Nani petóiá
40
I topoánti toponani. Nanina Daudiꞌ.
2 Mehárungá ntepuꞌuaꞌ i PUEꞌ.
Napehaileꞌaꞌ hai mampehádingi peraruaꞌkuꞌ membiáꞌ tulungi.
3 Naoreꞌaꞌ hangko i kapate
to nodo dondoꞌ to ina mohibuꞌaꞌ.
Napopeángkáꞌaꞌ i buluꞌ watu,
onoꞌ miꞌi haneꞌi maroꞌa polumaongkuꞌ.
4 Napoweꞌiaꞌ nani to woꞌu
bona kutóiá Pueꞌ Ala to tapenómbái.
Handaꞌ tauna ina moisá hai mobiláꞌ PUEꞌ,
haneꞌiheꞌ mehárungá i Hia.
5 Morasiꞌ miꞌi tauna to mehárungá i PUEꞌ,
to tiꞌara membiáꞌ tulungi i tauna to mampepemahile,
ba mehárungá i tauna to paka modongkoꞌ.
6 Ó Pueꞌ Ala PUEꞌkuꞌ,
handaꞌ ntepuꞌu to Nubábehi.
Upu-upu to Nuliwo i kaiꞌ maroꞌa ntepuꞌu.
Tiꞌara ara kahibaliáMu.
Ina kutuntu to Nubábehi iti,
agáiáná handaꞌ gaga.
7 Tiꞌara Nuꞌundeꞌ popenómbá to rasambale,
hai pare kabulá lalu.
Tiꞌara woꞌo Nuꞌundeꞌ popenómbá to raintu
hai popenómbá poámpungi dósá.
Agáiáná Nubungkáhi miꞌi talingangkuꞌ
bona kuhádi laluitaMu.a
8 Onoꞌ miꞌi haneꞌi kuꞌuliꞌ, “Deꞌemoꞌ Pueꞌ.
Maiaꞌ nodo to teukiꞌ i lalu Sura Magasaꞌ mokana i kódóꞌ.
9 Ó Pueꞌ Ala to kupenómbái, kuꞌundeꞌ mampeuláꞌi peundeꞌáMu.
Upu-upu PaturoꞌMu kupailalu.”b
10 I kahirámpuáraꞌ taunáMu to handaꞌ,
kupahaweꞌ bámbári to maroꞌa:
Io miꞌi to mampelaeangkaiꞌ,
tiꞌara kupengkaniika.
Nuisá miꞌi upu-upuna iti, PUEꞌ.
11 Bámbári kana i kahintimbáMu tiꞌara kuwuniángi,
ngkáliꞌna riꞌi kupolaluita mokana i katetidaꞌMu hai petulungiMu.
Tiꞌara kupengkaniika hangko i taunáMu to handaꞌ
kamaꞌahiꞌMu hai kamanótóMu.
12 Ó PUEꞌ, ineeꞌKoꞌ mengkaroo
mopatongawaꞌ kamaꞌahiꞌMu i kódóꞌ.
Kupembiáꞌ bona Nukámpáiaꞌ
ánti kamaꞌahiꞌMu hai katetidaꞌMu i kódóꞌ.
13 Katueꞌkuꞌ bukeꞌ hai kapári,
tiꞌara kubuku kuimbaꞌ kahandaꞌna.
Nodoaꞌ to nadumpingi dósángkuꞌ,
álána tiꞌara kubuku tekábáhá.
Kahandaꞌna dósángkuꞌ melumbuꞌ hangko i kahandaꞌna weluáꞌkuꞌ,
onoꞌ miꞌi haneꞌi tiꞌara piꞌi ara pehárungángkuꞌ.
Pekakae membiáꞌ tulungi
14 Ó PUEꞌ, kupembiáꞌ Nupelaeaꞌ wongkódóꞌá.
PUEꞌ, hawiáꞌmoꞌ mai Nutulungi.
15 Hampóáꞌworia tauna to moundeꞌ mopapateaꞌ
ina mahiliheꞌ, hai tiꞌara raisá kanoumbáꞌáraꞌ.
Hampóáꞌworia tauna to moundeꞌ moita kamarugiꞌkuꞌ
ina mosuliꞌheꞌ hai ina rapakóiꞌheꞌ tauna.
16 Hampóáꞌworia tauna to mongee-ngeeaꞌ
ina mahiliheꞌ ánti kamanangiraꞌ.
17 Hampóáꞌworia tauna to menómbá i Hio
ina góeꞌheꞌ ánti kaꞌIona.
Hampóáꞌworia tauna to mampokaꞌahiꞌKoꞌ ánti kaNupelaeraꞌ,
ina manguliꞌheꞌ oaꞌ: “PUEꞌ to makuasaꞌ!”
18 Kódóꞌ deꞌe tauna to i wóiꞌ tueꞌkuꞌ
hai maledeꞌaꞌ,
agáiáná Nukamataꞌaꞌ oaꞌ Pueꞌ.
Io miꞌi to motulungiaꞌ hai mampelae katueꞌkuꞌ.
Ó Pueꞌ Ala to kupenómbái,
ineeꞌKoꞌ mawewe motulungiaꞌ.