Pekámpáina PUEꞌ
34
Nanina Daudiꞌ mokana i tempóna mampe to magila, bona rawura hangko i tampoꞌna Abimeleꞌ daturaꞌ toPelisitiꞌ.a
2 Ina kuꞌuliꞌ oaꞌ handaꞌ kamaroꞌana i PUEꞌ,
hai tiꞌaraꞌaꞌ ina mengkakaroo motóiá PUEꞌ.
3 Ánti upu-upu to nabábehi PUEꞌ, ina kupomahile.
Hampóáꞌworia ina rahádi tauna to rapamapári
haneꞌi góeꞌheꞌ.
4 Maikeꞌ motóiá PUEꞌ hingkakani,
maimokeꞌ hingkakani mampomahile hangaꞌNa.
5 Mekakaeaꞌ i Hia hai Ia mohánikiaꞌ,
Nakábáháꞌaꞌ hangko i upu-upu to melááꞌ-lááꞌi.
6 Tauna to mehárungá i Hia ina góeꞌheꞌ,
tiꞌaraheꞌ ina mahili.
7 Tauna to rapamapári deꞌe meraruaꞌ i PUEꞌ, haneꞌi Nahániki,
hai Nakábáhá hangko i upu-upu kamapárina.
8 Malaꞌekana PUEꞌ mokámpái tauna to mengkoruꞌ i Hia,
hai Nakábáháheꞌ hangko i apa to ina morampeheꞌ.
9 Nipepekiri kamaroꞌana PUEꞌ, bona nihádiá ntepuꞌu kamaroꞌaNa iti.
Morasiꞌ miꞌi tauna to mopaisarenga katueꞌraꞌ i PUEꞌ.
10 Kómu upu-upu tauna to tetidaꞌ i PUEꞌ,b mengkoruꞌmokou i Hia,
láwiꞌ tauna to mengkoruꞌ i Hia, tiꞌara ina ara kamakuraꞌraꞌ.
11 Mogalo riꞌi singá,
marimiheꞌ ánti kamakuraꞌna pandeꞌraꞌ,
agáiáná tauna to mehárungá i PUEꞌ,
tiꞌara ina ara kamakuraꞌraꞌ hampákáꞌ to maroꞌa.
12 Maimokou upu-upu topegurungkuꞌ,c nipehádingi apa to ina kuꞌuliꞌ.
Ina kupaturoꞌákou noumbá rárána mengkoruꞌ i PUEꞌ.
13 Heáná paꞌi to moundeꞌ matinuwuꞌ
hai moundeꞌ mohádiá apa to maroꞌa?
14 Hangaa-ngaa nikámpái polaluitami,
hai ineeꞌ niundeꞌ mebagiuꞌ.
15 Nikaraohi bábehiá to kadake hai nibábehi bábehiá to maroꞌa.
Nipári-pári ntepuꞌu mampeliꞌ podame.
16 PUEꞌ mokamata hai mokámpái tauna to manótó.
Napehádingiheꞌ ane membiáꞌheꞌ tulungi i Hia.
17 PUEꞌ moewaꞌ tauna to mobábehi bábehiá to kadake,
hai Napatunaheꞌ hangko i duniáꞌ bona tiꞌarapoheꞌ rabuhinao.
18 Ane tauna to manótó iti meraruaꞌheꞌ i PUEꞌ
ina Napehádingiheꞌ,
hai ina Nakábáháheꞌ hangko i upu-upu kamapáriraꞌ.
19 PUEꞌ hungkuꞌ i tauna to tiꞌara ara pehárungáraꞌ,
hai motulungi tauna to masusa laluraꞌ.
20 Handaꞌ ntepuꞌu kapári to morampe tauna to manótó,
agáiáná ina nakábáháheꞌ PUEꞌ hangko i upu-upuna iti.
21 Wátáraꞌ ina nakámpái PUEꞌ,
tiꞌara ara haweꞌ hambuaꞌ buꞌuraꞌ to matepóꞌ.d
22 Tauna to kadake ina mate ánti bábehiáraꞌ to kadake,
hai heáná peá to mokáhihiꞌ tauna to manótó ina rahuku.
23 PUEꞌ mopelae huoꞌáNaheꞌ,
hai upu-upu tauna to mohárungá pekámpáiNa,
tiꞌaraheꞌ ina molámbiꞌ pehuku.