Kagóeꞌraꞌ tauna to naꞌámpungi Pueꞌ Ala
32
Nanina Daudiꞌ. Nani pepaturoꞌ.
Morasiꞌ miꞌi tauna to teámpungi miꞌi dósána,
hai kamoliungina peundeꞌána Pueꞌ Ala tewoe miꞌi.
2 Morasiꞌ miꞌi tauna to tiꞌara moundeꞌ mebagiuꞌ,
hai kamasalaꞌna tiꞌara piꞌi naimbaꞌ PUEꞌ.
3 Hangko tiꞌara maniaꞌ mopangákuꞌ dósángkuꞌ,
mantámbái kamaledeꞌkuꞌ,
láwiꞌ alo-alona meraruaꞌaꞌ oaꞌ.
4 Maroꞌa mabaa ba káindi, maꞌángkárá oaꞌ pehádingkuꞌ
láwiꞌ Nuhukuaꞌ PUEꞌ.
Róhóngkuꞌ upu nodo uwai to maꞌáti nahimbaꞌi alo.
5 Hangko ionoꞌ, kupangákuꞌ dósángkuꞌ i Hio,
hai salaꞌkuꞌ tiꞌara kuwuniángi.
Kuꞌuliꞌ, “Ina kupangákuꞌ i PUEꞌ upu-upu salaꞌkuꞌ láwiꞌ masalaꞌaꞌ,”
agáiáná Io PUEꞌ moámpungi kamasalaꞌkuꞌ ánti dósángkuꞌ.
6 Onoꞌ miꞌi haneꞌi kuhárungá upu-upu tauna to tetidaꞌ i Hio,
ina mekakaeheꞌ i Hio lántuꞌána ara mani tempó.
Ane noꞌonoꞌi, ane narampeheꞌ handaꞌ kapári,
bateꞌna tiꞌaraheꞌ ina napahurewuꞌ.
7 Io nodoKoꞌ pebuniángkuꞌ,
Nukámpáiaꞌ i tempó kapári.
Onoꞌ miꞌi haneꞌi monaniaꞌ nani kagóeꞌ
ánti kaNupelaengkuꞌ.
8 Nauliꞌ Pueꞌ, “Ina Kupaturoꞌkoꞌ hai Kuteteꞌkoꞌ
bona nuisá noumbá rárá katueꞌmu.
Ina Kuponóntóákoꞌ,
hai ina Kukámpáikoꞌ.
9 Ineeꞌkoꞌ nodo dárá to tiꞌara ara pekirina,
to paraluu rasamakuꞌ hai gulaꞌ
bona mengkoruꞌ i hio.”
10 Handaꞌ kapári to ratódihá tauna to kadake,
agáiáná tauna to mehárungá i PUEꞌ,
ina nakámpáiheꞌ oaꞌ kamaꞌahiꞌNa to tiꞌara madepuꞌ-depuꞌ.
11 Ee, upu-upukou to mouláꞌ peundeꞌána PUEꞌ!
Góeꞌ-góeꞌmokou ánti upu-upuna to Nabábehi.
Kómu to manótó i peitáNa,
nitóiá miꞌi PUEꞌ.