Esra haweꞌ i Ierusale
7
Bahangapa parena hangko ionoꞌ, tempóna Aratasataa mepárentá i Peresia, ara hadua tobaleilo to rahangaꞌ Esra pemuleꞌána Haruni Tadulako Menómbá Mahile. Toiorunaheꞌ Esra iti iamoheꞌ:Seraia umána Esra,
Asaria,
Hilikia,
2 Salumu,
Sadoꞌ,
Ahituꞌ,
3 Amaria,
Asaria,
Meraio,
4 Serahia,
Usi,
Buki,
5 Abisua,
Pineha,
hai Eleasa ánáꞌna Haruni Tadulako Menómbá Mahile to rungu-runguna.
6 Hangkoia, Pueꞌ Ala to rapenómbái toSáráeliꞌ mampeweꞌi áturá-áturáNa i Musa. Esra hadua tauna to moisá ntepuꞌu áturá iti hai mapánde motasere. Ánti pewátiꞌna PUEꞌ, Pueꞌ Ala to napenómbái Esra, Datu Aratasata mopabukeꞌi upu-upu pembiáꞌna. Esra mesuleꞌ i Ierusale hangko i tampoꞌ Bábeli, 7 hai bahangapaheꞌ toSáráeliꞌ meuláꞌ woꞌo, tepasuaꞌ bahangapa tadulako menómbá, toLewi, toponani, topokámpái babaꞌ támbina Pueꞌ Ala, hai hawiꞌ to mobágóꞌ i támbi iti. Pohuꞌheꞌ hangko i tampoꞌ Bábeli pare kapitu popárentána Aratasata,b mesuleꞌheꞌ i Ierusale. 8-9 Esra mopakanótó ina pohuꞌheꞌ hangko i tampoꞌ Bábeli imbaꞌna kaꞌisáꞌ wulá kaꞌisáꞌ, hai ánti petulungina Pueꞌ Ala, haweꞌheꞌ i Ierusale imbaꞌna kaꞌisáꞌ wulá kalima.c 10 Esra iti moundeꞌ ntepuꞌu mampegurui Paturoꞌna PUEꞌ, hai mampeuláꞌi áturá-áturána iti. Ia mopaturoꞌheꞌ toSáráeliꞌ mokana i párentána hai áturána PUEꞌ.
Surana Datu Aratasata i Esra
11 Esra ia miꞌi hadua tadulako menómbá hai guru agama. Ia mapánde motasere upu-upu párentá hai áturána PUEꞌ i toSáráeliꞌ. Deꞌe miꞌi to naukiꞌ Datu Aratasata i Esra:
12 “Hangko i Aratasata,datu to melumbuꞌ kamakuasaꞌna hangko i upu-upu datu
Molámbiꞌ Esra tadulako menómbá hai guruna Áturána Pueꞌ Ala to ara i surugáꞌ:
Tabeá.
13 Moliu sura deꞌe, kupaꞌara párentá: Upu-upu toSáráeliꞌ to i kadatuángkuꞌ, tepasuaꞌ tadulako-tadulako menómbá hai toLewi to mampoinao meuláꞌ i hio lao i Ierusale, peisántoheꞌ lao. 14 Kódóꞌ datu, hingkakani hai pitu topepatente i kadatuángkuꞌ, kihuoꞌkoꞌ lao i Ierusale mopáresáꞌ apa to mewaliꞌ i tampoꞌ Iudá hai i kótá Ierusale, bona nuisá babilaꞌ Paturoꞌna Pueꞌ Ala to rapoináláiákoꞌ, rapeuláꞌi ntepuꞌu tauna. 15 Ánti kabulána lalungkiꞌ, kódóꞌ datu hai pitu topepatentengkuꞌ, mampoweꞌikoꞌ buláwá hai peráꞌ bona nuánti i Ierusale mewaliꞌ popenómbá i Pueꞌ Ala to rapenómbái toSáráeliꞌ, Pueꞌ Ala to ara katoroꞌáNa i Ierusale. 16 Nuánti kabulá lalu hangko i kaiꞌ iti, hingkakani hai buláwá hai peráꞌ to nurámpu hangko i upu-upu poropensi to i kadatuá Bábeli, tepasuaꞌ kabulá lalu to ina raweꞌikoꞌ toSáráeliꞌ hai tadulako-tadulako menómbáraꞌ bona rapopenómbá i támbina Pueꞌ Ala i Ierusale. 17 Dóiꞌ iti hangaa-ngaa nupakeꞌ mpakaroꞌa, nupopobunduꞌ mohóló gapiꞌ laki, dimbá laki, ánáꞌ dimbá, bailoꞌ hai anggoroꞌ. Nupopenómbá upu-upuna iti i wongko paintuá popenómbá i támbina Pueꞌ Ala i Ierusale.
