SURA KA-II
SURA PETÓIÁ 42–72
Pekakae i tampoꞌ karatawaniá
42
I topoánti toponani. Nani pepaturoꞌ to rakáráhi toKora.a
2 Nodo lagiwa to mangkadoꞌu mampoinao molámbiꞌ uwai to poili,
noꞌonoꞌ woꞌo kamabilangkuꞌ i Hio, Pueꞌ Ala.
3 Kuparaluu ntepuꞌuKoꞌ, Pueꞌ Ala to tueꞌ,
impirá kapeisáꞌángkuꞌ lao menómbá i TámbiMu?b
4 Maroꞌa mabaa ba káindi, teriaꞌaꞌ oaꞌ,
láwiꞌ hangalo-hangalo ewálingkuꞌ mokuneꞌaꞌ,
“Iumbá rikáꞌá Pueꞌ Ala to nupenómbái?”
5 Wiora lalungkuꞌ ane mambuhinaoaꞌ to liu miꞌi,
i tempóngkuꞌ molumao lao i támbina Pueꞌ Ala
mopaꞌara posusa hingkakani hai tauna to handaꞌ.
Kódóꞌ to molumao ioru motadulakoiheꞌ
mohoraꞌ-horaꞌ hai motóiá oaꞌ Pueꞌ Ala.
6 Moapa riꞌi haneꞌi wiora lalungkuꞌ?
Moapa riꞌi haneꞌi masusa lalungkuꞌ?
Rángina miꞌi mehárungáꞌaꞌ i Pueꞌ Ala.
Ina metóiá wopaꞌaꞌ i Hia.
Pueꞌ Ala to kupenómbái ina motulungiaꞌ.
7-8 I tampoꞌ karatawaniángkuꞌ, mapári ntepuꞌuaꞌ,
mewaliꞌ kubuhinaoKoꞌ, Pueꞌ.
Lalungkuꞌ mapári ntepuꞌu, láwiꞌ handaꞌ kapári to morampeaꞌ,
nodo pewoona tumata uwai Iarade
to moili hangko i buluꞌ Heremo hai buluꞌ Misa.
9 PUEꞌ mopatongawaꞌ kamaꞌahiꞌNa i tempó mabaa.
Káindi monanikaꞌaꞌ nani petóiá to mewaliꞌ pekakaengkuꞌ
i Pueꞌ Ala to mokámpái katueꞌkuꞌ.
10 Mekuneꞌaꞌ i Pueꞌ Ala, buluꞌ watu pengkatueꞌángkuꞌ,
“Moapa riꞌi haneꞌi Nukáláliꞌámoꞌ?
Moapa riꞌi haneꞌiaꞌ Nupatodáhi wiora
ánti karapopeahiahiꞌkuꞌ ewálingkuꞌ?”
11 Kamaháina lalungkuꞌ haweꞌ i buꞌu
láwiꞌ rapakóiꞌaꞌ oaꞌ ewálingkuꞌ.
Mekuneꞌheꞌ oaꞌ i kódóꞌ, rauliꞌ:
“Iumbá rikáꞌá Pueꞌ Ala to nupenómbái?”
12 Moapa riꞌi haneꞌi wiora lalungkuꞌ?
Moapa riꞌi haneꞌi masusa lalungkuꞌ?
Rángina miꞌi mehárungáꞌaꞌ i Pueꞌ Ala.
Ina metóiá wopaꞌaꞌ i Hia.
Pueꞌ Ala to kupenómbái ina motulungiaꞌ.