Nani petóiá i Pueꞌ Alaraꞌ toSáráeliꞌ
33
Niponani nani kagóeꞌ, kómu to manótó i peitána PUEꞌ,láwiꞌ hintotoꞌ ntepuꞌu tauna to manótó metóiá i Pueꞌ.
2 Niponani nani petóiá i PUEꞌ,
niuláꞌ kasapi hai gambusuꞌ.
3 Niponani nani to woꞌu i Hia,
nikáwiꞌ miꞌi kasapi nipakarasa,
hai mohoraꞌ-horaꞌkou ánti kagóeꞌmi.
4 Ngkóráꞌna PUEꞌ iti toꞌu hai peisá rapoinálái,
hai upu-upu to Nabábehi mopatongawaꞌ katetidaꞌNa i tauna.
5 Ia moundeꞌ ntepuꞌu kahintimbá hai pobutusi to manótó.
Upu-upu to i duniáꞌ mohádiá kamaꞌahiꞌNa to tiꞌara madepuꞌ-depuꞌ.
6 PUEꞌ mongkóráꞌ peá, hai kásáliu mewaliꞌ miꞌi langiꞌ.
Ia molaluita peá, mewaliꞌ miꞌi upu-upu betue to ara i langiꞌ.
7 Ia morámpu tahiꞌ nodo uwai to rawuhuꞌ,
hai tahiꞌ to kaladu ntepuꞌu, ara woꞌo katoroꞌána.
8 Hampóáꞌworia upu-upu to i duniáꞌ mengkoruꞌ i PUEꞌ,
hampóáꞌworia upu-upu tauna mebiláꞌ i Hia,
9 láwiꞌ Ia mongkóráꞌ peá, upu-upu to i duniáꞌ mewaliꞌ,
hai ánti párentáNa iti, hinángkáꞌna ara.
10 PUEꞌ mopakanótó bona poliworaꞌ tauna i duniáꞌ
hai tunggáiáraꞌ tiꞌara mewaliꞌ.
11 Agáiáná poliwona PUEꞌ mewaliꞌ haweꞌ i rue-ruena,
tunggáiána laluNa ina mewaliꞌ haweꞌ-haweꞌ i pemuleꞌána tauna.
12 Morasiꞌmoheꞌ tauna to mopangákuꞌ
PUEꞌ ia miꞌi Pueꞌ Ala to rapenómbái.
Morasiꞌmoheꞌ tauna to Napileꞌi mewaliꞌ taunáNa haduduáNa.
13 PUEꞌ mampetiro mai hangko i surugáꞌ,
Ia moita upu-upu tauna.
14 Hangko i pehodaꞌá kadatuáNa,
Ia moita upu-upu tauna to toroꞌ i duniáꞌ.
15 Ia to mampoweꞌi pekiriraꞌ tauna,
hai Ia woꞌo to mampeita upu-upu to rabábehi.
16 Datu tiꞌara ina tepelae ánti kahandaꞌraꞌ surudadoꞌna.
Tauna to keate tiꞌara ina tetulungi ánti kamaróhóna haduduána.
17 Dárá tiꞌara peisá rahárungá bona menangi i pombeala,
kehapiꞌ miꞌi malingkátiꞌ hai maróhó ntepuꞌu, tiꞌara peisá mepelae.
18 Agáiáná PUEꞌ mokámpáiheꞌ tauna to mengkoruꞌ i Hia,
hai tauna to mehárungá i kamaꞌahiꞌNa to tiꞌara madepuꞌ-depuꞌ.
19 Ia mampelae taunaheꞌ iti hangko i kapate,
hai katueꞌraꞌ Nakádipurá i tempó rimi.
20 Mehárungákeꞌ i PUEꞌ,
Ia miꞌi to motulungi hai mokámpáikeꞌ.
21 Góeꞌ-góeꞌkeꞌ ánti kaꞌIana miꞌi Pueꞌtaꞌ,
hai Ia peisá rapoinálái láwiꞌ Ia to magasaꞌ.
22 Ó PUEꞌ, hampóáꞌworia Nupatongawaꞌ oaꞌ kamaꞌahiꞌMu i kaiꞌ,
láwiꞌ mehárungáꞌangkaiꞌ i Hio.