Pueꞌ Ala mokámpái katueꞌkuꞌ
28
Nanina Daudiꞌ.
Ó PUEꞌ, meraruaꞌaꞌ i Hio
láwiꞌ Io buluꞌ watu pengkatueꞌángkuꞌ.
Kupembiáꞌ bona Nupailalu pekakaengkuꞌ,
láwiꞌ ane tiꞌaraꞌaꞌ Nupehaileki,
ina nodoaꞌ tauna to mate.
2 Nupehádingi pembiáꞌkuꞌ
ane membiáꞌaꞌ tulungi.
Moángkáꞌaꞌ taengkuꞌ mekakae i Hio
i TámbiMu to melumbuꞌ kamagasaꞌna.
3 Ineeꞌaꞌ Nuhuku hingkakani hai tauna to kadake,
to mampe to maroꞌa i lindoꞌraꞌ hángká rángáraꞌ,
mole riꞌi moliwoheꞌ mobábehi to kadake.
4 Kupembiáꞌ bona Nuhukuheꞌ ánti bábehiáraꞌ to kadake.
Nuháwángiheꞌ hintotoꞌ hai apa to rabábehi.
5 Tiꞌaraheꞌ mobiláꞌ apa to napobágóꞌ PUEꞌ
hai upu-upu to Nabábehi taeNa.
Onoꞌ miꞌi haneꞌi Ia ina mopatunaheꞌ,
hai tiꞌarapoheꞌ ina Napaꞌara huleꞌ.
6 Tetóiá miꞌi PUEꞌ,
láwiꞌ Ia mampehádingi mpuꞌu miꞌi pembiáꞌkuꞌ.
7 PUEꞌ miꞌi to mampoweꞌiaꞌ róhó,
hai mokámpáiaꞌ nodo lábá.
Ia miꞌi to kuhárungá.
Molámbiꞌmoꞌ petulungi,
onoꞌ haneꞌi góeꞌ-góeꞌaꞌ,
hai kunanika nani petóiá i Hia.
8 PUEꞌ miꞌi to mampeweꞌi róhó i taunáNa,
Ia miꞌi to mewaliꞌ nodo bente,
pengkatueꞌána tauna to Napileꞌi mewaliꞌ datu.
9 Kupembiáꞌ bona Nupelaeheꞌ taunáMu,
hai Nupoweꞌiheꞌ pewátiꞌMu.
Kupembiáꞌ bona Nupoewu
hai Nukámpáiheꞌ haweꞌ i rue-ruena.