Pueꞌ Ala mamporángákeꞌ
46
I topoánti toponani. Nani petóiá to rakáráhi toKora.a Rananika mouláꞌ nani “Alamoꞌ”.
2 Pueꞌ Ala, Ia miꞌi pengkatueꞌántaꞌ to maróhó,
Ia to motulungikeꞌ i tempóntaꞌ hurewuꞌ.
3 Onoꞌ miꞌi haneꞌi tiꞌarakeꞌ paraluu malááꞌ,
kehapiꞌ miꞌi mewaliꞌ linu to rumihi,
hai buluꞌ-buluꞌ matuá i lalu tahiꞌ.
4 Kehapiꞌ miꞌi uwai tahiꞌ mewoo,
hai rumihi ntepuꞌu pobálumbána,
tiꞌarakeꞌ ina malááꞌ.
Kehapiꞌ buluꞌ-buluꞌ moduá
láwiꞌ narumpa bálumbá to rumihi,
tiꞌarakeꞌ ina malááꞌ.
5 Ara uwai to moánti kagóeꞌ i tauna
to ara i kótá Ierusale, kótá to magasaꞌ,
katoroꞌána Pueꞌ Ala to i Surugáꞌ.
6 Pueꞌ Ala toroꞌ i kótá iti,
onoꞌ miꞌi haneꞌi kótá iti tiꞌara ina tuna.
Pueꞌ Ala ina mopelae kótá iti i pembetona alo.
7 Pueꞌ Ala molaluita nodo gumpataꞌ,
álána duniáꞌ maropuꞌ.
Upu-upu tauna i duniáꞌ magewo ánti kamalááꞌraꞌ,
hai upu-upu kadatuá ina magero.
8 PUEꞌ to Makuasaꞌ mamporángákeꞌ.
Pueꞌ Ala to napenómbái Iako iti,
Ia miꞌi pengkatueꞌántaꞌ.
9 Maikou mampeita apa to nabábehi PUEꞌ.
Ia mopaꞌara to metitingkáráki i duniáꞌ!
10 Iumbá-umbá i duniáꞌ, Ia mampopengkaroo pombeala,
panaꞌ hai tawalaꞌ Narupuꞌ,
hai lábá Naintu.b
11 Nauliꞌ, “Mengkaroomokou mombeala!
Bona niꞌisá, Kódóꞌ miꞌi deꞌe Pueꞌ Ala.
Kódóꞌ bateꞌna rapomahileAꞌ upu-upu tauna.
Kódóꞌ bateꞌna rapomahileAꞌ i humalele duniáꞌ.”
12 PUEꞌ to Makuasaꞌ mamporángákeꞌ.
Pueꞌ Ala to napenómbái Iako iti,
Ia miꞌi pengkatueꞌántaꞌ.