Esra 8

Hangaꞌ-hangaꞌ tauna to mesuleꞌ hingkakani hai Esra hangko i karatawaniáraꞌ

Deꞌemoheꞌ hangaꞌ-hangaꞌ kapalaꞌ tina-tina hai tauna to meuláꞌ i hira. Pohuꞌheꞌ hangko i tampoꞌ Bábeli, mesuleꞌheꞌ hingkakani hai kódóꞌ Esra lao i Ierusale. Iti mewaliꞌ tempóna Datu Aratasata mepárentá.

2 Gereso hadua pemuleꞌána Pineha,

Danieli pemuleꞌána Itama,

hai Hatu hadua ueꞌna Sekania pemuleꞌána Daudiꞌ.

3 To meuláꞌ woꞌo:

Sekania hadua pemuleꞌána Parosi

hingkakani hai hangatu lima puloꞌraꞌ tobaleilo to teukiꞌ hangaꞌraꞌ toioruraꞌ i poukiꞌá pemuleꞌáraꞌ,

4 Elihoenai ánáꞌna Serahia pemuleꞌána Paha-Moabiꞌ

hingkakani hai rongatu tobaleilo,

5 Sekania ánáꞌna Iahasieli pemuleꞌána Satu

hingkakani hai tálu áturaꞌ tobaleilo,

6 Ebe ánáꞌna Ionata pemuleꞌána Adini

hingkakani hai lima puloꞌraꞌ tobaleilo,

7 Iesaia ánáꞌna Atalia pemuleꞌána Ela

hingkakani hai pitu puloꞌraꞌ tobaleilo,

8 Sebadia ánáꞌna Mikaeli pemuleꞌána Sepaka

hingkakani hai uwalu puloꞌraꞌ tobaleilo,

9 Obaia ánáꞌna Iehie pemuleꞌána Ioabiꞌ

hingkakani hai rongatu hampuloꞌ hai uwalu tobaleilo,

10 Selomitiꞌ ánáꞌna Iosipia pemuleꞌána Bani

hingkakani hai hangatu ini puloꞌraꞌ tobaleilo,

11 Sakaria ánáꞌna Bebai pemuleꞌána Bebai

hingkakani hai rompuloꞌ hai uwalu tobaleilo,

12 Iohana ánáꞌna Hakata pemuleꞌána Asagaꞌ

hingkakani hai hangatu hampuloꞌ tobaleilo,

13 Elipele, Iehie hai Semaia pemuleꞌánaheꞌ Adonika

hingkakani hai ini puloꞌraꞌ tobaleilo. Haweꞌheꞌ i bókóꞌ.

14 Utai hai Sabudi pemuleꞌánaheꞌ Bigawai

hingkakani hai pitu puloꞌraꞌ tobaleilo.

