Angi to rumihi mopatongawaꞌ kuasaꞌna PUEꞌ
29
Nani to nakáráhi Daudiꞌ.
Ee upu-upu to ara i surugáꞌ, nipomahile miꞌi PUEꞌ,
láwiꞌ Ia peá to maróhó hai meawaꞌ.
2 Nitóiá miꞌi PUEꞌ, ánti peawaꞌna hangaꞌNa,
menómbámokou i Hia, láwiꞌ Ia magasaꞌ.
3 PUEꞌ molaluita masimbuku ntepuꞌu i wongko uwai,
Pueꞌ Ala to meawaꞌ molaluita
nodo gumpataꞌ i wongko tahiꞌ to maeláꞌ.
4 Ane PUEꞌ molaluita masimbuku,
tongawaꞌ ntepuꞌu kamakuasaꞌNa hai peawaꞌNa.
5 Ane PUEꞌ molaluita, upu-upu kau to maróhó matepóꞌ,
mogalo riꞌi kau to mapángkáꞌ ntepuꞌu i Libano maháká.
6 Ane PUEꞌ molaluita, wambaꞌNa mopaꞌara linu,
haneꞌi buluꞌ Libano mentimboꞌ-ntimboꞌ nodo ánáꞌ gapiꞌ,
mogalo riꞌi buluꞌ Sirioꞌa mentimboꞌ-ntimboꞌ nodo ánáꞌ gapiꞌ.
7 Ane PUEꞌ molaluita, wambaꞌNa mopaꞌara kiláꞌ.
8 Ane PUEꞌ molaluita, pádá loriꞌ moenggo,
mogalo riꞌi pádá loriꞌ Kadesi moenggo.
9 Ane PUEꞌ molaluita, lagiwa to káláꞌeá tepaꞌánáꞌ,
hai kakau maloriꞌ.
Upu-upu tauna to ara i TámbiNa manguliꞌ,
“Tapomahile PUEꞌ!”
10 PUEꞌ makuasaꞌ i uwai to kebuꞌu.
PUEꞌ makuasaꞌ mepárentá, láwiꞌ Ia Datu haweꞌ i rue-ruena.
11 Hampóáꞌworia PUEꞌ ina mampeweꞌi kamaróhó
i taunáNa.
Hampóáꞌworia PUEꞌ ina mowátiꞌ taunáNa
bona tueꞌheꞌ i lalu roꞌa ngkatueꞌ.