Pekakaena tauna to tiꞌara masalaꞌ
26
Nanina Daudiꞌ.
Ó PUEꞌ, kupembiáꞌ bona Nupatongawaꞌ
katiꞌárángkuꞌ masalaꞌ,
láwiꞌ tueꞌaꞌ oaꞌ i kabulá lalu.
Mehárungáꞌaꞌ i Hio PUEꞌ,
tiꞌara bata-bata lalungkuꞌ.
2 Kupembiáꞌ bona Nupáresáꞌ hai Nupampeitaiaꞌ,
i lalungkuꞌ hai i pekiringkuꞌ,
3 láwiꞌ kubuhinao oaꞌ kamaꞌahiꞌMu to tiꞌara madepuꞌ-depuꞌ,
hai tetidaꞌaꞌ oaꞌ i Hio.
4 Tiꞌaraꞌaꞌ mau mampohintuwuꞌá tauna to meákálángi,
hai tiaraꞌaꞌ woꞌo mau mampohingkakaniá
tauna to mampe to maroꞌa.
5 Kukáhihiꞌ tauna to hirámpu mobábehi to kadake,
hai tiꞌaraꞌaꞌ mau mampohingkakaniáheꞌ tauna
to tiꞌara mampeuláꞌi párentáMu.
6 Ó PUEꞌ, kubahoꞌi taengkuꞌ tandaꞌ katiꞌárángkuꞌ masalaꞌ,
haneꞌiaꞌ molumao mantoleli paintuá popenómbá.
7 Monanikaꞌaꞌ nani kagóeꞌ kupasimbuku
mokana i upu-upu to Nubábehi
láwiꞌ maroꞌa ntepuꞌu.
8 Ó PUEꞌ, kuꞌundeꞌ ntepuꞌu támbi katoroꞌáMu,
láwiꞌ ionoꞌ tongawaꞌ oaꞌ peawaꞌMu.
9 Ineeꞌ Nuala peinaongkuꞌ hingkakani hai tauna to madósá.
Ineeꞌaꞌ Nupatodáhi mate hibali hai tauna to mepapate,
10 to pakaheꞌ mobábehi bábehiá to kadake,
hai moundeꞌ motarima dóiꞌ sogoꞌ.
11 Agáiáná kódóꞌ deꞌe, tueꞌaꞌ oaꞌ i kabulá lalu.
Kupembiáꞌ bona Nupokaꞌahiꞌaꞌ
hai Nukábáháꞌaꞌ hangko i kamapáringkuꞌ.
12 Tekábáhámoꞌ hangko i kapári to ina morampeaꞌ.
Ó PUEꞌ, ina kutóiáKoꞌ i oloꞌraꞌ taunáMu.