Párentána Datu Dáriu bona mopaliliuheꞌ poaró támbi penómbáꞌá
6
Datu Dáriu mopaꞌara párentá bona ara to lao mampeliꞌ sura to rawoli i lintuꞌ pemboliá sura kadatuá i kótá Bábeli. 2 Agáiáná sura to rapeliꞌ iti tiꞌara ralámbiꞌ i Bábeli, ngkáliꞌna riꞌi i bente Ahameta i tampoꞌ Media. Óntóꞌna sura iti node:3 I pare kaꞌisáꞌ popárentána Datu Koresi, ia mopaꞌara párentá mokana i támbina Pueꞌ Ala i Ierusale. Párentána node:
‘Támbina Pueꞌ Ala hangaa-ngaa raꞌaró huleꞌ, bona popenómbá ina rahuhuꞌ hai raintu wopiꞌi ionoꞌ. Kamapángkáꞌna támbi iti hangaa-ngaa rompuloꞌ hai pitu mete, hai kamaeláꞌna rompuloꞌ woꞌo hai pitu mete. 4 Rindina hangaa-ngaa rabábehi hangko i tálu usuna watu mahile, hai i wongkona halapi kau. Hólóna hangaa-ngaa natanggu dóiꞌ kadatuá. 5 I rawa hangko ionoꞌ, párewá buláwá hai peráꞌ to rapakeꞌ i támbina Pueꞌ Ala, to naꞌala miꞌi Datu Nebukanesa hangkoia hangko i Ierusale hai raꞌánti lao i tampoꞌ Bábeli, upu-upu párewá iti hangaa-ngaa rapopesuleꞌ i tampoꞌ Sáráeliꞌ hai rawoli huleꞌ i katoroꞌána to rungu-runguna i lalu támbina Pueꞌ Ala i Ierusale. Eneꞌ miꞌi párentángkuꞌ.’
Datu Dariu mepárentá bona poaró támbina Pueꞌ Ala rapaliliu
6 Ánti polámbiꞌna miꞌi sura to naukiꞌ Datu Koresi hangkoia, Datu Dariu mopakatu hánikina, naukiꞌ node:
“Molámbiꞌ Tatanai, mágáuꞌ i poropensi to tándáꞌ i katámpuá alo uwai Epara, Sieta-Bosonai hai topopárentá i poropensi iti.
Ineeꞌkou mosalempori toIahudiꞌ, 7 hai ineeꞌ nipekóntói bágóꞌraꞌ moaró támbina Pueꞌ Ala. Nipatodáhi mágáuꞌraꞌ toIahudiꞌ hai totosaeraꞌ moaró huleꞌ támbi iti i katoroꞌána to rungu-runguna.
8 Moliu sura deꞌe, kupárentákou woꞌo modureiheꞌ totosaeraꞌ toIahudiꞌ i pobágóꞌraꞌ moaró támbi iti node:
Dóiꞌ to raparaluu, niala hangko i ásele kadatuá to raróróꞌ i poropensi to tándáꞌ i katámpuá alo uwai Epara. Dóiꞌ iti hangaa-ngaa kásáliu rapakeꞌ mosaro topobágóꞌ. 9 Apa peá to raparaluu tadulako menómbá i Ierusale, to nodo gapiꞌ laki to maleheꞌ, dimbá laki hai ánáꞌ dimbá to ina rapopenómbá i Pueꞌ Ala to ara i surugáꞌ, noꞌonoꞌ woꞌo bailoꞌ, bure, anggoroꞌ hai lana saitu, upu-upu iti hangaa-ngaa niweꞌiheꞌ tadulako menómbá hangalo-hangalo, ineeꞌ nikáláliꞌá. 10 Nipopolumao upu-upu iti bona peisáheꞌ mohuhuꞌ popenómbá to mopagóeꞌ Pueꞌ Ala to ara i surugáꞌ, hai mekakae bona kódóꞌ hai ánáꞌkuꞌheꞌ tobaleilo nawátiꞌ Pueꞌ Ala.
11 Melumbuꞌ hangko ionoꞌ, kupaꞌara párentá. Ane arai tauna to moliungi párentá deꞌe, tauna iti ina rahuku, hangkau áriꞌi támbina ina rawuka, raumbiꞌ, haneꞌi rapopotohuꞌ wátána haweꞌ lembáꞌ. Támbina hangaa-ngaa ragero hai rapopewaliꞌ potibeá rumpuꞌ. 12 Pueꞌ Ala to mopileꞌi miꞌi Ierusale mewaliꞌ katoroꞌá iumbá Ia rapenómbái, ina mopakanawoꞌ heáná peá, datu ba tauna, to pebáiꞌ mobáliki párentángkuꞌ deꞌe ba mogero támbina Pueꞌ Ala i kótá Ierusale.
