Pekakae i Pueꞌ ánti pekámpáiNa
27
Nanina Daudiꞌ.
PUEꞌ miꞌi to mopamabaa katueꞌkuꞌ hai mampelaeaꞌ,
tiꞌaraꞌaꞌ malááꞌ i heáná peá.
PUEꞌ to mokámpáiaꞌ nodo bente to mokámpái kótá,
tiꞌara ara to kupokalááꞌ.
2 Ane tauna to kadake mau mopapateaꞌ,
ewálingkuꞌheꞌ iti to ina manawoꞌ.
3 Kehapiꞌ miꞌi surudadoꞌ timamamoheꞌ ina molibuꞌaꞌ,
tiꞌaraꞌaꞌ paraluu malááꞌ,
kehapiꞌaꞌ ina rapombealaꞌá,
mehárungáꞌaꞌ oaꞌ i Hio.
4 Hampákáꞌ peá to kupembiáꞌ i PUEꞌ,
ia miꞌi, kupoinao toroꞌ i támbiNa lántuꞌángkuꞌ tueꞌ,
bona kuita peawaꞌna PUEꞌ,
hai peisáꞌaꞌ menómbá i Hia.
5 Ane ara kapári to morampeaꞌ,
PUEꞌ to mokámpáiaꞌ.
Ia mowuniaꞌ i lalu bambaruꞌNa,
hai moántiaꞌ i tutuꞌ buluꞌ watu, pengkatueꞌángkuꞌ.
6 Deꞌe-deꞌe menangimoꞌ ewálingkuꞌ to molibuꞌaꞌ,
onoꞌ miꞌi haneꞌi ina kuhuhuꞌ popenómbángkuꞌ i támbiMu
hai mohoraꞌ-horaꞌaꞌ ánti kagóeꞌkuꞌ.
Ina monanikaꞌaꞌ nani petóiá i PUEꞌ.
7 Ó PUEꞌ, kupembiáꞌ bona Nupehádingi peraruaꞌkuꞌ,
Nupokaꞌahiꞌaꞌ wongkódóꞌá hai Nuhánikiaꞌ!
8 Kupeuláꞌi ngkóráꞌMu PUEꞌ to manguliꞌ node:
“Hangaa-ngaa nupeliꞌAꞌ hai menómbákoꞌ i Kódóꞌ.”
Mewaliꞌ kuꞌundeꞌ ntepuꞌu menómbáKoꞌ PUEꞌ.
9 Ó PUEꞌ, ineeꞌ wongkódóꞌá Nutaleuki hawiꞌMu deꞌe,
hai ineeꞌaꞌ Nusapuáka ánti kamabukoꞌMu,
láwiꞌ Io miꞌi to motulungiaꞌ.
Ineeꞌaꞌ Nukálámbáhi,
hai ineeꞌaꞌ woꞌo Nupálehi.
Ó Pueꞌ Ala, Io peá to mampelaeaꞌ.
10 Kehapiꞌ miꞌi umángkuꞌ hai inángkuꞌ mopálehiaꞌ,
agáiáná Io PUEꞌ motarimaꞌaꞌ mewaliꞌ ánáꞌMu.
11 PUEꞌ, kupembiáꞌ bona Nupakanótóáꞌaꞌ ráráMu.
Nuteteꞌaꞌ mouláꞌ rárá to toꞌu,
ánti kaꞌáráraꞌ ewálingkuꞌ.
12 Ineeꞌaꞌ Nuhuhuꞌ i kuasaꞌraꞌ ewálingkuꞌ,
láwiꞌ handaꞌmoheꞌ sabiꞌ dongkoꞌ to moewaꞌaꞌ,
hai masekeheꞌ mampeliꞌ kanawoꞌángkuꞌ.
13 Kupoinálái ina kuhádiá kamaroꞌana PUEꞌ
lántuꞌángkuꞌ mani tueꞌ i duniáꞌ.
14 Mehárungámokou i PUEꞌ.
Nipakaróhó hai nipatetidaꞌ lalumi.
Hangaa-ngaa mehárungákou i PUEꞌ.