Esra mohádi bámbári pohamboko to mombetatakaꞌi toIahudiꞌ hai to tiꞌara toIahudiꞌ
9
Karooraꞌ mobábehi iti, bahangapaheꞌ tadulakoraꞌ toSáráeliꞌ haweꞌheꞌ i kódóꞌ. Rapahaweꞌ, “ToSáráeliꞌheꞌ, tepasuaꞌ tadulako menómbá hai toLewi, tiꞌaraheꞌ megááki i tauna to toroꞌ ieneꞌ, to meriringkuꞌi bábehiáraꞌ, iamoheꞌ: toKánáꞌá, toHeti, toPerisi, toIebusi, toAmoni, toMoabiꞌ, toMásiriꞌ, hai toAmori. 2 Tobaleilo toIahudiꞌ mohambokoheꞌ hai towawine to handarena, álána kitaꞌ to mewaliꞌ taunána Pueꞌ Ala, tiꞌarapokeꞌ magásáꞌ.a Hai melumbuꞌ hangko ionoꞌ, tadulakontaꞌ hai topopárentántaꞌ riꞌi to mampoioruákeꞌ toSáráeliꞌ mobábehi noꞌonoꞌ hai tiꞌarapoheꞌ tetidaꞌ i Pueꞌ Ala!”3 Kakuhádina iti, mohepaꞌaꞌ waruꞌkuꞌ, morebukiaꞌ weluáꞌkuꞌ hai danggongkuꞌ, haneꞌi mehodaꞌaꞌ ánti kamasusana lalungkuꞌ. 4 Hangko ionoꞌ, haweꞌheꞌ tauna to mengkoruꞌ ntepuꞌu i ngkóráꞌna Pueꞌ Ala to rapenómbái toSáráeliꞌ. Malááꞌheꞌ apa to ina mewaliꞌ i tauna to mesuwuꞌmoheꞌ hangko i karatawaniáraꞌ iti, láwiꞌ moliungiheꞌ áturána Pueꞌ Ala. Maiheꞌ motolelingiaꞌ, agáiáná mehodaꞌaꞌ oaꞌ haweꞌ tempó pohuhuꞌ popenómbá kalumbaꞌ, hai masusa ntepuꞌu lalungkuꞌ.
5 I tempóna popenómbá kalumbaꞌ rahuhuꞌ, meángkáꞌaꞌ láwiꞌ liu miꞌi tempó mengkaiwóiꞌ. Pewaruꞌkuꞌ mahepaꞌ. Molingkuduaꞌ hai moángkáꞌaꞌ taengkuꞌ i PUEꞌ, Pueꞌ Ala to kupenómbái. 6 Mekakaeaꞌ, kuꞌuliꞌ, “Ó Pueꞌ Ala, kódóꞌ deꞌe mahili ntepuꞌuaꞌ moángkáꞌ wuáꞌkuꞌ i lindoꞌMu. Dósángkiꞌ mombelapi-lapi i tutuꞌ wuáꞌkiꞌ hai kamasalaꞌkiꞌ haweꞌ i langiꞌ. 7 Mantepuꞌu i tosaengkiꞌ hangkoia haweꞌ deꞌe-deꞌe, mahile dósángkiꞌ i Hio. Ánti kamasalaꞌkiꞌ, onoꞌ miꞌi haneꞌi kaiꞌ, datungkiꞌheꞌ hai tadulako-tadulako menómbá ranangimongkaiꞌ datu-datu to handarena, rapapateangkaiꞌ, ratawaniangkaiꞌ, párewángkiꞌ rarampaꞌ, hai rapakóiꞌangkaiꞌ, hibali hai to pewaliꞌ deꞌe-deꞌe.
8 Agáiáná deꞌe-deꞌe PUEꞌ, Pueꞌ Ala to kipenómbái, maroꞌa miꞌi laluMu i kaiꞌ. Nukábáhá bahangapamongkaiꞌ hangko i karatawaniángkiꞌ, hai mokatoroꞌiangkaiꞌ i katoroꞌáMu to magasaꞌ deꞌe. Nupakaróhó lalungkiꞌ,b hai Nupakaroꞌa huleꞌ katueꞌkiꞌ.c 9 Tempóngkiꞌ mani rapohawiꞌ, tiꞌaraꞌangkaiꞌ Nupálehi. Nupopewaliꞌangkaiꞌ rapokaꞌahiꞌ datu-datu i kadatuá Peresia, bona rapaliuangkaiꞌ tueꞌ hai moaró huleꞌ támbiMu to magero iti. Nukámpáiangkaiꞌ i tampoꞌ Iudá hai i kótá Ierusale.
10 Agáiáná deꞌe-deꞌe, Pueꞌ Ala to kipenómbái, apa miꞌi to peisá kiuliꞌ? Moliungimongkaiꞌ párentáMu 11 to Nupahaweꞌ i kaiꞌ moliu nabiꞌ-nabiꞌ huoꞌáMu. Hangkoia rapahaweꞌ i kaiꞌ, ‘Humalele tampoꞌ Kánáꞌá to ina nikatoroꞌi rapakedái ánti kakadakeraꞌ tauna to toroꞌ ionoꞌ. Ádáraꞌ meriringkuꞌi. 12 Mewaliꞌ deꞌe-deꞌe, ineeꞌkou mampopohamboko ánáꞌmi hai ánáꞌraꞌ tauna to toroꞌ ionoꞌ. Ineeꞌkou woꞌo mohintuwuꞌ hai hira bona damekou ba maroꞌa katueꞌmi.d Ane nipeuláꞌi párentá deꞌe, ina maróhókou hai ina mandeꞌkou wuaꞌna powiáꞌmi i tampoꞌ deꞌe. Ina mampeweꞌikou woꞌo tampoꞌ deꞌe i pemuleꞌámi mewaliꞌ sosoraraꞌ haweꞌ i rue-ruena.’
13 Agáiáná madósámongkaiꞌ hai moliungimongkaiꞌ áturáMu, onoꞌ miꞌi haneꞌi Nuhukumongkaiꞌ. Ó Pueꞌ Ala, kiꞌisánto pehuku to Nuweꞌiangkaiꞌ iti tiꞌara hintotoꞌ hai kamahilena salaꞌkiꞌ, agáiáná Nupaliumongkaiꞌ bahangapa deꞌe mesuleꞌ mai i tampoꞌkiꞌ. 14 Mewaliꞌ tiꞌara maroꞌa ane molingkaꞌi wopangkaiꞌ párentá-párentáMu hai mohambokoangkaiꞌ hai tauna to mobábehi to meriringkuꞌi deꞌe. Ane kibábehi noꞌonoꞌ, bateꞌna mabukoꞌ ntepuꞌuKoꞌ, hai ina Nupatunaꞌangkaiꞌ álána tiꞌara piꞌi ara haweꞌ hadua to tueꞌ. 15 Ó PUEꞌ, Pueꞌ Ala to kipenómbái, manótó pobutusiMu. Kehapiꞌ noꞌonoꞌ, Nupatodáhi mani bahangapaꞌangkaiꞌ tueꞌ. Kipangákuꞌ kamasalaꞌkiꞌ i Hio. Tiꞌaraꞌangkaiꞌ peisá molindoꞌKoꞌ ánti kamasalaꞌkiꞌ iti.”