Pekakaena tauna to tiꞌara nalalu
41
I topoánti toponani. Nani to nakáráhi Daudiꞌ.
2 Morasiꞌ miꞌi tauna to maroꞌa laluna i tauna to meahiahiꞌ.
PUEꞌ ina mampelae tauna iti ane narampe kapári.
3 Ina nakámpái oaꞌ PUEꞌ
hai ina Nakádipurá katueꞌna.
Ia ina rauliꞌ tauna to morasiꞌ i duniáꞌ.
PUEꞌ tiꞌara mopatodáhi ewálina
ina mopamarugiꞌ.
4 PUEꞌ ina motulungi tauna iti tempóna tiꞌara nalalu.
Ia ina napakauriꞌ PUEꞌ.
5 Ane kódóꞌ, kuꞌuliꞌ: “Ó PUEꞌ, madósámoꞌ i Hio.
Kupembiáꞌ bona Nupatongawaꞌ kamaꞌahiꞌMu i kódóꞌ.
Nupakauriꞌaꞌ hangko i hakiꞌkuꞌ.”
6 Ewálingkuꞌheꞌ kadake laluitaraꞌ mokana i kódóꞌ, rauliꞌ:
“Impirá ina mate haneꞌi hangaꞌna ina rakáláliꞌá?”
7 I tempóraꞌ mai moweoꞌaꞌ, mampe to maroꞌa peheꞌ,
mole riꞌi tunggáiáraꞌ, mai peheꞌ mampeliꞌ kakadakengkuꞌ
haneꞌi lao rapolaluita iumbá-umbá peá.
8 Upu-upu tauna to mokáhihiꞌaꞌ
mombekuwi-kuwiheꞌ mokana i kódóꞌ.
Moliwoheꞌ mobábehi to kadake i kódóꞌ.
9 Rauliꞌ, “Hakiꞌna rumihi ntepuꞌu,
tiꞌara piꞌi ina mearó-aró.”
10 Mogalo riꞌi balengkuꞌ to kupoinálái,
to paka mandeꞌ hingkakani hai kódóꞌ,
ia miꞌi to mewaliꞌ ewálingkuꞌ.a
11 Ó PUEꞌ, kupembiáꞌ bona Nupokaꞌahiꞌaꞌ hai Nupakauriꞌaꞌ,
bona peisáꞌaꞌ moháwángi kakadakeraꞌ ewálingkuꞌ.
12 Kuisá góeꞌKoꞌ i kódóꞌ,
láwiꞌ tiꞌaraꞌaꞌ ranangi ewálingkuꞌ.
13 Ánti kabulána lalungkuꞌ, Nutulungiaꞌ.
Nupokanaꞌaꞌ tueꞌ hingkakani hai Io haweꞌ i rue-ruena.
14 Tetóiá miꞌi Pueꞌ Ala, PUEꞌraꞌ toSáráeliꞌ,
mantepuꞌu deꞌe-deꞌe haweꞌ i rue-ruena.
Noꞌonoꞌ miꞌi. Ami.