Esra morámpu toLewi bona mobágóꞌheꞌ i támbina Pueꞌ Ala

15 Upu-upu tauna iti, kurámpuheꞌ i wiwi uwai to moili lao i kótá Ahawa, haneꞌi mobambaruꞌangkaiꞌ ionoꞌ tálu alona kamaruena. Tempóraꞌ kupáresáꞌ, araheꞌ toSáráeliꞌ tepasuaꞌ tadulako menómbá, agáiáná tiꞌara ara toLewi. 16 Onoꞌ haneꞌi kukióꞌheꞌ bahangapa kapalaꞌ tina, iamoheꞌ: Eliese, Arieli, Semaia, Elenata, Iari, Elenata to ntániꞌna, Nata, Sakaria hai Mesulama. Kukióꞌ woꞌo rodua guru, iamoheꞌ Ioiaribi hai Elenata. 17 Roo onoꞌ, kuhuoꞌheꞌ lao mampohidupaꞌá Ido, tadulakoraꞌ toLewi to toroꞌ i Kasipia. Kupatuntuáheꞌ apa to paraluu rapahaweꞌ i Ido, i hangka toLewinaheꞌ to toroꞌ i Kasipia, hai i hawiꞌraꞌ to mobágóꞌ i Pueꞌ. Tunggáiángkuꞌ bona ara woꞌo toLewi to ina mesuleꞌ i kótá Ierusale hingkakani hai kaiꞌ, hai mobágóꞌ i támbina Pueꞌ Ala. 18 Ánti kamaroꞌana laluna Pueꞌ Ala i kaiꞌ, raꞌánti mai i kaiꞌ Serebia hadua toLewi to mapánde, pemuleꞌána Mahali. Ánáꞌnaheꞌ hai halalunaheꞌ meuláꞌ woꞌo, hampuloꞌ hai uwalu tobaleilo. 19 Haweꞌheꞌ woꞌo Hasabia hai Iesaia pemuleꞌánaheꞌ Merari hingkakani hai ánáꞌraꞌ hai halaluraꞌ, rompuloꞌ tobaleilo. 20 I rawa hangko ionoꞌ, ara woꞌo rongatu hai rompuloꞌ hawiꞌ to ina mobágóꞌ i támbina Pueꞌ Ala modureiheꞌ toLewi. Toioruraꞌ mantepuꞌu mobágóꞌ noꞌonoꞌ tempóna Datu Daudiꞌ hai to makuasaꞌ i kadatuána mopakanótó kolompoꞌ iti. Hangaꞌraꞌ upu-upu teukiꞌ miꞌi i sura hangaꞌ.

Tauna to mesuleꞌ hangko i karatawaniáraꞌ mopuasaꞌ hai mekakaeheꞌ

21 Hangko ionoꞌ, i wiwi uwai Ahawa, kupahaweꞌ bona upu-upuangkaiꞌ hangaa-ngaa mopuasaꞌ hai mengkaiwóiꞌ i Pueꞌ Ala, mekakae membiáꞌ bona Ia mamporángáꞌangkaiꞌ i polumaoángkiꞌ hai mokámpáiangkaiꞌ, ánáꞌkiꞌ, hai upu-upu párewángkiꞌ. 22 Masandaꞌaꞌ membiáꞌ i datu bona surudadoꞌ hai topodárá mokámpáiangkaiꞌ hangko i ewali i polumaoángkiꞌ, láwiꞌ kipahaweꞌ miꞌi i datu node: “Pueꞌ Ala to kipenómbái motulungi upu-upu tauna to menómbá i Hia, agáiáná Ia mabukoꞌ ntepuꞌu i tauna to tiꞌara piꞌi tetidaꞌ i Hia.” 23 Mewaliꞌ mopuasaꞌangkaiꞌ hai mekakaeangkaiꞌ, haneꞌi Pueꞌ Ala moweꞌiangkaiꞌ apa to kipembiáꞌ.

Popenómbá to ina rahuhuꞌ i támbina PUEꞌ

24 Hangko i oloꞌraꞌ kapalaꞌ tadulako menómbá, kupileꞌi hampuloꞌ hai rodua tauna, iamoheꞌ: Serebia, Hasabia, hai hampuloꞌ mani halaluraꞌ. 25 Hangko ionoꞌ, kutimbá buláwá, peráꞌ, hai upu-upu párewá to rapeweꞌi miꞌi datu, topepatentenaheꞌ, tauna to mapángkáꞌ lántiꞌraꞌ, hai upu-upu toSáráeliꞌ to ionoꞌ, bona rapakeꞌ i támbina Pueꞌ Ala to kipenómbái. Upu-upuna iti kupeweꞌi i tadulako-tadulako menómbá iti. 26 Deꞌe miꞌi poukiꞌá pohintuwuꞌ to kuweꞌiheꞌ:

peráꞌ 22 tooꞌ,

hangatu wuaꞌna párewá to rabábehi hangko i peráꞌ, kamatimina 70 kiló,

buláwá 3.400 kiló,

27 rompuloꞌ mangku to rabábehi hangko i buláwá, kamatimina 8,4 kiló,

hai rombuaꞌ párewá to rabábehi hangko i tambaga to mengkilaꞌ hai mababe ntepuꞌu nodo buláwá.

