Ruti mobágóꞌ i hinoena Boasi
2
I wánuá Beteleme ara hadua topebuku to raita tauna,
hangaꞌna Boasi.
Ia halaluna Elimeleꞌ,
toámána Naomiꞌ.
2 Hangkani tempó,
Ruti mesabiꞌ i Naomiꞌ,
nauliꞌ,
“Nupaliuaꞌ lao i hinoe bona moróróꞌaꞌ pare to manawoꞌ hangko i taeraꞌ to mepare.a
Mole ba arantoi tauna to maꞌahiꞌ i kódóꞌ.”
Nauliꞌ Naomiꞌ,
“Maroꞌa.
Peisákoꞌ lao.”
3 Lao mpuꞌu miꞌi Ruti i hinoe mopahiróróꞌ pare i taleuꞌraꞌ to mepare.
Tiꞌara naisá,
mole hinoe iti hinoena Boasi,
halaluna Elimeleꞌ.
4 Tiꞌara marue,
haweꞌ miꞌi Boasi hangko i Beteleme,
hai motabeheꞌ topeparena,
nauliꞌ,
“Tabeá.
PUEꞌ mamporángákou.”
Rahániki woꞌo topepare,
“Tabeá.
PUEꞌ mowátiꞌkoꞌ woꞌo,
tuá.”
5 Roo onoꞌ,
mekuneꞌ miꞌi Boasi i mandorona,
nauliꞌ,
“Heáná towawine iti?”
6 Mehániꞌ mandorona,
“Towawine iti toMoabiꞌ,
to meuláꞌ mai i Naomiꞌ hangko i tampoꞌ Moabiꞌ.
7 Iamepulo ia haweꞌ miꞌi mai,
haneꞌi membiáꞌ i kódóꞌ ba peisái meuláꞌ i taleuꞌraꞌ topepare,
mopahiróróꞌ to manawoꞌ,
hai moróróꞌ woꞌo pare i powekiꞌiáraꞌ.
Mantepuꞌu kahaweꞌna,
ia mobágóꞌ oaꞌ hangko mepulo duuꞌna deꞌe-deꞌe.
Hampaiꞌ peá mengkaroo.”b
8-9 Nauliꞌ Boasi,
“Ruti,
pehádingi hampaiꞌ laluitangkuꞌ.
Ineeꞌmokoꞌ lao moróróꞌ pare i hinoena tauna ntániꞌna.
Meuláꞌ pekoꞌ i towawine to mobágóꞌ ieneꞌ.
Nupeita iumbá pepareáraꞌ,
ionoꞌkoꞌ lao,
hai ineeꞌkoꞌ karaoꞌ hangko i hira.
Ane mangkadoꞌukoꞌ,
ara uwai i gumbaꞌ to ratámbuꞌ miꞌi tobaleilo.
Kuhángáꞌámoheꞌ ineeꞌkoꞌ rasalempori.”
10 Kanahádina Ruti laluitana iti,
liliu molingkudu motóngkóꞌ i bitina Boasi,
haneꞌi nauliꞌ,
“Tuá,
moapa riꞌi haneꞌi nupailalu ntepuꞌuaꞌ?
Tiꞌaraꞌaꞌ hintotoꞌ molámbiꞌ pekádipurámu láwiꞌ kódóꞌ deꞌe to haweꞌ peaꞌ.”
11 Mehániꞌ Boasi,
“Kuhádi miꞌi upu-upu petulungimu i pengántiꞌimu,
hungkáꞌna toámámu mate.
Io mopálehimokoꞌ tosaemu hai tampoꞌmu,
maikoꞌ toroꞌ ieneꞌ i oloꞌraꞌ tauna to tiꞌara mani nukaisánga.
12 Kupembiáꞌ i PUEꞌ Ala to rapenómbái toSáráeliꞌ,
bona Ia moháwángi bábehiámu to maroꞌa iti,
hai mowátiꞌ ntepuꞌukoꞌ,
láwiꞌ maimokoꞌ ieneꞌ mampopekámpái i Hia nodo ánáꞌ manuꞌ to naóbóki inána.”c
13 Mehániꞌ Ruti,
“Tuá,
ambiꞌ maroꞌa ntepuꞌukoꞌ i kódóꞌ.
