna rakáráhi Daudiꞌ hai toKora mokana i pekábáhá hangko i ewali ba peámpungi. Hangaꞌna Pueꞌ Ala to biásá rapakeꞌ ia miꞌi “Pueꞌ Ala” (El, Elohim).

Sura Katálu: Gáláꞌna 73-89. Kahandaꞌna nani menómbá to nakáráhi Asaꞌ. Hangaꞌna Pueꞌ Ala to biásá rapakeꞌ ia miꞌi “Pueꞌ Ala” (El, Elohim). Sura Kaduá hai Katálu rarámpu tempóna Datu Sikia hai Datu Iosia mepárentá.

Sura Kaꞌiba: Gáláꞌna 90-106. Kahandaꞌna tiꞌara piꞌi taisá heáná to mokáráhi. Biásá mokana i tuntukánáraꞌ toSáráeliꞌ. Hangaꞌna Pueꞌ Ala to biásá rapakeꞌ ia miꞌi “PUEꞌ” (YHWH).

Sura Kalima: Gáláꞌna 107-150. Ara to nakáráhi Daudiꞌ ba tauna to tiꞌara taisá hangaꞌraꞌ. Kahandaꞌna nani petóiá ba mokana i ngkóráꞌna Pueꞌ. Hangaꞌna Pueꞌ Ala to biásá rapakeꞌ ia miꞌi “PUEꞌ” (YHWH). Sura Kaꞌiba hai Kalima rarámpu tempóna Esra ba Nehemia.