Pehuku i tauna to kadake
52
I topoánti toponani. Nani pepaturoꞌ to nakáráhi Daudiꞌ2 mokana i tempóna Doeꞌ toEdo mopahaweꞌ i Saulu kalaona Daudiꞌ i támbina Ahimeleꞌ.a
3 Ee tauna to keate!
Moapa riꞌi haneꞌi mampomaꞌángkáꞌkoꞌ bábehiámu to kadake
i tauna to tetidaꞌ oaꞌ i Pueꞌ Ala?b
4 Ee topebagiuꞌ!
Polaluitamu nodo pihoꞌ to mataru,
hai moliwokoꞌ mobábehi to mepakarugiꞌ.
5 Nuꞌundeꞌ mani mobábehi to kadake
haneꞌi to maroꞌa,
hai nuꞌundeꞌ mani modongkoꞌ
haneꞌi molaluita i katoꞌu-toꞌuána.
6 Ee topebagiuꞌ!
Nuꞌundeꞌ hinángkáꞌ laluita to mopamahái laluna tauna.
7 Agáiáná Pueꞌ Ala ina moropuꞌkoꞌ,
Ia ina mowurakoꞌ hangko i katoroꞌámu,
hai ina Nawehángikoꞌ hangko i oloꞌraꞌ tauna to tueꞌ.
8 Tauna to manótó ina malááꞌheꞌ moitakoꞌ,
hai ina rapatawaikoꞌ, rauliꞌ:
9 “Peita tauna to tiꞌara mohárungá pekámpáina Pueꞌ Ala,
to mohárungá peá kapebukuna,
hai mantámbái kamaróhóna
láwiꞌ mopamarugiꞌ hángká rángána.”
10 Agáiáná kódóꞌ deꞌe, nodoaꞌ kau saitu to marumbu taweꞌna
i lalu támbina Pueꞌ Ala.
Kupoinálái Pueꞌ Ala maꞌahiꞌ oaꞌ i kódóꞌ haweꞌ i rue-ruena.
11 Ina kutóiáKoꞌ oaꞌ ánti bábehiáMu.
Ina kubámbári kamaroꞌaMu i lindoꞌraꞌ tauna to tetidaꞌ i Hio.c