Poaró támbina PUEꞌ rasalempori
4
I karahádina ewáliraꞌ toIudá hai toBenami, tauna to mesuleꞌmoheꞌ hangko i karatawaniáraꞌ tangaꞌraꞌ moaró támbina PUEꞌ, Pueꞌ Ala to rapenómbái, 2 laoheꞌ mampohidupaꞌá Serubábeli hai kapalaꞌ-kapalaꞌ tina-tina toSáráeliꞌ, rapembiáꞌ rauliꞌ, “Nipaliuangkaiꞌ modureikou moaró támbina PUEꞌ iti, láwiꞌ kaiꞌ woꞌo menómbáꞌangkaiꞌ i Pueꞌ Ala to nipenómbái. Pakaꞌangkaiꞌ mohuhuꞌ popenómbángkiꞌ i Hia, mantepuꞌu kanaꞌántingkiꞌ mai Esahado, datu to mepárentá i kadatuá Asuri.”3 Agáiáná Serubábeli, Iesua hai tadulako-tadulakoraꞌ toSáráeliꞌ iti mehániꞌheꞌ, rauliꞌ, “Tiꞌarakou kipaliu modureiangkaiꞌ moaró támbina Pueꞌ Ala to kipenómbái. Kaiꞌ peá to ina moaró támbi iti, hintotoꞌ hai apa to napárentáiangkaiꞌ Koresi, datu mahile i kadatuá Peresia.”
4 Hangko ionoꞌ, tauna to marue miꞌi toroꞌ i tampoꞌ iti mantepuꞌuheꞌ mopamaledeꞌ laluraꞌ toIudá hai mampopalááꞌheꞌ bona poaróraꞌ támbi iti rapopengkaroo. 5 Lántuꞌána Datu Koresi mepárentá, haweꞌ-haweꞌ i popárentána Datu Dáriu,a mosogoꞌheꞌ oaꞌ topopárentá i Peresia, bona mokóntóheꞌ poliworaꞌ toIudá iti.
Poaró huleꞌ kótá Ierusale rapopengkaroo
6 Bahangapa parena hangko ionoꞌ, i pantepuꞌuána popárentána Datu Ahasiwero,b ewáliraꞌ toIerusale hai toIudá moukiꞌheꞌ sura i Datu Ahasiwero mosalai apa to rabábehi toIahudiꞌ iti.
7 Iti mewaliꞌ woꞌo i tempóna Datu Aratasata mepárentá i kadatuá Peresia.c Bisilama, Mitaredaꞌ, Tabele hai rángáraꞌheꞌ mobágóꞌ, moukiꞌheꞌ sura i Aratasata, datu mahile kadatuá Peresia. Sura iti raukiꞌ i lalu básá Árá hai ralimbá tempóna rabásá.d
8-9 Aratasata motarima woꞌo sura ntániꞌna mokana i apa to mewaliꞌ i kota Ierusale. Sura iti rapakatu biti mágáuꞌ Rehumu, Simasai guruntulisiꞌ kadatuá, hai rángáraꞌ mobágóꞌ, iamoheꞌ: topebutusi-topebutusi, topopáresáꞌ topopárentá, topopárentá i Peresia, toPeresia, tauna hangko i kótá Ereꞌ, hangko i tampoꞌ Bábeli hai kótá Susana i tampoꞌ Ela, 10 hai tauna ntániꞌna to natawani Asanapara Mahile to rabiláꞌ, hai rapatoroꞌ i kótá Samaria hai i kótá-kótá ntániꞌna i poropensi to tándáꞌ i katámpuá alo uwai Epara.
11 Óntóꞌna sura iti node:
Molámbiꞌ Datu Aratasata
Hangko i topobágóꞌna datu to i poropensi tándáꞌ i katámpuá alo uwai Epara
Tabeá.
