Esra
Datu Koresi mopaliuheꞌ toIudá mesuleꞌ i tampoꞌraꞌ
1
I pare kaꞌisáꞌ Datu Koresi mopárentá kadatuá Peresia,a PUEꞌ mopabukeꞌi apa to Napahaweꞌ miꞌi moliu nabiꞌ Ieremia.b PUEꞌ mampopokale laluna Datu Koresi bona ia mopaꞌara hambuaꞌ párentá. Párentá iti raukiꞌ hai rapahaweꞌ i humalele kadatuána. Nauliꞌ node:2 “Deꞌe miꞌi párentá hangko i Koresi, datu mahile kadatuá Peresia.
PUEꞌ, Pueꞌ Ala to ara i surugáꞌ, moángkáꞌmoꞌ mewaliꞌ datu mahile i humalele duniáꞌ, hai Napoweꞌiaꞌ woꞌo bágóꞌ ina moaró támbiNa bona Ia peisá rapenómbái i kótá Ierusale i tampoꞌ Iudá. 3 Hampóáꞌworia Pueꞌ Ala to nipenómbái mokámpáikou to mewaliꞌ taunáNa. Peisákou mesuleꞌ i Ierusale hai moaró huleꞌ támbina PUEꞌ, Pueꞌ Alaraꞌ toSáráeliꞌ, ia miꞌi Pueꞌ Ala to toroꞌ i Ierusale. 4 Heáná peá to ina toroꞌ mani ieneꞌ nodo tohaweꞌ, hangaa-ngaa modureiheꞌ toIahudiꞌ to ina mesuleꞌ i Ierusale. Niweꞌiheꞌ buláwá hai peráꞌ, párewá-párewá hai binataꞌ to rapiaraꞌ. Niweꞌiheꞌ woꞌo popenómbá kabulá lalumi bona rapakeꞌ ina moaró támbina Pueꞌ Ala i Ierusale.”c
5 Hangko ionoꞌ, kapalaꞌ-kapalaꞌ tina-tina toIudá hai toBenami, tadulako-tadulako menómbá hai toLewi, hai upu-upu tauna ntániꞌna to napopokale Pueꞌ Ala laluraꞌ, mangkákádipurá bona mesuleꞌheꞌ lao i Ierusale hai moaró huleꞌ támbina PUEꞌ. 6 Upu-upu tauna to toroꞌ hungkuꞌ i hira mampeweꞌiheꞌ petulungiraꞌ, ia miꞌi párewá-párewá to rabábehi hangko i buláwá hai peráꞌ, párewá ntániꞌna tepasuaꞌ to masuliꞌ hólóna, hai binataꞌ to rapiaraꞌ. Mampeweꞌiheꞌ woꞌo kabulá lalu i toIahudiꞌ to ina mesuleꞌ lao i Ierusale.
7 I puloꞌna parena to liu, Datu Nebukanesa moala miꞌi párewá-párewá to rapakeꞌ i támbina PUEꞌ, naꞌánti i tampoꞌ Bábeli haneꞌi nawoli i lalu támbi penómbáꞌá ánitu to napenómbái. Bahangapa parena hangko ionoꞌ, Datu Koresi mampopesuwuꞌ párewá iti, 8 nahuoꞌ bona Mitaredaꞌ, topokádipurá dóiꞌ kadatuá Peresia, moala upu-upu párewá iti, moimbaꞌ hai mampeweꞌi i Sesebasa tadulakoraꞌ toIudá. 9 Deꞌe miꞌi imbaꞌna upu-upu párewá iti:
tálu puloꞌna mangku buláwá to rapakeꞌ mohuhuꞌ popenómbá,
hasábu mangku peráꞌ to rapakeꞌ mohuhuꞌ popenómbá,
rompuloꞌ hai hahioꞌ mangku ntániꞌna,d
10 tálu puloꞌna mangku to kókóiꞌ to rabábehi hangko i buláwá,
iba átuna hai hampuloꞌ mangku to kókóiꞌ to rabábehi hangko i peráꞌ,
hai hasábu wuaꞌna párewá ntániꞌna.
11 Kahandaꞌna párewá buláwá hai peráꞌ iti upu-upu, hai párewá ntániꞌna: lima sábuna iba átuna wuaꞌna. Upu-upuna iti naꞌánti Sesebasa tempóna ia motadulakoiheꞌ toIahudiꞌ pohuꞌ hangko i katawaniáraꞌ i tampoꞌ Bábeli, mesuleꞌ lao i Ierusale.