Pekakaena tauna to maduꞌa
38
Nani to nakáráhi Daudiꞌ bona nabuhinao Pueꞌ i tempó mohuhuꞌ popenómbá.
2 Ó PUEꞌ, ineeꞌaꞌ Nukámbáróá,
hai ineeꞌaꞌ Nuhuku ánti kamabukoꞌMu.
3 PehukuMu haweꞌ miꞌi i kódóꞌ
nodo mata panaꞌ to motohuꞌaꞌ.
Nupamapáriaꞌ.
4 Tiꞌara mpuꞌu maroꞌa pehádingkuꞌ
ánti kamabukoꞌMu i kódóꞌ,
hai maꞌángkárá pantódihángkuꞌ
ánti dósángkuꞌ i Hio.
5 Upu-upu kamasalaꞌkuꞌ mombedumpingi álána moliungi wuáꞌkuꞌ,
nodo inánti to matimi ntepuꞌu i kódóꞌ.
6 Tobelángkuꞌ monanaꞌ hai humau
ánti kabebengkuꞌ.
7 Rumihi ntepuꞌu kamaduꞌangkuꞌ,
álána bungkuꞌ oaꞌ.
Alo-alona teriaꞌaꞌ láwiꞌ mapári ntepuꞌu kuhádi.
8 Hopeꞌkuꞌ mahái,
tiꞌara maroꞌa pehádingkuꞌ.
9 Maledeꞌ wátángkuꞌ hai upu róhóngkuꞌ,
meraruaꞌaꞌ ánti kamasusana lalungkuꞌ.
10 Ó Pueꞌ, Nuisá ntepuꞌu upu-upu peundeꞌána lalungkuꞌ.
Peraruaꞌkuꞌ tiꞌara tewuniángi i Hio.
11 Hulengkuꞌ moridiꞌ-ridiꞌ, róhóngkuꞌ upu,
mogalo riꞌi petótóingkuꞌ tiꞌara piꞌi makaaꞌ.
12 Upu-upu rángángkuꞌ, tiꞌara raundeꞌ hungkuꞌ i kódóꞌ,
malááꞌheꞌ napelimbái hakiꞌkuꞌ.
Mogalo riꞌi halalungkuꞌheꞌ mokaraohiaꞌ.
13 Tauna to moundeꞌ mopapateaꞌ
mobábehiheꞌ to ina mohurewukiaꞌ.
Tauna to mopári-pári mopakarugiꞌaꞌ,
mopakadakeaꞌ.
Tiꞌaraheꞌ mengkakaroo moliwo
peákálángiraꞌ i kódóꞌ.
14 Agáiáná kódóꞌ deꞌe nodoa tobongoꞌ, to tiꞌara mehádi,
nodoaꞌ tobebe, to tiꞌara peisá molaluita.
15 Toꞌu ntepuꞌu nodoaꞌ tauna to bongoꞌ,
maniiꞌ-niiꞌ peaꞌ, tiꞌaraheꞌ kuhániki.
16 Ó PUEꞌ, mehárungá ntepuꞌuaꞌ i Hio,
Io miꞌi to ina mohánikiaꞌ, Pueꞌ Ala Pueꞌkuꞌ.
17 Mekakaeaꞌ node: “Ineeꞌheꞌ Nupatodáhi ewálingkuꞌ góeꞌ
ánti kamapáringkuꞌ.
Ineeꞌheꞌ Nupatodáhi mampepemahile ane manawoꞌaꞌ.”
18 Hungkuꞌ ina upu pehárungángkuꞌ,
hangalo-hangalo mapári ntepuꞌu kuhádi.
19 Kupangákuꞌ kamasalaꞌkuꞌ,
dósángkuꞌ mopamasusa lalungkuꞌ.
20 Tauna to mampoewaliáꞌaꞌ, handaꞌ ntepuꞌuheꞌ.
Handaꞌheꞌ to mokáhihiꞌaꞌ, kehapiꞌ tiꞌara ara álásáraꞌ.
21 Kamaroꞌangkuꞌ raháwángi hai to kadake.
Hira mewaliꞌheꞌ ewálingkuꞌ, mole riꞌi kuꞌundeꞌ peá
mobábehi to maroꞌa i hira.
22 Ó PUEꞌ, ineeꞌaꞌ Nukálámbáhi,
PUEꞌ Ala to kupenómbái, ineeꞌaꞌ Nukaraohi.
23 KawiáꞌKoꞌ motulungiaꞌ,
láwiꞌ Io miꞌi Pueꞌ to mampelaeaꞌ.