Pueꞌ Ala to makuasaꞌ i humalele duniáꞌ
47
I topoánti toponani. Naniraꞌ toKora.
2 Góeꞌ-góeꞌmokou upu-upu tauna i duniáꞌ,
mohoraꞌ-horaꞌkou hai motupeꞌ-tupeꞌ motóiá Pueꞌ Ala,
3 láwiꞌ PUEꞌ to i Surugáꞌ, Ia to makuasaꞌ ntepuꞌu,
Ia miꞌi Datu Mahile to makuasaꞌ i humalele duniáꞌ.
4 Ia mampopengkoruꞌheꞌ tauna i kitaꞌ,
Napopewaliꞌkeꞌ makuasaꞌ i tina-tina i duniáꞌ.a
5 Ia mopileꞌi tampoꞌ to mewaliꞌ sosorantaꞌ.
Kitaꞌ pemuleꞌánakeꞌ Iako to napokaꞌahiꞌ Pueꞌ,
góeꞌkeꞌ i tampoꞌ iti.
6 Pueꞌ Ala mengkaheꞌ miꞌi i pehodaꞌá kadatuáNa,
mohoraꞌ-horaꞌ tauna ánti kagóeꞌraꞌ,
hai tamburuꞌ ratawueꞌ topomusi.
7 Monanikou, motóiá Pueꞌ Ala,
monanikou, motóiá Datuntaꞌ!
8 Pueꞌ Ala, Ia miꞌi Datu i humalele duniáꞌ.
Tatóiá miꞌi Pueꞌ hai nani to maroꞌa ntepuꞌu.
9 Pueꞌ Ala Ia miꞌi Datu to mopárentá upu-upu tauna,
Pueꞌ Ala mehoda i pehodaꞌáNa to magasaꞌ.
10 Tadulako-tadulako i humalele duniáꞌ hirámpuheꞌ
hingkakani hai taunána Pueꞌ Ala to napenómbái Burahima,
láwiꞌ Pueꞌ Ala melumbuꞌ kamakuasaꞌNa
hangko i datu-datu i duniáꞌ.
Ia rapomahile ntepuꞌu.