Pekakae membiáꞌ tulungi
35
Nani to nakáráhi Daudiꞌ.
Ó PUEꞌ, kupembiáꞌ bona Nuewaꞌheꞌ tauna to moewaꞌaꞌ.
Nupombealaꞌáheꞌ tauna to mampombealaꞌáꞌaꞌ.
2 Kupembiáꞌ bona Nutibaaꞌ lábáMu,
haneꞌiaꞌ Nutulungi.
3 Nubutuꞌ miꞌi pihoꞌMu hai Nutibaaꞌ tawalaꞌMu,
bona moewaꞌKoꞌ tauna to modápáꞌaꞌ.
Kupembiáꞌ bona Io Pueꞌ mohángáꞌáꞌáꞌaꞌ,
“Kódóꞌ miꞌi deꞌe to mampelaekoꞌ.”
4 Kuhárungá ina Nunangi tauna to mampoinao mopapateaꞌ,
hai Nupamahiliheꞌ.
Nupawuliheꞌ tauna to himpudu ina mopakarugiꞌaꞌ,
áláraꞌ mosuliꞌ hangko i kódóꞌ.
5 Nupatodáhiheꞌ tekámburá melangka nadápáꞌ Malaꞌekana PUEꞌ,
nodo kungku to nahimbáróká wui.
6 Nupatodáhiheꞌ nadápáꞌ Malaꞌekana PUEꞌ
i rárá to maleluru hai makáindi.
7 Ewálingkuꞌ motáꞌá heáꞌ bona kódóꞌ to kana,
hai mokaeheꞌ taroboꞌ bona manawoꞌaꞌ,
mole riꞌi tiꞌara ara salaꞌkuꞌ
to mewaliꞌ álásáraꞌ mobábehi noꞌonoꞌ.
8 Nupatodáhiheꞌ narampe kapári to tiꞌara raisá-isá,
Nupatodáhiheꞌ kana heáꞌ to ratáꞌá haduduáraꞌ,
hai Nupatodáhiheꞌ manawoꞌ i taroboꞌ to rakae haduduáraꞌ áláraꞌ mate.
9 Agáiáná kódóꞌ, ina góeꞌaꞌ ánti apa to nabábehi PUEꞌ,
láwiꞌ Ia to mampelaeaꞌ.
10 Hangko i lalungkuꞌ ntepuꞌu kuꞌuliꞌ,
“PUEꞌ, tiꞌara ara to hibali hai Io!
Io mokábáháKoꞌ tauna to i wóiꞌ tueꞌraꞌ
hangko i kuasaꞌraꞌ tauna to maróhó ntepuꞌu,
hai Nukámpáiheꞌ tauna to meahiahiꞌ hai mapári tueꞌraꞌ
hangko i tauna to mampopeahiahiꞌheꞌ.”
11 Sabiꞌ to kadake meángkáꞌheꞌ moewaꞌaꞌ,
agáiáná tiꞌara kuisá apa-apa mokana i apa to rasalaꞌiáꞌaꞌ.
12 Kamaroꞌangkuꞌ raháwángi hai to kadake,
mewaliꞌ masusa ntepuꞌu lalungkuꞌ.
13 Agáiáná i tempóna ewálingkuꞌ iti tiꞌara ralalu,
kupakeꞌ waruꞌ karuꞌ tandaꞌ kawiorangkuꞌ,
hai tiꞌaraꞌaꞌ mau mandeꞌ.
Mengkaiwóiꞌaꞌ mekakae i PUEꞌ,
14 nodoaꞌ mampekakaeá halalungkuꞌ
ba tauna to kupobale.
Motóngkóꞌaꞌ moteriahiheꞌ nodoaꞌ moteriahi inángkuꞌ.
15 Agáiáná i tempóngkuꞌ mapári, góeꞌheꞌ
hai himpuduheꞌ moewaꞌaꞌ.
