Sio ia miꞌi kótána Pueꞌ Ala
48
Nani to rakáráhi toKora.
2 PUEꞌ to tapenómbái makuasaꞌ ntepuꞌu,
hai hintotoꞌ ntepuꞌu ratóiá i kótáNa.a
3 Buluꞌ Sio to magasaꞌ, mapángkáꞌ hai mababe,
rapokagóeꞌ upu-upu tauna i duniáꞌ.
Buluꞌ Sio tándáꞌ i wongko ia miꞌi kótána Datu Mahile.
4 I lalu bente Sio, Pueꞌ Ala mopakanótó
Ia miꞌi to mokámpái.
5 Peita! Datu-datu hai surudadoꞌraꞌ hirámpumoheꞌ,
maiheꞌ ina mepombealaꞌá.
6 Agáiáná i karaitána peá buluꞌ iti, tingkáráꞌ hai malááꞌheꞌ,
mewaliꞌ melangkaheꞌ, tiꞌara raisá kanoumbáꞌáraꞌ.
7 Moridiꞌheꞌ ánti kamalááꞌraꞌ,
nodoheꞌ towawine to tangaꞌna humádi.
8 Pueꞌ mopatunaheꞌ, nodo wui to rumihi
mogero duanga tahiꞌ to mahile to hangko i Tarisi.b
9 Apa to tahádi mokana i apa to nabábehi Pueꞌ hangkoia,
deꞌe-deꞌe taita mewaliꞌ miꞌi i kótána PUEꞌ to Makuasaꞌ,
ia miꞌi kótána Pueꞌ Ala to tapenómbái
to Nakámpái oaꞌ haweꞌ i rue-ruena.
10 Ó Pueꞌ Ala, i lalu TámbiMu,
kipepekiri oaꞌ ahiꞌMu to tiꞌara madepuꞌ-depuꞌ.
11 HangaꞌMu tebámbári hai tetóiá i humalele duniáꞌ.
Io to makuasaꞌ mepárentá i kanótó-nótóána.
12 Tauna to toroꞌ i buluꞌ Sio hai i tampoꞌ Iudá,
góeꞌheꞌ, láwiꞌ ewáliraꞌ Nuhukumoheꞌ.c
13 Ee taunána Pueꞌ Ala!
Nitolelingi kótá Sio iti,
hai niꞌimbaꞌ peantoꞌá to i bentena.
14 Laokou mopáresáꞌ bosoꞌ watu,
hai nipeita woꞌo bentena,
bona niꞌisá haneꞌi nidaritaꞌáheꞌ pemuleꞌámi.
15 Pueꞌ Ala Pueꞌtaꞌ haweꞌ i rue-ruena,
Ia to ina moteteꞌkeꞌ haweꞌ i kahópóꞌána.