Penómbá to hintotoꞌ
50
Nani to nakáráhi Asaꞌ.
PUEꞌ Ala to Makuasaꞌ molaluita.
Ia mokióꞌheꞌ upu-upu tauna to i duniáꞌ,
hangko i pembetoá alo haweꞌ-haweꞌ i katámpuána.
2 Peawaꞌna Pueꞌ Ala mowangkaꞌi duniáꞌ
hangko i Sio, kótá to mababe ntepuꞌu.
3 Haweꞌ miꞌi Pueꞌ Ala to tapenómbái.
Ia tiꞌara piꞌi ina mampengkaniika dósáraꞌ taunáNa.
I lindoꞌNa ara api to mepapumpu,
hai Ia natolelingi peangi to rumihi.
4 Ia mokióꞌ langiꞌ hai tampoꞌ mosabiki
kaNahoda-hodana kara-kararaꞌ upu-upu taunáNa,
5 Nauliꞌ, “Niántimoheꞌ mai
tauna to tetidaꞌ i Kódóꞌ,a
to mopakaróhómoheꞌ pototowi hai Kódóꞌ
moliu popenómbá to rasambale.”
6 Langiꞌ mopahaweꞌ kamanótóna Pueꞌ Ala,
láwiꞌ Ia to mobutusi i kanótó-nótóána.
7 Nauliꞌ, “Ee taunáNgkuꞌ! Nipehádingi laluitaNgkuꞌ!
Ee toSáráeliꞌ! Kusalaꞌikou!
Kódóꞌ miꞌi Pueꞌ Ala, Pueꞌ Ala to nipenómbái.
8 Tiꞌarakou Kukámbáróá ánti popenómbá to nisambale.
Popenómbá to niꞌintu aranto oaꞌ i lindoꞌKuꞌ.
9 Tiꞌara paraluu Kuala
gapiꞌ ba bekeꞌ hangko i gimpumi,
10 láwiꞌ upu-upu binataꞌ i kakau
hai upu-upu gapiꞌ to i buluꞌ-buluꞌna,
Kódóꞌ pueꞌna.
11 Upu-upu tádáhi to ara i laerawa, Kuisá aha,
hai upu-upu to tueꞌ i pádá, Kódóꞌ pueꞌna.
12 Ane rápáꞌna marimiAꞌ, tiꞌarakou paraluu Kuhángáꞌá,
láwiꞌ duniáꞌ hai upu-upu óntóꞌna, Kódóꞌ aha pueꞌna.
13 TiꞌaraꞌAꞌ mandeꞌ bauꞌ gapiꞌ,
hai waheꞌna bekeꞌ tiꞌara woꞌo Kuinu.
14 To Kuꞌundeꞌ, nihuhuꞌ popenómbá kagóeꞌ lalu,
hai nibukeki dándimi i Pueꞌ Ala to i Surugáꞌ.
15 Meraruaꞌmokou i Kódóꞌ i tempómi mapári,
ina Kukábáhákou, hai ina nipomahileAꞌ.”
16 Agáiáná i tauna to kadake, Pueꞌ Ala mongkóráꞌ node:
“Apa miꞌi bunduꞌna mampolaluitakou áturáNgkuꞌ
hai pototowi to Kupaꞌara?
17 Mole riꞌi mokáhihiꞌkou pekámbáróáNgkuꞌ,
hai laluitaNgkuꞌ tiꞌara nipeuláꞌi.
18 Ane moitakou topanako, niporángá riꞌi!
Mohintuwuꞌkou hai tauna to mebuálósi.
19 Mampolaluitakou oaꞌ to kadake,
hai niundeꞌ oaꞌ mebagiuꞌ.
20 Halalumi nipakadake oaꞌ,
hai halalu hampembolo-mbolomi nititibei oaꞌ.
21 Iti miꞌi to nibábehi, agáiáná Kupatodáhi pekou,
onoꞌ miꞌi haneꞌi nipekiri Kódóꞌ deꞌe hibaliAꞌ hai kómu.
Agáiáná ina Kusalaꞌikou bona tongawaꞌ kamasalaꞌmi.
22 Kómu to mokáláliꞌá Pueꞌ Ala,
nipehádingi apa to Kuꞌuliꞌ iti,
bona tiꞌarakou Kuropuꞌ,
hai tiꞌara ara to ina mampelaekou.
23 Ane manguliꞌkou handaꞌ kamaroꞌana i Kódóꞌ,
iti miꞌi nodo popenómbámi to mobiláꞌAꞌ,
hai ane nikámpái rárá katueꞌmi,
ina Kupatongawaꞌákou kuasaꞌKuꞌ metulungi.”