Nani to rananika i tempóna datu ratauna
45
I topoánti toponani. Rananika mouláꞌ nani “Bungaꞌ Bakung”. Rakáráhi toKora.a Nani pepaturoꞌ, nani kagóeꞌ-góeꞌ.
2 Lalungkuꞌ bukeꞌ hai laluita to marasa
to kunanika i datu.
Lilaꞌkuꞌ nodo peukiꞌna guruntulisiꞌ to mapánde.
3 Io miꞌi to malápáká ntepuꞌu hangko i oloꞌraꞌ tobaleilo.
Upu-upu laluita to nuhuwárá maroꞌa ntepuꞌu.
Tongawaꞌ kanawátiꞌmu miꞌi Pueꞌ Ala haweꞌ i rue-ruena.
4 Ee datu to maróhó,
nupatakaꞌ miꞌi pihoꞌmu i hopeꞌmu.
Io datu to meawaꞌ hai makuasaꞌ ntepuꞌu.
5 Laomokoꞌ i peawaꞌmu,
mampeámpárái tauna i kamanótó hai kahintimbá.
Ánti kamaróhómu, monangikoꞌ ewálimu to handaꞌ.
6 Mata panaꞌmu mataru,
motohuꞌ ewálimu lembáꞌ haweꞌ i huleraꞌ.
Tauna i tampoꞌ ntániꞌna mengkoruꞌheꞌ i hio.
7 Pueꞌ Ala mampoweꞌikoꞌ kuasaꞌ mepárentá,b
hai kamakuasaꞌmu tiꞌara ina mokahópóꞌá.
Laiꞌ kadatuá ia miꞌi tandaꞌ kamakuasaꞌmu
mepárentá i kamanótó.
8 Upu-upu bábehiá to manótó nuꞌundeꞌ,
agáiáná bábehiá to kadake nukáhihiꞌ.
Onoꞌ haneꞌi Pueꞌ Ala to nupenómbái
moángkáꞌmokoꞌ mewaliꞌ datu,
hai kagóeꞌmu melumbuꞌ hangko i kagóeꞌna datu ntániꞌna.c
9 Badumu mawongi ralanai mire, gaharu,
hai sendana.
Góeꞌkoꞌ mohádi musi kasapi to rapopokániꞌ
i támbi kadatuá to rabungaꞌ-bungaꞌi toꞌae.
10 I oloꞌraꞌ towawine to rabiláꞌ,
araheꞌ woꞌo ánáꞌraꞌ datu.
I tándáꞌ kuánámu, meángkáꞌ ánáꞌntawine
to ina mewaliꞌ sambokomu.
Baduna rabungaꞌ-bungaꞌi hai buláwá to mengkilaꞌ ntepuꞌu.d
11 Ee ánáꞌntawine, nupehádingi mpakaroꞌa laluitangkuꞌ.
Ineeꞌmokoꞌ mambuhinao halalumu hai tampoꞌmu.
12 Naundeꞌ ntepuꞌukoꞌ datu láwiꞌ malásáꞌkoꞌ.
Ia miꞌi to makuasaꞌ i hio, onoꞌ haneꞌi nupengkoruꞌi.
13 Towawine hangko i kótá Tiru mohuhuꞌheꞌ paraseeraꞌ i hio,
tauna to pebuku mopári-páriheꞌ mopamalulu lalumu.
14 Malásáꞌ ntepuꞌu ánáꞌntawine ánáꞌna datu.
Ia ara miꞌi i lalu támbi kadatuá,
pewaruꞌna rabungaꞌ-bungaꞌi buláwá.
15 Ia mopakeꞌ pewaruꞌ to meraeꞌ,
raꞌánti lao i datu i kagóeꞌ-góeꞌ.
Araheꞌ woꞌo ánáꞌntawine to meuláꞌ i hia,
raꞌántiheꞌ woꞌo lao i datu.
16 Mohoraꞌ-horaꞌheꞌ ánti kagóeꞌraꞌ
i tempóraꞌ mesuaꞌ i támbina datu.
17 Ee datu, pemuleꞌámu ina mewaliꞌheꞌ woꞌo datu,
ina mopaháwángiheꞌ toioruraꞌ.
Ánti kaꞌiona, ina mewaliꞌheꞌ to makuasaꞌ i humalele duniáꞌ.
18 Moliu nani deꞌe kutóiákoꞌ,
bona tauna i duniáꞌ mambuhinaokoꞌ oaꞌ,
hai motóiákoꞌ haweꞌ i rue-ruena.