12 Bona naisá datu, toIahudiꞌ to mai ieneꞌ hangko i kótá-kótá i tampoꞌmu, tampoꞌ Bábeli, deꞌe-deꞌe mokatoroꞌiheꞌ kótá Ierusale, hai tangaꞌraꞌ moaró huleꞌ kótá to paka meꞌewaꞌ hai kadake iti. Tangaꞌraꞌ woꞌo mampopeángkáꞌ huleꞌ bente kótá hai mopakaroꞌangi pehodaꞌána bentena kótá iti.
13 Ane kótá iti raꞌaró huleꞌ, hai bente kótá roo miꞌi rapopeángkáꞌ, tauna to i kótá iti tiꞌarapoheꞌ ina mau mobaiari mampopengaa ásele, hai polámbiꞌána kadatuámu ina makuraꞌ. 14 Kaiꞌ tetidaꞌangkaiꞌ i datu, hai tiꞌara kiundeꞌ datu rapamarugiꞌ, onoꞌ miꞌi haneꞌi kipakatu sura deꞌe, hai kipembiáꞌ 15 bona datu mohuoꞌ tauna lao mampeliꞌ sura to raukiꞌ bahangapa parena to liu. Hangko i óntóꞌna sura iti, ina naisá datu, tauna i kótá Ierusale paka mohioroheꞌ hai mopamarugiꞌ oaꞌ datu-datu hai topopárentá poropensi. Marue ntepuꞌuheꞌ paka meꞌewaꞌ. Onoꞌ miꞌi haneꞌi kótá iti ragero bahangapa parena to liu. 16 Mewaliꞌ kipahaweꞌ i datu, ane kótá iti raꞌaró huleꞌ hai bente kótá rapopeángkáꞌ miꞌi, datu tiꞌara piꞌi ina mokuasaꞌi poropensi to tándáꞌ i katámpuá alo uwai Epara iti.
17 Datu mopakatu pehániꞌna, naukiꞌ:
Molámbiꞌ Rehumu biti magáuꞌ, Simasai guruntulisi kadatuá, hai rángáraꞌ mobágóꞌ
i Samaria hai i kótá-kótá ntaniꞌ i poropensi tándáꞌ i katámpuá alo uwai Epara
Tabeá.
18 Sura to nipakatu i kódóꞌ ralimbá miꞌi hai rabásáꞌámoꞌ. 19 Onoꞌ haneꞌi kupaꞌara miꞌi párentá bona huoꞌángkuꞌ mampeliꞌ sura-sura to rapakatu hangkoia. Mewaliꞌ ambiꞌ toꞌu. Mantepuꞌu ia hangkoia, toIerusale pakaheꞌ moewaꞌ kuasaꞌraꞌ datu-datu, hai handaꞌ i oloꞌraꞌ taunána to mohioro hai meáhui. 20 Ara bahangapa datu to makuasaꞌ mopárentá toIerusale, hai mokuasaꞌiheꞌ humalele poropensi tándáꞌ i katámpuá alo uwai Epara. Motarimaheꞌ woꞌo mampopengaa ásele. 21 Onoꞌ haneꞌi hangaa-ngaa nipopesuwuꞌ hambuaꞌ párentá bona tauna mengkarooheꞌ mobágóꞌ, hai tiꞌara piꞌi moaró huleꞌ kótá iti haweꞌ i kakupárentáiáraꞌ. 22 Nipeuláꞌi hai nipopolumao maroꞌa párentángkuꞌ iti, bona ineeꞌ mantámbái kamarugiꞌkuꞌ.
23 Karoona surana Datu Aratasata iti rabásáꞌá Rehumu, Simasai hai rángáraꞌ mobágóꞌ, pohuꞌheꞌ lao i Ierusale hai mopasaꞌheꞌ toIahudiꞌ mampopengkaroo bágóꞌraꞌ moaró huleꞌ kótá iti.
Támbina Pueꞌ Ala ratepuꞌu wopiꞌi raꞌaró huleꞌ
24 Bágóꞌ moaró támbina PUEꞌ rapopengkaroo hai tiꞌara rapaliliu haweꞌ i pare kaduá popárentána Dáriu datu i Peresia.e