Mogalo riꞌi tauna to tiꞌara kuisá mopakóiꞌaꞌ oaꞌ.a
16 Rangee-ngeeaꞌ oaꞌ,
hai rakáhihiꞌaꞌ.b
17 Ó Pueꞌ, hangapa mani kamaruena
Nupatodáhiheꞌ ewálingkuꞌ noꞌonoꞌ?
Nupelaeaꞌ wongkódóꞌá hangko i kakadakeraꞌ i kódóꞌ.
Hira nodoheꞌ singá to ina mohakaꞌaꞌ,
mewaliꞌ kupembiáꞌ Pueꞌ bona Nutulungiaꞌ.
18 Hangko ionoꞌ, ina monanikaꞌaꞌ nani petóiá
i tangaꞌ-tangaꞌraꞌ taunáMu,
hai ina kutóiá hangaꞌMu
i tempóraꞌ tauna to handaꞌ moromu-romu.
19 Ineeꞌheꞌ Nupatodáhi ewálingkuꞌ góeꞌ mosasalaꞌiaꞌ
i tempóngkuꞌ mapári,
kehapiꞌ tiꞌara ara álásáraꞌ.
Ineeꞌaꞌ Nupatodáhi rapakóiꞌ tauna to mokáhihiꞌaꞌ,
kehapiꞌ tiꞌara ara ntóáꞌna.
20 Polaluitaraꞌ tiꞌara moánti podame,
hai mopaꞌaraheꞌ liwo ina mobagiuꞌheꞌ tauna
to maróhó pohintuwuꞌraꞌ i tampoꞌraꞌ.
21 Molaluitaheꞌ rapamahárá.
Rasalaꞌiaꞌ, rauliꞌ, “Kiꞌita miꞌi apa to nubábehi.”
22 Agáiáná Io PUEꞌ, Nuita miꞌi apa to kubábehi.
Ineeꞌaꞌ wongkódóꞌá Nupengkaniika.
Ó Pueꞌ, ineeꞌKoꞌ karaoꞌ hangko i kódóꞌ.
23 Ó Pueꞌ, kupembiáꞌ bona Nupeámpáráiaꞌ i kara-karangkuꞌ.
Io miꞌi Pueꞌ Ala Pueꞌkuꞌ, mewaliꞌ Nupelaeaꞌ.
24 Ó Pueꞌ Ala PUEꞌkuꞌ, kupembiáꞌ bona Nubutusi kara-karangkuꞌ,
láwiꞌ Io miꞌi to manótó potimbáMu.
Ineeꞌ Nupatodáhi ewálingkuꞌ mampogóeꞌ kamanangingkuꞌ.
25 Ineeꞌheꞌ Nupatodáhi manguliꞌ i laluraꞌ,
“Maroꞌa! Mewaliꞌ miꞌi peundeꞌántaꞌ,”
ba manguliꞌ, “Ia maꞌala miꞌi tapapate.”
26 Nupatodáhiheꞌ tauna to góeꞌ ánti kamapáringkuꞌ,
mewaliꞌheꞌ wuli hai mahili.
Nupatodáhiheꞌ tauna to maꞌángkáꞌ i kódóꞌ,
rapakóiꞌ hai rapakahiliá.
27 Hampóáꞌworia tauna to moundeꞌ katiꞌárángkuꞌ masalaꞌ rapatongawaꞌ,
ina mohoraꞌ-horaꞌheꞌ ánti kagóeꞌraꞌ.
Kuhárungá ina rahuleꞌ-huleꞌ manguliꞌ:
“Toꞌu ntepuꞌu kamahilena kuasaꞌna PUEꞌ.
Ia moundeꞌ taunáNa tueꞌ i lalu roꞌa ngkatueꞌ.”
28 Mewaliꞌ ina kubámbári kamanótóna pobutusiMu,
hai ina kutóiáKoꞌ oaꞌ.