Paintuá popenómbá rabábehi huleꞌ
3
ToSáráeliꞌ mokatoroꞌi huleꞌ kótáraꞌ. I wulá kapitu,a hirámpuheꞌ i kótá Ierusale, 2 haneꞌi Iesua ánáꞌna Iosada hingkakani hai hangka tadulako menómbána, hai Serubábeli ánáꞌna Sealatieb hingkakani hai halalunaheꞌ, moaróheꞌ huleꞌ paintuá popenómbá i Pueꞌ Ala to rapenómbái toSáráeliꞌ, bona peisá wopaheꞌ mointu popenómbá i wongkona,c hintotoꞌ hai apa to teukiꞌ i lalu Áturána Musa huoꞌána Pueꞌ Ala. 3 Kehapiꞌ malááꞌheꞌ i tauna ntániꞌna to toroꞌ i tampoꞌ iti, agáiáná moaróheꞌ paintuá popenómbá i katoroꞌána to rungu-runguna. Roo onoꞌ, mantepuꞌu wopaheꞌ mointu popenómbá mepulo hai kalumbaꞌ.d 4 Mamposusaiheꞌ woꞌo alo mahile Posusa Pobambaruꞌ hintotoꞌ hai áturána to teukiꞌ miꞌi.e Hangalo-hangalo mohuhuꞌheꞌ popenómbá mouláꞌ kahandaꞌna to rapakanótó miꞌi i alo iti. 5 I rawa hangko ionoꞌ, mohuhuꞌheꞌ popenómbá to raintu, hai popenómbá i alo mahile maleheꞌ wulá, hai i upu-upu alo mahile ntániꞌna to tepakanótó miꞌi mewaliꞌ alo penómbáꞌá i PUEꞌ. Mohuhuꞌheꞌ woꞌo i PUEꞌ popenómbá kabulá laluraꞌ. 6 Imbaꞌna kaꞌisáꞌ wulá kapitu, mantepuꞌumoheꞌ mohuhuꞌ i PUEꞌ popenómbá to raintu, kehapiꞌ pehodaꞌána támbina PUEꞌ tiꞌara mani ratepuꞌu raꞌaró.Támbina PUEꞌ ratepuꞌu raꞌaró huleꞌ
7 Tauna mampeweꞌiheꞌ dóiꞌ bona rapoposaro basi watu hai basi kau. Mopakatuheꞌ woꞌo pandeꞌ, painu hai lana saitu i tauna to toroꞌ i kótá Tiru hai Sido, bona rasuláki hai kau to maroꞌa ntepuꞌu hangko i Libano. Kau iti raꞌánti lao i Iapo moliu i tahiꞌ. Upu-upu iti rapobágóꞌ mouláꞌ popakanótóna Koresi, datu mahile kadatuá Peresia.
8 Mewaliꞌ i wulá kaduáf pare kaduá pesuleꞌraꞌ toSáráeliꞌ i Ierusale, Serubábeli ánáꞌna Sealatie, Iesua ánáꞌna Iosada, hai hángká toSáráeliꞌraꞌ, tepasuaꞌheꞌ tadulako menómbá, toLewi hai upu-upu tauna to mesuleꞌmoheꞌ i Ierusale hangko i karatawaniáraꞌ i tampoꞌ Bábeli, mantepuꞌuheꞌ moaró támbina Pueꞌ Ala. ToLewi to tinuwuꞌraꞌ rompuloꞌ parena lábi, ratudoꞌheꞌ bona mourusi poaróna támbina PUEꞌ iti. 9 Mewaliꞌ Iesua toLewi iti, ánáꞌnaheꞌ, halalunaheꞌ, hai Kadamie woꞌo hai ánáꞌnaheꞌ pemuleꞌánaheꞌ Hodawia,g mourusiheꞌ bágóꞌraꞌ topoaró támbina Pueꞌ Ala iti. Hira radureiheꞌ toLewi pemuleꞌánaheꞌ Henada.
10 Tempóraꞌ topoaró támbi mantepuꞌu mobábehi pehodaꞌána támbina PUEꞌ, tadulako menómbá mopakeꞌheꞌ pewaruꞌraꞌh hai meángkáꞌheꞌ motibaaꞌ tamburuꞌ. ToLewi pemuleꞌánaheꞌ Asaꞌ meángkáꞌheꞌ woꞌo, motibaaꞌheꞌ ndongi to kókóiꞌ. Motóiáheꞌ oaꞌ PUEꞌ hintotoꞌ hai áturá to rapakanótó miꞌi i tempóna mani Datu Daudiꞌ mepárentá i tampoꞌ Sáráeliꞌ. 11 Tauna mombeháwá-háwáheꞌ mamponani nani petóiá i PUEꞌ, rananika node:
“PUEꞌ maroꞌa!
Ia mopatongawaꞌ oaꞌ kamaꞌahiꞌNa
i toSáráeliꞌ
haweꞌ i rue-ruena.”
Upu-upu tauna mohoraꞌ-horaꞌheꞌ rapasimbuku motóiá PUEꞌ láwiꞌ pehodaꞌána támbina PUEꞌ rabábehi miꞌi. 12 I oloꞌraꞌ tadulako menómbá, toLewi hai kapalaꞌ tina-tina toSáráeliꞌ, handaꞌ to matinuwuꞌmoheꞌ. Hangko tiꞌara maniheꞌ raꞌánti i tampoꞌ Bábeli ratawani ionoꞌ, moitamoheꞌ támbina PUEꞌ to raꞌaró Datu Salomo hangkoia.i Tempóraꞌ moita noumbá lenggeꞌna pehodaꞌána támbina PUEꞌ to hangko rabábehi iti, teriaꞌheꞌ rapasimbuku. Agáiáná tauna ntaniꞌ to ara ionoꞌ mohoraꞌ-horaꞌheꞌ ánti kagóeꞌraꞌ. 13 Tauna tiꞌara piꞌi peisá mampopontaniꞌ wambaꞌ kagóeꞌ hai wambaꞌ kawiora, láwiꞌ masimbuku ntepuꞌuheꞌ. Wambaꞌraꞌ iti rahádi hangko karaoꞌ.