Mehárungá i kapebuku tiꞌara mobunduꞌ
49
I topoánti toponani. Naniraꞌ toKora.
2 Ee upu-upu tina, nipehádingi,
nipailalu upu-upukou to i duniáꞌ,
3 maroꞌa to i wóiꞌ tueꞌraꞌ, maroꞌa to tekahangaꞌiá,
maroꞌa topeahiahiꞌ, maroꞌa topebuku.
4 Ina kuhuwárá laluita to bukeꞌ kapánde.
To kupepekiri i lalungkuꞌ, kaladu ntepuꞌu.
5 Ina kupailalu tangkuleraꞌ,
hai tangaꞌkuꞌ mokáwiꞌ kasapi,
ina kutótóráká apa lempóna.
6 Moapa riꞌi haneꞌi malááꞌaꞌ ane narampeaꞌ kapári
i tempóngkuꞌ ratolelingi ewálingkuꞌ to kadake?
7 Hira iti mehárungáheꞌ i kapebukuraꞌ,
hai maꞌángkáꞌheꞌ ánti kahandaꞌna párewáraꞌ.
8 Tiꞌara ara haweꞌ hadua tauna
to nabuku mohómpóki katueꞌna haduduána,
ba mobaiari paháwángina wátána i Pueꞌ Ala,
9-10 láwiꞌ katueꞌna tauna masuliꞌ gaga.
To rahuhuꞌ i Pueꞌ bona tauna tueꞌ oaꞌ i duniáꞌ deꞌe,
bateꞌna tiꞌara ina magáná mohómpóki wátána haduduána.
11 Tongawaꞌ ntepuꞌu, tauna to mapánde mate,
noꞌonoꞌ woꞌo tauna to bebe hai matuꞌa laluraꞌ
ina mateheꞌ woꞌo,
hai párewáraꞌ ina raꞌala tauna ntániꞌna.
12 Ane matemoheꞌ, ina araheꞌ oaꞌ i lalu popatawuá,
i hinti miꞌi to mewaliꞌ katoroꞌáraꞌ haweꞌ i rue-ruena,a
mole hangkoia i tempóraꞌ mani tueꞌ, handaꞌ tampoꞌraꞌ.
13 Agáiáná tauna, kehapiꞌ to pebuku,
mateheꞌ hibali hai binataꞌ, tiꞌaraheꞌ ina mantaha.
14 Noꞌonoꞌ miꞌi kahópóꞌána katueꞌraꞌ tauna
to mamporóhó peá wátáraꞌ haduduáraꞌ,
hai mampoinálái polaluitaraꞌ haduduáraꞌ.
15 Hira iti napakanótóheꞌ Pueꞌ Ala
ina mateheꞌ nodo dimbá hai ratawu.
Wátáraꞌ ina magoro,
hai karaoꞌheꞌ hangko i katoroꞌáraꞌ hangkoia
to bukeꞌ kapeawaꞌ.
16 Agáiáná Pueꞌ Ala ina mokábáháꞌaꞌ hangko i kuasaꞌ kapate.
Bateꞌna ina Nahoreaꞌ hangko i duniáꞌraꞌ tomate.
17 Ineeꞌ niposusa lalu ane ara tauna to mewaliꞌ pebuku,
hai katueꞌraꞌ hantámbi mantámbái oaꞌ peawaꞌna,
18 láwiꞌ ane haweꞌ miꞌi tempóraꞌ ina mate,
upu-upu peawaꞌraꞌ iti tiꞌara ina raꞌánti,
kapebukuraꞌ tiꞌara ina meuláꞌ i popatawuáraꞌ.
19 Kehapiꞌ katueꞌraꞌ rarekeꞌ maroꞌa miꞌi lántuꞌáraꞌ tueꞌ,
hai hira ratóiá ánti kahandaꞌna porasiꞌáraꞌ,
20 bateꞌraꞌ ina motutuhá toioruraꞌheꞌ
lao i katoroꞌá to makáindi haweꞌ i rue-ruena.
21 Tauna to tueꞌ i lalu kapeawaꞌ
agáiáná tiꞌara moisá tunggáiána katueꞌraꞌ,
hibali peheꞌ hai binataꞌ, ina mateheꞌ.