Kakadakena tauna
53
I topoánti toponani. Mouláꞌ nani Mahalaꞌ. Nani pepaturoꞌ to nakáráhi Daudiꞌ.
2 Tauna to bebe manguliꞌ i laluraꞌ,
“Tiꞌara ara Pueꞌ Ala.”
Bábehiáraꞌ kadake hai metitidiꞌi,
tiꞌara ara haweꞌ hadua to mobábehi to maroꞌa.
3 Hangko i surugáꞌ, Pueꞌ Ala mokamata upu-upu tauna i duniáꞌ,
babilaꞌ ara to bukeꞌ pekiri hai membiáꞌ tulungi i Hia.
4 Agáiáná hira upu-upu tiꞌara piꞌi mouláꞌ rárá to manótó,
hai kadake bábehiáraꞌ.
Tiꞌara ara haweꞌ hadua to maroꞌa bábehiána.
5 Nauliꞌ Pueꞌ, “Tiꞌaraheꞌ paꞌi mampekiri, tauna to kadake iti?
Pakaheꞌ mopaupu taunáNgkuꞌ nodo to mopaupu rótiꞌ,
hai tiꞌaraheꞌ haweꞌ hangkani mekakae
membiáꞌ tulungi i Kódóꞌ Pueꞌ Ala.”
6 Tauna to kadake ina malááꞌ ntepuꞌuheꞌ,
mole riꞌi tiꞌara ara to mampopalááꞌheꞌ,
láwiꞌ Pueꞌ Ala mopapateheꞌ ewáliraꞌ taunáNa
hai mohawuka buꞌuraꞌ.
Ina rapamahiliheꞌ,
láwiꞌ Pueꞌ Ala mosapuákaheꞌ.
7 Hampóáꞌworia hangko i Sio
Pueꞌ Ala ina haweꞌ mampelae toSáráeliꞌ taunáNa.
Mewaliꞌ upu-upu toSáráeliꞌ pemuleꞌána Iako ina góeꞌheꞌ,
tempóna Pueꞌ Ala mopamaroꞌa huleꞌ katueꞌraꞌ taunáNa.