Tawuekana tauna to kadake hai tauna to maroꞌa
37
Nanina Daudiꞌ.
Ineeꞌ karaoꞌ inaomu tempómu moita tauna mobábehi to kadake,
hai ineeꞌ kóiꞌ inaomu i tauna to mebagiuꞌ,
2 láwiꞌ tiꞌaraheꞌ ina marue i duniáꞌ deꞌe,
nodo rumpuꞌ hai tudaꞌ-tudaꞌ, ina kawiáꞌheꞌ malau.
3 Mepoináláimokoꞌ i PUEꞌ,
hai mobábehikoꞌ oaꞌ to maroꞌa.
Toroꞌkoꞌ i tampoꞌ to naweꞌimokoꞌ PUEꞌ,
hai tetidaꞌkoꞌ i Hia.
4 Góeꞌmokoꞌ i PUEꞌ,
hai Ia ina mopabukeꞌi apa peundeꞌána lalumu.
5 Nupaisarenga katueꞌmu i PUEꞌ,
mehárungákoꞌ i Hia, hai ina Natulungikoꞌ.
6 Ia ina mopatongawaꞌ katiꞌárámu masalaꞌ,
mewaliꞌ kamanótómu ina nodo pesupaꞌna alo
hai kabulána lalumu ina tongawaꞌ nodo pewangkaꞌna alo.
7 Nupatinda lalumu mampegiá PUEꞌ,
hai sabaraꞌkoꞌ mampegiá kaꞌina Natulungimu.
Ineeꞌ kóiꞌ inaomu ane tauna molámbiꞌ rasiꞌ
ánti kapebagiuꞌraꞌ.
8 Ineeꞌkoꞌ poloꞌ mabukoꞌ. Nukábáhá kamaꞌámuꞌmu.
Kamabukoꞌ iti mopaꞌara peá kamarugiꞌ.
9 Láwiꞌ tauna to mobábehi to kadake ina rapatuna,
agáiáná tauna to mehárungá i PUEꞌ
ina tueꞌheꞌ i tampoꞌ to Nadándiáheꞌ.
10 Tiꞌara piꞌi marue, tauna to kadake ina tuna.
Ane rapeliꞌheꞌ, tiꞌarapoheꞌ ina ralámbiꞌ.
11 Agáiáná tauna to mengkaiwóiꞌ
ina molámbiꞌheꞌ tampoꞌ sosora to nadándi PUEꞌ.
Ina góeꞌheꞌ láwiꞌ ina tueꞌheꞌ i lalu roꞌa ngkatueꞌ.
12 Tauna to kadake moliwo oaꞌ
mobábehi to kadake i tauna to manótó,
hai ane naitai, nakáhihiꞌ ntepuꞌu,a
13 agáiáná Pueꞌ mopatawai tauna to kadake iti,
láwiꞌ Naisá kaꞌina poloꞌraꞌ Nahuku.
14 Tauna to kadake mopatimama pihoꞌ hai panaꞌraꞌ,
ina mopapate tauna to meahiahiꞌ
hai tauna to manótó laluraꞌ.
15 Agáiáná tauna to kadake iti
ina mate natohuꞌ pihoꞌraꞌ haduduáraꞌ,
hai panaꞌraꞌ ina ratepóꞌ.
16 Maroꞌa mani hantóiꞌ peá párewá i tauna to manótó,
haneꞌi handaꞌ i tauna to kadake,
17 láwiꞌ kuasaꞌna tauna to kadake ina napopengkaroo PUEꞌ
agáiáná tauna to manótó Nakámpái.
18 PUEꞌ mokámpái katueꞌraꞌ tauna to manótó,
hai tampoꞌ to naweꞌiheꞌ PUEꞌ mewaliꞌ sosoraraꞌ
ina rakatoroꞌi haweꞌ i rue-ruena.
19 I tempó kapári, tiꞌaraheꞌ ina mahili,
mogalo riꞌi i tempó rimi, ina mabuhuheꞌ.
20 Agáiáná tauna to kadake ina tunaheꞌ,
ewálina PUEꞌ ina nodoheꞌ katueꞌna bungaꞌ i pádá,
ina matántáheꞌ nodo rámbu.
