Kahaweꞌna Datu to meawaꞌ
24
Nanina Daudiꞌ.
PUEꞌ Ia miꞌi Pueꞌna duniáꞌ hai upu-upu óntóꞌna,
tepasuaꞌ tauna to toroꞌ ionoꞌ,
2 láwiꞌ Ia miꞌi to moaró áriꞌi duniáꞌ i wongko pealeꞌ tahiꞌ,
hai hangko i uwai to kaladu Ia mopakaróhó peángkáꞌna duniáꞌ.
3 Heáná to nabuku mempanaiꞌ lao i Sio buluꞌna PUEꞌ?
Heáná to nabuku meángkáꞌ i kaꞌaraꞌáNa to magasaꞌ?
4 Ia miꞌi tauna to magasaꞌ hai bulá laluna.
Ia miꞌi woꞌo tauna to tiꞌara moundeꞌ to tiꞌara toꞌu,
ba modongkoꞌ ane modándi.
5 Tauna iti ina molámbiꞌ pewátiꞌ hangko i PUEꞌ,
hai Pueꞌ Ala ina mampelae tauna iti
hai mopakanótó katiꞌárána masalaꞌ.
6 Noꞌonoꞌ miꞌi tauna to moundeꞌ moisá Pueꞌ,
menómbáheꞌ i Pueꞌ Ala to napenómbái Iako.
7 Nibungkáhi miꞌi babaꞌá nipakaeláꞌ,
nibungkáhi miꞌi babaꞌá to sae mpiiꞌ miꞌi,
bona Datu to meawaꞌ peisá mesuaꞌ.
8 Heáná iti Datu to meawaꞌ?
Ia miꞌi PUEꞌ to maróhó hai makuasaꞌ,
Ia maróhó i lalu pombeala.
9 Nibungkáhi miꞌi babaꞌá nipakaeláꞌ
nibungkáhi miꞌi babaꞌá to sae mpiiꞌ miꞌi,
bona Datu to meawaꞌ peisá mesuaꞌ.
10 Heáná iti Datu to meawaꞌ?
PUEꞌ Ala to Makuasaꞌ,
Ia miꞌi Datu to meawaꞌ.