Paturoꞌna Datu Lemueli
31
Deꞌe miꞌi laluitana Lemueli datu i Masa, to napaturoꞌá inána, nauliꞌ:2 “Ánáꞌkuꞌ, io wátá ánáꞌkuꞌkoꞌ.
Pekakaengkuꞌ tebukeki i tempómu mesupaꞌ.
Apa to hangaa-ngaa ina kupahaweꞌákoꞌ?
3 Ineeꞌ nupegáláka katobaleilomu i towawine ntániꞌna,
láwiꞌ handaꞌ miꞌi datu to rapakanawoꞌ.
4 Lemueli! Tiꞌara hintotoꞌ ane datu moinu anggoroꞌ.
Tiꞌara woꞌo hintotoꞌ ane topopárentá mampoinao moinu to melángui,
5 bodaraꞌ mainu hai mokáláliꞌá áturá-áturá,
haneꞌi tiꞌaraheꞌ mamperuruꞌi tauna to i wóiꞌ tueꞌraꞌ.
6 Tauna to hungkuꞌ miꞌi ina mate peisá rapopainu to melángui,
hai anggoroꞌ peisá raweꞌi tauna to masusa laluraꞌ.
7 Tiꞌaranto moapa mainuheꞌ bona mokáláliꞌá peahiahiꞌraꞌ,
bona tiꞌarapoheꞌ mambuhinao kamapáriraꞌ.
8 Hangaa-ngaa nutulungiheꞌ tauna
to tiꞌara rabuku mampetawaꞌi wátáraꞌ haduduáraꞌ,
hai nuewaꞌ tauna to moántiheꞌ i lindoꞌna topebutusi.
9 Nutulungiheꞌ tauna to rapopeahiahiꞌ hai to i wóiꞌ tueꞌraꞌ.
Pobutusimu hangaa-ngaa hintotoꞌ.”
Towawine to maroꞌa
10 Heáná to peisá molámbiꞌ towawine to matáká
bona mewaliꞌ toinána?
Towawine to noꞌonoꞌ melumbuꞌ kamaroꞌana
hangko i watu paramata.
11 Ia napoinálái toámána,
haneꞌi toámána tiꞌara ara kamakuraꞌna.
12 Towawine iti maroꞌa oaꞌ bábehiána i toámána,
tiꞌara ara to nabábehi to tiꞌara maroꞌa.
13 Ia mampeliꞌ wulu dimbá hai nahe,
góeꞌ laluna mampobágóꞌ hai taena haduduána.
14 Ia lao mampeliꞌ pandeꞌ hai moánti i támbina,
nodo duanga mahile i tahiꞌ moánti pandeꞌ hangko i tampoꞌ to karaoꞌ.
15 Káindi mani, ia mearó miꞌi,
mopaihó pandeꞌraꞌ upu-upu to toroꞌ i támbina.
Ia mogáláꞌ-gáláꞌ woꞌo bágóꞌ i topedureinaheꞌ.
16 Ia mampeita hamboloꞌ tampoꞌ to maroꞌa
haneꞌi nahóló.
Hangko i polámbiꞌána, tampoꞌ iti natudaꞌi anggoroꞌ.
17 Ia mopatimama wátána
láwiꞌ ina mobágóꞌ matimi.
18 Naisá ntepuꞌu kaꞌina molámbiꞌna rasiꞌ ane arai to napobaluꞌ,
hai ia mobágóꞌ haweꞌ marue wengi.
19 Ia madota mobábehi aleꞌ
hai modau badu.
20 Towawine iti timama oaꞌ motulungi tauna to tiꞌara nakaꞌarai,
hai maroꞌa laluna i tauna to meahiahiꞌ.
21 Ia tiꞌara malááꞌ i tempó lengiꞌ,
láwiꞌ upu-upu tauna to i támbina, ara baduraꞌ to makápá.
22 Ia mobábehi báná to mababe rapakeꞌ i paturuá,
hai baduna nabábehi hangko i báná to meálu hai makámumu.
23 Toámána rabiláꞌ láwiꞌ ia tepasuaꞌ totosae
to mehoda i babaꞌá kótá mopáresáꞌ kara-kara.
24 Towawine iti mandau pewaruꞌ hangko i báná to meálu,
noꞌonoꞌ woꞌo pámpóu, hai napobaluꞌ i topobaluꞌ-baluꞌ.
25 Maróhó laluna, hai ia rabiláꞌ,
tiꞌara naposusa alo-alo to ina haweꞌ.
26 Polaluitana maꞌálusuꞌ hai bukeꞌ timbá,
maroꞌa pepaturoꞌna.
27 Ia madota mobágóꞌ, hai mokamata oaꞌ
upu-upu to mewaliꞌ i támbina.
28 Ánáꞌna mampolaluitaheꞌ kamaroꞌana ináraꞌ,
hai toámána woꞌo motóiá, nauliꞌ:
29 “Handaꞌ towawine to mobábehi to maroꞌa,
agáiáná io miꞌi to melumbuꞌ kamaroꞌamu.”
30 Pombae-mbae tauna tiꞌara peisá rapoinálái,
hai kamalásáꞌ ina matántá,
agáiáná towawine to mengkoruꞌ i PUEꞌ
hintotoꞌ ratóiá.
31 Niháwángi kamaroꞌana towawine iti,
láwiꞌ ia hintotoꞌ ratóiá iumbá-umbá peá.