Kódóꞌ tiꞌara hintotoꞌ nupahibali hai topobágóꞌmu.
Kamaroꞌamu iti mopalindó lalungkuꞌ.”
14 Tempóna miꞌi mandeꞌ,
molaluita miꞌi Boasi i Ruti,
nauliꞌ “Maikoꞌ mandeꞌ.
Deꞌe rótiꞌmu.
Nuemeꞌ miꞌi i isuna.”
Mewaliꞌ lao miꞌi Ruti mehoda hai mandeꞌ hingkakani hai topepare.
Tangaꞌna mandeꞌ,
Boasi mampoweꞌi wopiꞌi goaꞌ to ratunu,
hai ia mandeꞌ haweꞌ mabuhu.
Roo mandeꞌ,
ara mani to nawoli.
15-16 Roomoheꞌ mandeꞌ,
lao wopiꞌi Ruti moróróꞌ pare.
Katepohuꞌna peá,
molaluita miꞌi Boasi i topobágóꞌna,
nauliꞌ,
“Ane ia motimaꞌ pare i powekiꞌiá,
nipatodáhi peá.
Ineeꞌ nikámbáróá bona tiꞌara mahili.
Ngkáliꞌna riꞌi,
nitunggái nibutuki hambuli-hambuli hangko i pare to nikumuꞌ,
hai ninawoꞌ bona ara woia to naróróꞌ.”
17 Noꞌonoꞌ miꞌi Ruti moróróꞌ pare duuꞌna kalumbaꞌ.
Upu-upu pare to narámpu nabánti.
Handaꞌ woꞌo pare to naróróꞌ,
ina magánánto rekeꞌ-rekeꞌna hampuloꞌ kiló.
18 Roo onoꞌ,
Ruti mesuleꞌ miꞌi lao i wánuá Beteleme,
moánti pare to naróróꞌ iti.
Napetudeꞌá i pengántiꞌina hai napoweꞌi woꞌo pandeꞌ to nawoliá.
19 Nauliꞌ pengántiꞌina,
“Iumbákoꞌ molámbiꞌ upu-upuna deꞌe?
Mobágóꞌkoꞌ i hinoena heáná dehangaloá?
Hampóáꞌworia paꞌi Pueꞌ mowátiꞌ tauna iti to maꞌahiꞌ i hio.”
Napodarita miꞌi Ruti i pengántiꞌina,
pobágóꞌna i hinoena hadua tobaleilo to rahangaꞌ Boasi.
20 Nauliꞌ Naomiꞌ,
“PUEꞌ mopatongawaꞌ oaꞌ kamaꞌahiꞌNa i tauna to tueꞌ mani hai to matemoheꞌ!
Tauna iti halaluntaꞌ to hungkuꞌ mani.
Ia to hangaa-ngaa mohómpóki katueꞌtaꞌ.
Tapembiáꞌ bona ia nawátiꞌ PUEꞌ.”
21 Nauliꞌ wopiꞌi Ruti,
“Inaꞌ.
Nauliꞌ tauna iti,
peisántoaꞌ mobágóꞌ i hinoena hungkuꞌ i topobágóꞌna haweꞌ i kaupuána parena rapepare.”
22 Mehániꞌ pengántiꞌina,
“Peisánto.
Maroꞌa ane mobágóꞌkoꞌ hingkakani hai towawineheꞌ topobágóꞌna Boasi iti,
láwiꞌ ane laokoꞌ mobágóꞌ i hinoena tauna ntániꞌna,
babilaꞌ ara to ina mosalemporikoꞌ.”
23 Onoꞌ miꞌi haneꞌi mobágóꞌ miꞌi Ruti i hinoena Boasi duuꞌna upu to pepare wulu laiꞌ,
hai bailoꞌ woꞌo rapepare.d
Tempó onoꞌ,
Ruti toroꞌ oaꞌ i támbina pengántiꞌina.