Pekámpáina Pueꞌ
31
I topoánti toponani. Nani to nakáráhi Daudiꞌ.
2 Ó PUEꞌ, mengkatueꞌaꞌ i Hio.
Ineeꞌ mpiiꞌaꞌ Nupatodáhi rapakahiliá.
Nupelaeaꞌ mouláꞌ popakanótóMu to hintotoꞌ.
3 Nupehádingiaꞌ Pueꞌ.
Hawiáꞌaꞌ wongkódóꞌá Nukábáháꞌ,
láwiꞌ Io nodoKoꞌ buluꞌ watu to kupengkatueꞌi,
hai mewaliꞌKoꞌ nodo bente to maróhó to mampelae katueꞌkuꞌ.
4 Io miꞌi pengkatueꞌángkuꞌ hai pengkatiháláꞌángkuꞌ,
hai Io miꞌi to mamporángá hai moteteꞌaꞌ i lalu katueꞌkuꞌ
ánti kamahilena hangaꞌMu.
5 Io miꞌi to mampelaeaꞌ hangko i apa to ina mopahurewuꞌaꞌ
to rabábehi tauna to kadake i kódóꞌ,
láwiꞌ Io miꞌi pengkatueꞌángkuꞌ.
6 Ó PUEꞌ, kupaisarenga peinaongkuꞌ i Hio.a
Io PUEꞌ Ala to peisá rapoinálái mokábáháꞌaꞌ.
7 Tauna to mehárungá i ánitu to tiꞌara ara bunduꞌna, Nukáhihiꞌheꞌ,
agáiáná kódóꞌ, mepoináláiaꞌ oaꞌ i Hio PUEꞌ.
8 Ina góeꞌ ntepuꞌuaꞌ motóiáKoꞌ
ánti kamaꞌahiꞌMu to tiꞌara madepuꞌ-depuꞌ,
láwiꞌ Nupeita miꞌi kamapáringkuꞌ,
hai Nupehaileki oaꞌ kamasusana lalungkuꞌ.
9 Tiꞌaraꞌaꞌ Nuhuhuꞌ i taeraꞌ ewálingkuꞌ,
agáiáná Nupelaemoꞌ hangko i to ina mopahurewuꞌaꞌ.
10 Ó PUEꞌ, Nupokaꞌahiꞌaꞌ, láwiꞌ maꞌángkárá kuhádi.
Wiora ntepuꞌu lalungkuꞌ,
mátángkuꞌ motauꞌ láwiꞌ teriaꞌaꞌ ánti kapári to morampeaꞌ.
11 Kapári tiꞌara mengkakaroo i lalu katueꞌkuꞌ,
hai pare-pare to kupolumaoi bukeꞌ oaꞌ hai pantódihá.
Ánti kamapáringkuꞌ, róhóngkuꞌ upu,
hai buꞌungkuꞌ nodo to maledeꞌ.
12 Upu-upu ewálingkuꞌ motitibeiaꞌ,
mogalo tauna to toroꞌ hungkuꞌ i kódóꞌ, maringkuꞌheꞌ.
Rapotingkáráꞌ ntepuꞌu tauna to mokaisángaꞌaꞌ,
mogalo riꞌi tauna to moitaꞌaꞌ i rárá, melangkaheꞌ.
13 Rakáláliꞌámoꞌ tauna nodoheꞌ mokáláliꞌá tomate.
Katueꞌkuꞌ nodo peá párewá to marugiꞌ to tiꞌara piꞌi mobunduꞌ.
14 Kuhádi tauna mokuwi-kuwi.
Iumbá-umbá peá kuhádi to mepopalááꞌ
láwiꞌ ewálingkuꞌ himpuduheꞌ ina mopamarugiꞌaꞌ,
rapoinao ina mopapateaꞌ.
15 Agáiáná kódóꞌ, mehárungá peaꞌ i Hio PUEꞌ
láwiꞌ Io miꞌi Pueꞌ Ala to kupenómbái.
16 Katueꞌkuꞌ ara i lalu taeMu,b
Nukábáháꞌaꞌ wongkódóꞌá hangko i taeraꞌ ewálingkuꞌ to modápáꞌaꞌ.
17 Kupembiáꞌ bona Nupogóeꞌaꞌ hawiꞌMu,
hai Nupelaeaꞌ ánti kamaꞌahiꞌMu to tiꞌara mokahópóꞌá.
18 Ó PUEꞌ, ineeꞌaꞌ Nupatodáhi rapakahiliá,
láwiꞌ meraruaꞌaꞌ i Hio.
Ngkáliꞌna riꞌi Nupatodáhiheꞌ tauna to kadake ina rapakahiliá,
hai Nupamaniiꞌheꞌ i duniáꞌraꞌ tomate.
19 Nutuko humeraꞌ tauna to paka mohuwárá dongkoꞌ,
to maꞌángkáꞌ hai paka motitibei tauna to manótó.
20 Handaꞌ ntepuꞌu pewátiꞌ to Nupatimamaꞌáheꞌ
tauna to mengkoruꞌ i Hio,
hai upu-upu iti Nuweꞌimoheꞌ tauna to mengkatueꞌ i Hio.
Nuwátiꞌheꞌ i lindoꞌraꞌ tauna ntániꞌna.
21 Nuwuniheꞌ i kaꞌaraꞌáMu
hangko i poliworaꞌ tauna to kadake.
Nukámpáiheꞌ i lalu kamakuasaꞌMu
hangko i tauna to ina mosalaꞌiheꞌ.
22 Tetóiá miꞌi PUEꞌ
láwiꞌ Ia mopatongawaꞌ oaꞌ kamaroꞌana ahiꞌNa
i tempóngkuꞌ ralibuꞌ ewálingkuꞌ.
23 Ánti kapipona miꞌi pekiringkuꞌ,
kuꞌuliꞌ riꞌi Nutibemoꞌ hangko i lindoꞌMu,
mole katoꞌuána pembiáꞌkuꞌ Nupehádingi
i tempóngkuꞌ membiáꞌ tulungi i Hio.
24 Kómu to tetidaꞌ i PUEꞌ,c hangaa-ngaa nipomahile,
láwiꞌ PUEꞌ mokámpái tauna to tetidaꞌ i Hia,
agáiáná upu-upu tauna to mampepemahile,
Nahukuheꞌ hai pehuku to hintotoꞌ.
25 Kómu upu-upu tauna to mehárungá i PUEꞌ,
nipakaróhó lalumi hai tetidaꞌmokou i Hia.