Nani kagóeꞌ i Pueꞌ láwiꞌ Ia mopelaekeꞌ
30
Nani penómbá to raponani i tempó posusa pewátiꞌ pewaliꞌna Támbina Pueꞌ Ala. Nanina Daudiꞌ.
2 Ó PUEꞌ, ina kupomahileKoꞌ láwiꞌ Nupelaeaꞌ,
hai tiꞌaraheꞌ Nupatodáhi ewálingkuꞌ góeꞌ ánti kamanangingkuꞌ.
3 PUEꞌ Ala Pueꞌkuꞌ, meraruaꞌaꞌ i Hio membiáꞌ tulungi
hai Nupakauriꞌmoꞌ.
4 PUEꞌ, Nuoreꞌmoꞌ hangko i duniáꞌraꞌ tomate,
tiꞌaraꞌaꞌ Nupatodáhi ina mate.
5 Ee upu-upu tauna to tetidaꞌ i PUEꞌ,a
mamponanimokou nani petóiá i Hia,
hai nipomahile Pueꞌ to magasaꞌ,
6 láwiꞌ kamabukoꞌNa hampaiꞌ peá,
agáiáná kamaꞌahiꞌNa ina ara oaꞌ duuꞌna i rue-ruena.
Kehapiꞌaꞌ teriaꞌ hambengiá,
agáiáná ane mepulo miꞌi, ina góeꞌ wopaꞌaꞌ.
7 Tempóna maroꞌa-roꞌa katueꞌkuꞌ, kuꞌuliꞌ,
“Ina maróhóaꞌ oaꞌ haweꞌ i rue-ruena.”
8 Ó PUEꞌ, ánti kamaroꞌaMu i kódóꞌ,
onoꞌ miꞌi haneꞌi Nupoweꞌiaꞌ róhó nodo buluꞌ to mahile.b
Agáiáná roo onoꞌ, Nutaleukiaꞌ,
mewaliꞌ malááꞌ ntepuꞌuaꞌ.c
9 Ó PUEꞌ, meraruaꞌaꞌ i Hio
membiáꞌ tulungi.
10 Kupekuneꞌ, “Apa pobunduꞌána ane matemoꞌ
hai ratawu i tampoꞌ?
Peisá paꞌi to i lalu tampoꞌ motóiáKoꞌ,
hai mampodarita katetidaꞌMu?
11 PUEꞌ! Nupehádingi hai Nupokaꞌahiꞌaꞌ.
Ó PUEꞌ, Nutulungiaꞌ.”
12 Petatangingkuꞌ Nubáliki miꞌi
haneꞌiaꞌ motáróꞌ-táróꞌ ánti kagóeꞌkuꞌ.
Kawiorangkuꞌ Nubáliki miꞌi mewaliꞌ nani petóiá,
13 bona mamponaniaꞌ nani petóiá i Hio
hangko i lalungkuꞌ ntepuꞌu,
tiꞌara kupengkaniika.
Ó Pueꞌ Ala PUEꞌkuꞌ,
ina kuꞌuliꞌ handaꞌ kamaroꞌana i Hio haweꞌ i rue-ruena.