Pekakaena tauna to mampenosoꞌi dósána
51
1-2 Nani to nakáráhi Daudiꞌ i tempóna nakámbáróá nabiꞌ Nata láwiꞌ mebuálósi hai Batseba.a
3 Ó Pueꞌ Ala, kupembiáꞌ bona Nupokaꞌahiꞌaꞌ
mouláꞌ kamaꞌahiꞌMu to tiꞌara madepuꞌ-depuꞌ.
Nuwoe kamasalaꞌkuꞌ,
ánti kamahilena ahiꞌMu.
4 Nukalemohimoꞌ hangko i upu-upuna salaꞌkuꞌ
hai Nupamagasaꞌmoꞌ hangko i dósángkuꞌ,
5 láwiꞌ kuisá miꞌi kamasalaꞌkuꞌ,
hai kupepekiri oaꞌ kana i dósángkuꞌ.
6 I Hio Pueꞌ, i Hio peá madósámoꞌ,
láwiꞌ mobábehimoꞌ to kadake i peitáMu.
Mewaliꞌ hintotoꞌ ntepuꞌuaꞌ molámbiꞌ pehukuMu,
pobutusiMu iti manótó.
7 Hangko i lalu taꞌina inángkuꞌ, ambiꞌkuꞌ miꞌi madósá,
hai i kapesupaꞌkuꞌ miꞌi, aramoꞌ i kamasalaꞌ.
8 To Nuꞌundeꞌ, ia miꞌi bona bulá lalungkuꞌ.
Nupaturoꞌaꞌ bona manótó lalungkuꞌ.
9 Kupembiáꞌ bona Nuwoe kamasalaꞌkuꞌ,
bona magasaꞌaꞌ i lindoꞌMu.
Nupamagasaꞌ lalungkuꞌ, bona bulá huleꞌ.
10 Kupembiáꞌ bona Nupatodáhiaꞌ mohádi bámbári
kaNuámpungina miꞌi dósángkuꞌ,
bona lalungkuꞌ to Nupamapári miꞌi góeꞌ huleꞌ.
11 Ineeꞌ Nupeita kamadósángkuꞌ.
Kupembiáꞌ bona Nuwoe upu-upu kamasalaꞌkuꞌ.
12 Ó Pueꞌ Ala, kupembiáꞌ bona Nupamagasaꞌ lalungkuꞌ,
hai Nuwoꞌungi lalungkuꞌ bona tetidaꞌaꞌ oaꞌ i Hio.
13 Ineeꞌaꞌ Nutibe hangko i lindoꞌMu,
hai ineeꞌ Nuala InaoMu to magasaꞌ hangko i kódóꞌ.
14 Kupembiáꞌ bona Nupagóeꞌ huleꞌ lalungkuꞌ,
nodo kagóeꞌkuꞌ hangkoia
i kaNuhómpókingkuꞌ hangko i huku dósángkuꞌ.
Nubáliki lalungkuꞌ, bona kuꞌundeꞌ tetidaꞌ i Hio.
15 Hangko ionoꞌ, ina kupaturoꞌáheꞌ tauna to madósá
mokana i ráráMu,
bona tauna to moliungi áturáMu iti,
mesuleꞌheꞌ i Hio.
16 Ó Pueꞌ Ala to mohómpókiaꞌ,
Nukábáháꞌaꞌ hangko i dósángkuꞌ mopapate tauna.b
Ane Nubábehi noꞌonoꞌ,
ina góeꞌaꞌ mobámbári kamanótóna pobutusiMu.
17 Ó Pueꞌ, Nutulungiaꞌ
mohuwárá laluita petóiá i Hio.
18 Tiꞌara Nuꞌundeꞌ binataꞌ to rasambale rapopenómbá.
Ane mohuhuꞌaꞌ popenómbá to raintu,
tiꞌara woꞌo Nuꞌundeꞌ.c
19 Popenómbá to napogóeꞌ Pueꞌ Ala ia miꞌi:
to mampenosoꞌi dósána,
lalu to mengkaiwóiꞌ,
hai to mopangákuꞌ kamasalaꞌna.
Ó Pueꞌ Ala, tauna to noꞌonoꞌ
tiꞌara ina Nusapuáka.
20 Ó Pueꞌ, kupembiáꞌ bona Nupatongawaꞌ miꞌi kamaroꞌaMu i Sio.
Nuaró huleꞌ bente kótá Ierusale.
21 Hangko ionoꞌ, ina Nupokana popenómbá to hintotoꞌ,
popenómbá to raintu ina mopagóeꞌKoꞌ,
hai gapiꞌ laki ina rapopenómbá i Hio
i wongko paintuá popenómbá.