5
I tempó poaró támbina Pueꞌ Ala rapopengkaroo, rodua nabiꞌ, iamoheꞌ Sakaria pemuleꞌána Ido hai nabiꞌ Hagai, mopahaweꞌheꞌ laluitana Pueꞌ Ala i toIahudiꞌ to toroꞌ i tampoꞌ Iudá, tepasuaꞌ to i kótá Ierusale. Molaluitaheꞌ i lalu hangaꞌna Pueꞌ Ala to rapenómbái toSáráeliꞌ to mamporángáheꞌ toIahudiꞌ.a 2 Kamohádiraꞌ tewái hangko i roduaheꞌ nabiꞌ iti, Serubábeli ánáꞌna Sealatie hai Iesua ánáꞌna Iosada, mopaliliuheꞌ moaró huleꞌ támbina Pueꞌ Ala i Ierusale, radureiheꞌ nabiꞌ to rodua iti.b3 Agáiáná tempó iti woꞌo, Tatanai, mágáuꞌ i poropensi to tándáꞌ i katámpuá alo uwai Epara, hingkakani hai Sieta-Bosonai hai rángáraꞌ mobágóꞌ, manggaguheꞌ lao i Ierusale hai mekuneꞌheꞌ i toIahudiꞌ, rauliꞌ, “Heáná to mohuoꞌkou moaró támbi penómbáꞌá deꞌe hai moparoo rindina?” 4 Rapekuneꞌ woꞌo, “Heáná hangaꞌraꞌ tauna to medurei moaró támbi penómbáꞌá deꞌe?” 5 Agáiáná Pueꞌ Ala mokámpáiheꞌ totosaeraꞌ toIahudiꞌ, onoꞌ haneꞌi bágóꞌ iti tiꞌara rapopengkaroo hangko tiꞌara mani topopárentá Peresia iti mopakatu sura i Datu Dáriu hai molámbiꞌ hánikina. 6 Deꞌe miꞌi popahaweꞌ hangko i Tatanai, mágáuꞌ i poropensi to tándáꞌ i katámpuá alo uwai Epara, hai Sieta-Bosonai hai rángáraꞌ mobágóꞌ. Sura deꞌe rapakatu i datu, óntóꞌna node:
7 Molámbiꞌ Datu Dáriu
Roꞌa ngkatueꞌ haweꞌ i datu.
8 Bona naisá datu, kalaongkiꞌ miꞌi i tampoꞌ Iudá, kiꞌita támbina Pueꞌ Ala to makuasaꞌ. Támbi iti tangaꞌna raꞌaró huleꞌ, mopakeꞌheꞌ watu to mahile, hai rindina ralapisi hai kau. Bágóꞌ iti molumao maroꞌa hai ina poloꞌ wali.
9 Hangko ionoꞌ, kipekuneꞌ i totosaeraꞌ, kiuliꞌ, “Heáná to mohuoꞌkou moaró támbi penómbáꞌá deꞌe hai moparoo rindina?” 10 Kipekuneꞌ woꞌo hangaꞌraꞌ, bona peisá kipahaweꞌ i datu heáná to motadulakoiheꞌ mobágóꞌ.
11 Mehániꞌheꞌ, rauliꞌ, “Kaiꞌ deꞌe huoꞌánaꞌangkaiꞌ Pueꞌ Ala to makuasaꞌ i langiꞌ hai i duniáꞌ. Moaróangkaiꞌ huleꞌ támbina Pueꞌ Ala. I átuna parena to liu,c támbi deꞌe napopeángkáꞌ hai napárewái hadua daturaꞌ toSáráeliꞌ to makuasaꞌ. 12 Agáiáná toiorungkiꞌ mopaꞌaramoheꞌ kamabukoꞌna Pueꞌ Ala to ara i surugáꞌ, mewaliꞌ Ia mohuhuꞌheꞌ i kuasaꞌna Nebukanesa datu mahile kadatuá Bábeli pemuleꞌána toKasidimi. Nebukanesa iti mogero támbi deꞌe hai motawaniheꞌ hangka toIahudiꞌkiꞌ, naꞌánti lao i tampoꞌ Bábeli.
13-14 Tempó onoꞌ, Datu Nebukanesa moala párewá-párewá to rapakeꞌ i támbina Pueꞌ Ala i Ierusale, naꞌánti i tampoꞌ Bábeli haneꞌi nawoli ionoꞌ i lalu támbi penómbáꞌá ánitu. Bahangapa parena hangko ionoꞌ, Koresi mewaliꞌ datu i Bábeli, hai i pare kaꞌisáꞌ popárentána, ia mopaꞌara hambuaꞌ párentá bona támbina Pueꞌ Ala iti raꞌaró huleꞌ. Ia mampopesuleꞌ párewá buláwá hai peráꞌ to rapakeꞌ i lalu támbina Pueꞌ Ala. Upu-upu párewá iti napeweꞌi i hadua tauna to rahangaꞌ Sesebasa to naꞌángkáꞌ miꞌi mewaliꞌ mágáuꞌ i tampoꞌ Iudá. 15 Ia napárentái datu, nauliꞌ, ‘Nuala párewá-párewá deꞌe, nuánti mesuleꞌ i Ierusale. Niaró huleꞌ támbina Pueꞌ Ala i katoroꞌána to rungu-runguna, haneꞌi nuwoli párewá deꞌe i lalu támbi iti.’
16 Onoꞌ miꞌi haneꞌi Sesebasa iti haweꞌ i Ierusale hai mobábehi pehodaꞌána támbina Pueꞌ Ala iti. Mantepuꞌu hangko ionoꞌ haweꞌ deꞌe-deꞌe, moaróangkaiꞌ támbi iti, agáiáná tiꞌara mani wali.”
Eneꞌ miꞌi hánikiraꞌ toIahudiꞌ.
17 Mewaliꞌ, ane napokana datu, kipembiáꞌ bona ara to mampeliꞌ sura i támbi pemboliá sura kadatuá Bábeli, bona taisá ba toꞌu-toꞌu Datu Koresi mopaꞌara párentá hangkoia to mopaliuheꞌ toIahudiꞌ moaró huleꞌ támbina Pueꞌ Ala i Ierusale. Roo onoꞌ, kipembiáꞌ bona datu mopahaweꞌ i kaiꞌ pobutusina mokana i poaróna huleꞌ Támbina Pueꞌ Ala.