Pekakae membiáꞌ peámpungi hai pekámpái
25
Nanina Daudiꞌ.
Ó Pueꞌ Ala PUEꞌkuꞌ, kupahaweꞌ pekakaengkuꞌ i Hio.
2 Pueꞌ Ala to kupenómbái, Io miꞌi pehárungáꞌángkuꞌ.
Ineeꞌheꞌ Nupatodáhi ewálingkuꞌ mopakahiliáꞌaꞌ
hai mopatawaiaꞌ.
3 Upu-upu tauna to mehárungá i Hio,
tiꞌaraheꞌ ina rapakahiliá.
To ina rapakahiliá iamoheꞌ tauna
to mepakanawoꞌ, kehapiꞌ tiꞌara ara álásáraꞌ.
4 Ó PUEꞌ, kupembiáꞌ bona Nupakanótóáꞌaꞌ upu-upu ráráMu.
Nupaturoꞌaꞌ bona kuisá apa to hangaa-ngaa kubábehi.
5 Nuteteꞌaꞌ i rárá to toꞌu hai Nupaturoꞌaꞌ,
láwiꞌ Io miꞌi Pueꞌ Ala to mampelaeaꞌ,
onoꞌ miꞌi haneꞌi mehárungáꞌaꞌ oaꞌ i Hio.
6 Ó PUEꞌ, kupembiáꞌ bona Nubuhinao oaꞌ kamaroꞌaMu
hai kamaꞌahiꞌMu to tiꞌara madepuꞌ-depuꞌ,
láwiꞌ hangko i rungu-runguna, iti to Nupatongawaꞌ oaꞌ.
7 Dósá-dósá to kubábehi i tempóngkuꞌ mani maleheꞌ,
hai upu-upu bábehiángkuꞌ to moliungi peundeꞌáMu,
ineeꞌ miꞌi Nubuhinao.
Agáiáná PUEꞌ, kupembiáꞌ bona Nubuhinaoaꞌ,
ánti kamaroꞌaMu hai kamaꞌahiꞌMu to tiꞌara madepuꞌ-depuꞌ.
8 PUEꞌ maroꞌa hai mobábehi apa to manótó,
onoꞌ miꞌi haneꞌi Ia mopaturoꞌ tauna to mobábehi dósá,
bona tueꞌheꞌ hintotoꞌ hai peundeꞌáNa.
9 Upu-upu tauna to mengkaiwóiꞌ
Nateteꞌheꞌ bona mouláꞌheꞌ rárá to manótó,
hai Napaturoꞌheꞌ bona mouláꞌheꞌ ráráNa.
10 PUEꞌ bukeꞌ ahiꞌ hai tetidaꞌ oaꞌ
i tauna to mohárungá dándiNa
hai mampeuláꞌi párentáNa.
11 Ó PUEꞌ, mahile kamasalaꞌkuꞌ.
Kupembiáꞌ bona Nuámpungiaꞌ,
bona hangaꞌMu rapomahile.
12 Heáná peá to mengkoruꞌ i PUEꞌ,
PUEꞌ ina mopakanótóáheꞌ rárá to hangaa-ngaa rapileꞌi.
13 Katueꞌraꞌ tauna iti ina maroꞌa oaꞌ,
hai pemuleꞌáraꞌ ina mokatoroꞌiheꞌ tampoꞌ to mewaliꞌ sosoraraꞌ.a
14 PUEꞌ mopahaweꞌ tunggáiána laluNa i tauna to mengkoruꞌ i Hia,
hai mopakanótóáheꞌ pototowiNa.
15 Pehárungángkuꞌ bateꞌ-bateꞌna i PUEꞌ,
láwiꞌ Ia peá to peisá mokábáháꞌaꞌ
hangko i ewálingkuꞌ to ina mopakanawoꞌaꞌ.
16 Nupehaileꞌaꞌ mai wongkódóꞌá, hai Nupokaꞌahiꞌaꞌ,
láwiꞌ kódóꞌ deꞌe haduduángkuꞌ peá,
hai ara to mampopeahiahiꞌaꞌ.
17 Kamasusana lalungkuꞌ mantámbái miꞌi,
mewaliꞌ kupembiáꞌ bona Nukábáháꞌaꞌ
hangko i kamapáringkuꞌ.
18 Nupeita kamapárina tueꞌkuꞌ,
hai Nuámpungi upu-upu dósángkuꞌ.
19 Nupeita kahandaꞌna ntepuꞌu ewálingkuꞌ
hai noumbá karumihina pekáhihiꞌraꞌ i kódóꞌ.
20 Nukámpái katueꞌkuꞌ, hai Nupelaeaꞌ
bona tiꞌaraꞌaꞌ rapakahiliá,
láwiꞌ mengkatueꞌaꞌ i Hio.
21 Kupembiáꞌ bona kabulá lalu hai kamanótó
mokámpái lalungkuꞌ,
láwiꞌ kódóꞌ deꞌe mehárungáꞌaꞌ i Hio.
22 Ó Pueꞌ Ala, kupembiáꞌ bona Nukábáháꞌheꞌ toSáráeliꞌ
hangko i hinángkáꞌ kamapáriraꞌ!