21 Tauna to kadake moundeꞌ peá mebolo,
tiꞌara raisá mampopesuleꞌ,
agáiáná tauna to manótó moisá mampeweꞌi i kabulána laluna.
22 Tauna to nawátiꞌ PUEꞌ ina mewaliꞌheꞌ pueꞌ sosora
tampoꞌ to Nadándiáheꞌ,
agáiáná tauna to nakambo PUEꞌ, ina Napatunaheꞌ.
23 PUEꞌ moteteꞌ tauna i rárá to toꞌu,b
hai katueꞌna tauna to Napogóeꞌ Nakámpái.
24 Kehapiꞌ miꞌi tehube, tiꞌara haweꞌ tepámbáká
láwiꞌ PUEꞌ to motibaaꞌ taeraꞌ.
25 Hangko i kamaleheꞌángkuꞌ haweꞌ i kasaeángkuꞌ,
tiꞌara haweꞌ hangkani kuita tauna to manótó nakálámbáhi PUEꞌ,
ba pemuleꞌána mewaliꞌheꞌ topembiáꞌ-mbiáꞌ.
26 I alo-alona tauna to manótó iti mopatongawaꞌ kamaꞌahiꞌna
hai timama rapeboloi.
Pemuleꞌánaheꞌ rarekeꞌ pewátiꞌ.
27 Nukábáhá miꞌi bábehiá to kadake, hai nubábehi to maroꞌa,
bona io hai pemuleꞌámuheꞌ ina mokatoroꞌikou tampoꞌ
to nadándi PUEꞌ mewaliꞌ tampoꞌmi haweꞌ i rue-ruena.
28 Láwiꞌ PUEꞌ mampogóeꞌ tauna to mobábehi to maroꞌa hai hintotoꞌ,
tauna to tetidaꞌ i Hiac tiꞌara ina Napálehi.
Ina Nakámpáiheꞌ haweꞌ i rue-ruena,
agáiáná pemuleꞌána tauna to kadake ina Napatunaheꞌ.
29 Tauna to manótó
ina mampososoraheꞌ tampoꞌ to nadándi miꞌi PUEꞌ,
hai ina rakatoroꞌi tampoꞌ iti haweꞌ i rue-ruena.
30 Tauna to manótó mohuwárá laluita to bukeꞌ pekiri,
hai upu-upu to rapahaweꞌ iti hintotoꞌ.
31 Paturoꞌna Pueꞌ Ala rapailalu ntepuꞌu,
hai tiꞌaraheꞌ mopálehi rárá to toꞌu.
32 Tauna to kadake molelematai tauna to manótó,
hai mampeliꞌheꞌ rárá ina mopapateheꞌ.
33 Agáiáná PUEꞌ tiꞌara ina mopatodáhi tauna to manótó
manawoꞌ i taeraꞌ tauna to kadake,
ba rahuku i tempóna kara-kararaꞌ rabutusi.
34 Mehárungámokoꞌ i PUEꞌ,
hai mampeuláꞌikoꞌ ráráNa.
Ia ina mampomahilekoꞌ,
álána mewaliꞌkoꞌ pueꞌ sosora tampoꞌ to Nadándi.
Ina nuita tauna to kadake rapatuna.
35 Hangkoia kuita hadua tauna to kadake hai maseke.
Maroꞌa katueꞌna nodo kau to mapángkáꞌ.d
36 Agáiáná tempóngkuꞌ melempó wopiꞌi ionoꞌ,
ia tiꞌara piꞌi ara.
Kehapiꞌ kupeliꞌ, tiꞌara piꞌi kulámbiꞌ.
37 Nupailalu tauna to manótó hai to tiꞌara tesalaꞌi,
láwiꞌ tauna to moundeꞌ modame ina araheꞌ oaꞌ.
38 Agáiáná tauna to madósá ina rapatuna,
hai pemuleꞌáraꞌ tauna to kadake iti tiꞌara ina ara oaꞌ.
39 PUEꞌ mampelae tauna to manótó,
Ia pengkatueꞌáraꞌ i tempó mapári.
40 PUEꞌ motulungi hai mopelaeheꞌ.
Ia mokábáháheꞌ hangko i taeraꞌ tauna to kadake,
láwiꞌ katueꞌraꞌ rapaisarenga i Hia.