Kakadakena tauna
14
I topoánti toponani. Nanina Daudiꞌ.
Tauna to bebe manguliꞌ i laluraꞌ,
“Tiꞌara ara Pueꞌ Ala.”
Bábehiáraꞌ kadake hai metitidiꞌi,
tiꞌara ara haweꞌ hadua to mobábehi to maroꞌa.
2 Hangko i surugáꞌ, PUEꞌ mokamata upu-upu tauna i duniáꞌ,
babilaꞌ ara to bukeꞌ pekiri hai membiáꞌ tulungi i Hia.
3 Agáiáná upu-upuheꞌ tiꞌara piꞌi mouláꞌ rárá to manótó,
hai kadake bábehiáraꞌ.
Tiꞌara ara haweꞌ hadua to maroꞌa bábehiána.
4 Nauliꞌ Pueꞌ, “Tiꞌaraheꞌ paꞌi mampekiri, tauna to kadake iti?
Pakaheꞌ mopaupu taunáNgkuꞌ nodo to mopaupu rótiꞌ,
hai tiꞌaraheꞌ haweꞌ hangkani mekakae
membiáꞌ tulungi i Kódóꞌ PUEꞌ.”
5 Tauna to kadake ina malááꞌ ntepuꞌuheꞌ,
láwiꞌ Pueꞌ Ala mamporángá tauna to manótó.
6 Tauna to kadake mosalempori poliworaꞌ tauna to meahiahiꞌ,
agáiáná PUEꞌ Ia miꞌi pengkatueꞌáraꞌ.
7 Hampóáꞌworia PUEꞌ ina haweꞌ hangko i Sio
mampelae toSáráeliꞌ taunáNa.
Mewaliꞌ upu-upu toSáráeliꞌ pemuleꞌána Iako ina góeꞌheꞌ
tempóna PUEꞌ mopamaroꞌa huleꞌ katueꞌraꞌ taunáNa.