18 Pentáráꞌána buláwá hai peráꞌ iti peisá nipakeꞌ, io hai hangka tadulako menómbámu, mohóló apa peá to niparaluu, hintotoꞌ hai peundeꞌána Pueꞌ Ala to nipenómbái. 19 Hai upu-upu párewá to raweꞌikoꞌ, nuhuhuꞌ i Pueꞌ Ala i Ierusale bona rapakeꞌ i támbina Pueꞌ Ala to nupenómbái. 20 Ane ara mani to raparaluu i támbina Pueꞌ Ala, peisá nuhóló mopakeꞌ dóiꞌ kadatuá.
21 Kódóꞌ Datu Aratasata, kupaꞌara párentá i upu-upu topokádipurá dóiꞌ to i hambali uwai Epara tándáꞌ i katámpuá alo. Párentángkuꞌ node: Apa peá to napembiáꞌ Esra, tadulako menómbá to mapánde motasere Áturána Pueꞌ Ala to i surugáꞌ, hangaa-ngaa kásáliu niweꞌiheꞌ, kahandaꞌna:
22 peráꞌ haweꞌ 3.400 kiló,
bailoꞌ haweꞌ 10.000 kiló,
uwai anggoroꞌ haweꞌ 2.000 lite,
lana saitu haweꞌ 2.000 lite,
hai bure hangapa to raparaluu.
23 Apa peá to napakanótó miꞌi Pueꞌ Ala to i surugáꞌ, iti to paraluu ntepuꞌu nipeweꞌi bona rapakeꞌ i támbina Pueꞌ Ala to i surugáꞌ, bona popárentána datu hai ánáꞌnaheꞌ tiꞌara ina narampe kamabukoꞌna Pueꞌ Ala. 24 Kipahaweꞌ woꞌo, tiꞌara ara kuasaꞌmi moróróꞌ mampopengaa ásele hangko i tadulako menómbá, toLewi, toponani, topokámpái babaꞌ, hawiꞌ ba tauna ntániꞌna to mobágóꞌ i támbina Pueꞌ Ala.
25 Hai Esra, mouláꞌ kabukeꞌ pekiri to nulámbiꞌ hangko i Pueꞌ Ala to nupenómbái, kuhuoꞌkoꞌ moángkáꞌ bahangapa tadulako hai topebutusi to moisá áturá-áturána Pueꞌ Ala to nupenómbái, bona mohoda-hodaheꞌ kara-kara upu-upu tauna to toroꞌ i hambali uwai Epara tándáꞌ i katámpuá alo. Ane arai tadulako ba topebutusi to tiꞌara moisá áturána Pueꞌ Ala iti, hangaa-ngaa nupaturoꞌ bona naisá. 26 Heáná peá to tiꞌara mampeuláꞌi áturána Pueꞌ Ala to nupenómbái ba áturána datu, bateꞌna ina rahuku mate, ba rawura hangko i kadatuá, párewána raꞌala, ba ia ina ratarungku.”
Onoꞌ miꞌi sura hangko i Datu Aratasata.
Esra motóiá Pueꞌ Ala
27 Tetóiá miꞌi PUEꞌ, Pueꞌ Ala to rapenómbái toioruntaꞌ, láwiꞌ Ia to mokale i laluna datu, haneꞌi datu mau mopamababe támbina PUEꞌ i Ierusale. 28 Ánti kamaꞌahiꞌna Pueꞌ Ala i kódóꞌ, datu, topepatentenaheꞌ hai upu-upu tauna to mapángkáꞌ lántiꞌraꞌ, maroꞌa laluraꞌ i kódóꞌ. Ánti kamaroꞌana PUEꞌ, Pueꞌ Ala to kupenómbái, kupakaróhó lalungkuꞌ hai morámpu bahangapa tadulakoraꞌ toSáráeliꞌ bona meuláꞌheꞌ i kódóꞌ lao i Ierusale.