Kakadakena tauna hai kamaroꞌana Pueꞌ Ala
36
I topoánti toponani. Nanina Daudiꞌ huoꞌána PUEꞌ.
2 Dósá mokale i laluna tauna to kadake,
tiꞌara naisá malááꞌ i Pueꞌ Ala.
3 Ia mampepemahile,
álána tiꞌara piꞌi nahádiá kamasalaꞌna,a
ba mokáhihiꞌ dósána haduduána.
4 Upu-upu to nahuwárá kadake hai bukeꞌ peákálángi,
tiꞌara piꞌi manótó laluna, hai ia tiꞌara piꞌi mobábehi to maroꞌa.
5 Hangko tiꞌara mani letaꞌ, ia moliwo oaꞌ mobábehi to kadake.
Upu-upu to nabábehi, tiꞌara ara to maroꞌa.
Ia tiꞌara mau mengkaroo mobábehi to kadake.
6 Ó PUEꞌ, kamaꞌahiꞌMu nodo kamapángkáꞌna langiꞌ,
hai katetidaꞌMu haweꞌ i wongko gawu.
7 KamaroꞌaMu mapángkáꞌ nodo buluꞌ,
hai pobutusiMu hintotoꞌ nodo kakaladuna tahiꞌ.
Ó PUEꞌ, Io miꞌi to mokádipurá tauna hai binataꞌ.
8 Pueꞌ Ala, maroꞌa ntepuꞌu kamaꞌahiꞌMu to tiꞌara mokahópóꞌá.
Tauna mengkatueꞌ i Hio nodo ánáꞌ manuꞌ to naóbóki inána.
9 Mandeꞌheꞌ haweꞌ mabuhu mampopengaa pandeꞌ
to Nupatimamaꞌáheꞌ i támbiMu,b
hai góeꞌheꞌ láwiꞌ mainuheꞌ hangko i uwai
to moánti pewátiꞌ hangko i Hio.
10 Io miꞌi pentóáꞌána katueꞌna hinángkáꞌna to ara.
Io miꞌi to mowangkaꞌiangkaiꞌ,
bona tueꞌangkaiꞌ i lalu pewangkaꞌMu.
11 Hampóáꞌworia kamaꞌahiꞌMu tiꞌara mokahópóꞌá
i tauna to moisáKoꞌ,
hai ina Nupatongawaꞌ oaꞌ kamanótóMu
i tauna to bulá laluraꞌ.
12 Ineeꞌ Nupatodáhi tauna to mampepemahile moewaꞌaꞌ,
hai ineeꞌ woꞌo Nupatodáhi tauna to kadake mowuraꞌaꞌ.
13 Peita, tauna to mobábehi to kadake manawoꞌmoheꞌ,
tepámbákáheꞌ, hai tiꞌarapoheꞌ peisá mearó.