Pekakae membiáꞌ bona Pueꞌ mekámpái
44
I topoánti toponani. Nani pepaturoꞌ to rakáráhi toKora.a
2 Ó Pueꞌ Ala, kihádi miꞌi hangko i toiorungkiꞌ,
apa to Nubábehi hangkoia to metitingkáráki.
3 Io haduduáMu to mowuraheꞌ tauna hangko i tampoꞌ to rakatoroꞌi,
bona taunáMu peisáheꞌ mokatoroꞌi tampoꞌ iti.b
Tauna ntániꞌna iti Nuhukuheꞌ,
agáiáná taunáMu Nupamaroꞌa katueꞌraꞌ.
4 Tampoꞌ iti tiꞌara raꞌala taunáMu tempóraꞌ mombeala,
tiꞌara woꞌo raꞌala ánti kamaróhóraꞌ haduduáraꞌ haneꞌiheꞌ menangi,
agáiáná ánti kamakuasaꞌMu hai pewangkaꞌMu,
láwiꞌ Nupokagóeꞌheꞌ.
5 Pueꞌ Ala, Io miꞌi Datungkuꞌ to kupenómbái,
Io miꞌi to mopakanótó bona toSáráeliꞌcmenangiheꞌ.
6 Ánti kamakuasaꞌMu, monangiangkaiꞌ ewálingkiꞌ
hai mokada-kadaꞌangkaiꞌ tauna to moewaꞌangkaiꞌ.
7 Tiꞌaraꞌaꞌ mohárungá mata panaꞌkuꞌ,
hai tiꞌara woꞌo pihoꞌkuꞌ to mampelaeaꞌ,
8 ngkáliꞌna riꞌi, Io to mampelaeangkaiꞌ
hangko i tauna to moewaꞌangkaiꞌ,
hai Nupamahiliheꞌ tauna to mokáhihiꞌangkaiꞌ.
9 Onoꞌ miꞌi haneꞌi kipomahileKoꞌ,
hai ina kitóiáKoꞌ oaꞌ.
10 Agáiáná deꞌe-deꞌe Nutaleukimongkaiꞌ.
Nupatodáhiheꞌ ewálingkiꞌ mopakóiꞌangkaiꞌ,
hai tiꞌarapoKoꞌ mamporángá surudadoꞌkiꞌ lao mombeala.
11 Nupatodáhiangkaiꞌ mosuliꞌ hangko i ewálingkiꞌ,
álána tauna to mokáhihiꞌangkaiꞌ iti, morámpákiheꞌ párewángkiꞌ.
12 Nupatodáhiangkaiꞌ rapapate ewálingkiꞌ
nodo dimbá to rasambale.
Nupatodáhiangkaiꞌ mahawuꞌ
i tampoꞌraꞌ tauna to tiꞌaraKoꞌ moisá.
13 Nupatodáhiangkaiꞌ taunáMu rapobaluꞌ mewaliꞌ hawiꞌ.
Hólóngkiꞌ i wóiꞌ ntepuꞌu, tiꞌara ara to Nupoporasiꞌ.
14 Nupatodáhiangkaiꞌ rangee-ngee tauna ntániꞌna
to toroꞌheꞌ hungkuꞌ i kaiꞌ.
Rapatawai hai rapakóiꞌangkaiꞌ.
15 Nupatodáhiangkaiꞌ rauliꞌ-uliꞌ ewálingkiꞌ.
Mobibiliheꞌ ngkalao mopakóiꞌangkaiꞌ.
16 Hangaloá-loá rapakóiꞌaꞌ oaꞌ,
lindoꞌkuꞌ kuháláꞌ láwiꞌ mahiliaꞌ
17 mohádi polaluitaraꞌ ewálingkuꞌ
mosasalaꞌi hai motitibeiaꞌ.
Rapoinao ina meháwá.
18 Upu-upu iti mewaliꞌ miꞌi i kaiꞌ,
kehapiꞌ tiꞌaraKoꞌ kikáláliꞌá,
hai tiꞌaraꞌangkaiꞌ molingkaꞌi podándi to Nupaꞌara i kaiꞌ.
19 Tiꞌaraꞌangkaiꞌ motaleukiKoꞌ,
hai tiꞌaraꞌangkaiꞌ woꞌo mehupeꞌ hangko i ráráMu.
20 Agáiáná Nuropuꞌmongkaiꞌ,
Nutibemongkaiꞌ karaoꞌ,d
hai Nupálehimongkaiꞌ i katoroꞌá to makáindi.
21 Ó Pueꞌ Ala, ane rápáꞌna tiꞌarapongkaiꞌ menómbá i Hio,
hai mekakaeangkaiꞌ i pueꞌ ala ntaniꞌ,
22 bateꞌna Nuisá,
láwiꞌ mogalo riꞌi to rawuniángi i laluraꞌ tauna, Nuisá aha.
23 Ó Pueꞌ Ala, araheꞌ oaꞌ tauna to mampoinao mopapateangkaiꞌ
ánti peuláꞌkiꞌ i Hio.
Kaiꞌ deꞌe nodo dimbá to ina rasambale.e
24 Ó Pueꞌ, Nupelaeangkaiꞌ!
Moapa riꞌi haneꞌi maturu-turu peKoꞌ?
Ineeꞌangkaiꞌ Nupálehi haweꞌ i rue-ruena.
25 Moapa riꞌi haneꞌi Nutaleukiangkaiꞌ,
karapopeahiahiꞌkiꞌ hai kamapáringkiꞌ Nupengkáláliꞌánga?
26 Ranangiangkaiꞌ ewálingkiꞌ, manawoꞌangkaiꞌ i tampoꞌ,
tiꞌara kibuku mobábehi apa-apa.
27 MaiKoꞌ Nutulungiangkaiꞌ hai Nukábáháꞌangkaiꞌ
ánti kamaꞌahiꞌMu to tiꞌara madepuꞌ-depuꞌ.