Kódóꞌ Dáriu to mopahaweꞌákou párentá deꞌe. Hangaa-ngaa nipeuláꞌi ntepuꞌu.”
Támbina Pueꞌ Ala rapamagasaꞌ
13 Párentána Datu Dáriu iti rapopolumao maroꞌa Tatanai mágáuꞌ i poropensi to tándáꞌ i katámpuá alo uwai Epara, Sieta-Bosonai, hai rángáraꞌ mobágóꞌ. 14 Nabiꞌ Hagai hai nabiꞌ Sakaria ánáꞌna Ido mopahaweꞌheꞌ laluitana Pueꞌ Ala, hai mopakaróhó laluraꞌ totosaeraꞌ toIahudiꞌ, onoꞌ haneꞌi poaró támbina Pueꞌ Ala iti rapaliliu. Támbi iti wali hintotoꞌ hai párentána Pueꞌ Ala to rapenómbái toSáráeliꞌ, hai párentáraꞌ Koresi, Dáriu hai Aratasata, datu-datu i Peresia iti. 15 Támbi iti wali miꞌi i imbaꞌna katálu wulá Adara pare kaꞌini popárentána datu Dáriu.a
16 Hangko ionoꞌ, toSáráeliꞌ, iamoheꞌ tadulako menómbá, toLewi hai tauna ntániꞌna to mesuleꞌmoheꞌ hangko i karatawaniáraꞌ i tampoꞌ Bábeli, mamposusaiheꞌ pewátiꞌ pewaliꞌna támbina Pueꞌ Ala iti i kagóeꞌ-góeꞌ.b 17 I posusa pewátiꞌ iti, mohuhuꞌheꞌ popenómbáraꞌ i Pueꞌ Ala, iamoheꞌ: hangatu báꞌána gapiꞌ laki, rongatu báꞌána dimbá laki, hai iba átuna ánáꞌ dimbá. Mohuhuꞌheꞌ woꞌo hampuloꞌ hai rombaꞌa bekeꞌ laki, hibali hai imbaꞌna tina toSáráeliꞌ. Binataꞌ iti mewaliꞌ popenómbá bona dósáraꞌ upu-upu toSáráeliꞌ raꞌámpungi. 18 Hangko ionoꞌ, mopakanótóheꞌ kolompoꞌ-kolompoꞌ tadulako menómbá, hai kolompoꞌ-kolompoꞌ toLewi, heáná to ina mobágóꞌ i támbina Pueꞌ Ala i Ierusale, hintotoꞌ hai áturá to teukiꞌ i Paturoꞌna Musa.
ToIahudiꞌ mamposusaiheꞌ Posusa Paska
19 I imbaꞌna kahampuloꞌ hai iba wulá kaꞌisáꞌ,c toIahudiꞌ to mesuleꞌmoheꞌ hangko i karatawaniáraꞌ, mamposusaiheꞌ Posusa Paska. 20 Tadulako-tadulako menómbá hai toLewi mopamagasaꞌheꞌ wátáraꞌ bona magasaꞌheꞌ mouláꞌ áturána ágámáraꞌ. Roo onoꞌ, toLewi mosambaleheꞌ ánáꞌ dimbá Paska mewaliꞌ popenómbáraꞌ upu-upu tauna to mesuleꞌmoheꞌ hangko i karatawaniáraꞌ, hangka tadulako menómbáraꞌ, hai hira upu-upu. 21 Pandeꞌ Paska iti raꞌandeꞌ upu-upu toSáráeliꞌ to mesuleꞌmoheꞌ hangko i karatawaniáraꞌ, hai raꞌandeꞌ woꞌo tauna to mokábáhámoheꞌ kakadakeraꞌ to biásá rabábehi i tampoꞌ iti, bona peisáheꞌ moromu hai toSáráeliꞌ hai menómbá i PUEꞌ, Pueꞌ Ala to rapenómbái toSáráeliꞌ. 22 Pitu alona kamaruena mamposusaiheꞌ Posusa Rótiꞌ To Tiꞌara Raragiꞌi. Góeꞌ ntepuꞌuheꞌ láwiꞌ PUEꞌ mobáliki miꞌi laluna datu i Asuri bona maroꞌa miꞌi laluna i toSáráeliꞌ álána motulungiheꞌ moaró támbina Pueꞌ Ala, Pueꞌraꞌ toSáráeliꞌ.