28 Molaluitaꞌaꞌ i tadulako menómbá iti, kuꞌuliꞌ, “Kómu hai párewá deꞌe rapataniꞌ miꞌi i PUEꞌ. Buláwá hai peráꞌ deꞌe rapeweꞌi miꞌi tauna mewaliꞌ kabulá laluraꞌ i PUEꞌ, Pueꞌ Ala to rapenómbái toiorumi. 29 Nikámpái maroꞌa upu-upu párewá iti duuꞌmi haweꞌ i támbina PUEꞌ i Ierusale. I kahaweꞌmi ionoꞌ, nitimbá párewá iti i lalu lintuꞌ pemboliá párewá, hangko nipeweꞌi i kapalaꞌ-kapalaꞌ tadulako menómbá, toLewi hai i tadulakoraꞌ tina-tina toSáráeliꞌ.” 30 Hangko ionoꞌ, tadulako-tadulako menómbá hai toLewi iti morangaꞌ buláwá, peráꞌ, hai upu-upu párewá to ratimbá iti, bona raꞌánti i Ierusale haneꞌi rawoli i lalu támbina Pueꞌ Ala to kipenómbái.

Kahaweꞌraꞌ i Ierusale

31 Imbaꞌna kahampuloꞌ hai duá wulá kaꞌisáꞌ, pohuꞌangkaiꞌ hangko i uwai Ahawa i tampoꞌ Bábeli lao i Ierusale. I polumaongkiꞌ, Pueꞌ Ala to kipenómbái mokámpáiangkaiꞌ hangko i ewali hai toperampaꞌ. 32 Kahaweꞌkiꞌ i Ierusale, mengkarooangkaiꞌ tálu alona kamaruena. 33 Roo onoꞌ, i alo kaꞌiba, laomongkaiꞌ i támbina Pueꞌ Ala, motimbá buláwá, peráꞌ hai upu-upu párewá ntániꞌna to kiánti. Roo onoꞌ, kipeweꞌi upu-upuna iti i Meremoꞌ. Ia hadua tadulako menómbá, ánáꞌna Uria. Rasabiki Eleasa ánáꞌna Pineha, hai rodua toLewi, iamoheꞌ: Iosaba ánáꞌna Iesua, hai Noadia ánáꞌna Binui. 34 Upu-upu párewá iti raimbaꞌ hai ratimbá, haneꞌi kamatimina raukiꞌ i sura.

35 I alo iti woꞌo, upu-upu tauna to mesuleꞌ miꞌi hangko i karatawaniáraꞌ, mohuhuꞌheꞌ popenómbá to raintu i Pueꞌ Ala to rapenómbái toSáráeliꞌ. Popenómbáraꞌ iti ia miꞌi:

hampuloꞌ hai rombaꞌa gapiꞌ laki to mosulewátáiheꞌ upu-upu toSáráeliꞌ,

hahioꞌ puloꞌna hai ini báꞌána dimbá laki,

pitu puloꞌna hai pitu ánáꞌ dimbá.

Upu-upu binataꞌ iti raintu mewaliꞌ popenómbá i PUEꞌ. I rawa hangko ionoꞌ, ara woꞌo hampuloꞌ hai rombaꞌa bekeꞌ laki to mewaliꞌ popenómbá poámpungi dósá.

36 Roo onoꞌ, sura to naweꞌiheꞌ datu, rapeweꞌi i mágáuꞌ hai i topopárentá i poropensi to tándáꞌ i katámpuá alo uwai Epara. Mewaliꞌ topopárentá iti mampeweꞌiheꞌ petulungiraꞌ i kitaꞌ toSáráeliꞌ bona rapakeꞌ i támbina Pueꞌ Ala.