Pekakae membiáꞌ tulungi
39
I Iedutua topoánti toponani. Nani to nakáráhi Daudiꞌ.
2 Kuꞌuliꞌ i lalungkuꞌ, “Ina kukámpái rárá katueꞌkuꞌ,
bona ineeꞌaꞌ mohuwárá laluita to moántiaꞌ i lalu dósá.
Tiꞌaraꞌaꞌ mau molaluita
ane ara maniheꞌ tauna to kadake hungkuꞌ i kódóꞌ.”
3 Onoꞌ miꞌi haneꞌi tiꞌaraꞌaꞌ molaluita, maniiꞌ peaꞌ.
Mogalo laluita to maroꞌa, tiꞌara kuhuwárá,
agáiáná mantámbái peá kamapáringkuꞌ.
4 Masusa ntepuꞌu lalungkuꞌ.
Ane kupepekiri, napoka mantámbái riꞌi kamasusana lalungkuꞌ,
onoꞌ miꞌi haneꞌi molaluitaꞌaꞌ, kuꞌuliꞌ:
5 “Ó PUEꞌ, kupembiáꞌ bona Nupahaweꞌáꞌaꞌ impirá kaꞌina matengkuꞌ,
hangapa mani kamaruena ina araꞌaꞌ i duniáꞌ deꞌe,
bona kuisá ntepuꞌu katueꞌkuꞌ deꞌe hampaiꞌ peá.
6 Ó PUEꞌ, Nupakanótó miꞌi katueꞌkuꞌ hampaiꞌ peá.
I peitáMu, kamaruena katueꞌkuꞌ nodo to tiꞌaraꞌaꞌ ara.
Kamaruena katueꞌraꞌ tauna nodo peá petawueꞌna wui.
7 Kaiꞌ nodo peangkaiꞌ babaio to hawiáꞌ matántá.
Mamposisiákáꞌangkaiꞌ to mbero-mbero peá,
hai morámpuangkaiꞌ párewá ngkáduniáꞌ,
agáiáná tiꞌara kiꞌisá heáná to ina mampopueꞌ.
8 Deꞌe-deꞌe, apa to kupegiá hangko i Hio, Pueꞌ?
Mehárungáꞌaꞌ i Hio.
9 Kupembiáꞌ bona Nukábáháꞌaꞌ hangko i upu-upu salaꞌkuꞌ,
ineeꞌheꞌ Nupatodáhi tauna to tiꞌara mengkoruꞌ i Hio mopakóiꞌaꞌ.
10 Tiꞌaraꞌaꞌ molaluita, maniiꞌ peaꞌ,
láwiꞌ Io miꞌi to mohukuaꞌ.
11 Ó PUEꞌ, Nupakaraoꞌ pehukuMu deꞌe hangko i kódóꞌ.
Hungkuꞌaꞌ mate ánti pekámbáróáMu.
12 Nukámbáróá hai Nuhuku tauna ánti dósána.
Apa to naundeꞌ ntepuꞌu tauna, Nupamarugiꞌ,
nodo epiꞌ motátáꞌ badu to mababe.
Kamaruena katueꞌraꞌ tauna nodo peá petawueꞌna wui.
13 Ó PUEꞌ, kupembiáꞌ bona Nupehádingi pekakaengkuꞌ,
Nuhánikiaꞌ ane membiáꞌaꞌ tulungi.
Ineeꞌaꞌ Nupatodáhi peá ane teriaꞌaꞌ,
láwiꞌ kódóꞌ deꞌe nodo peaꞌ tohaweꞌ i Hio,
hibali hai upu-upu toiorungkuꞌ hangkoia.
14 Ineeꞌ wopaꞌaꞌ Nukabukoꞌi,
bona góeꞌaꞌ hangko tiꞌara maniaꞌ mate.”