Ruti
Elimeleꞌ hai tinána melimbá lao i tampoꞌ Moabiꞌ
1
1-2 Hangkoia,
hangko tiꞌara maniheꞌ podatu i tampoꞌ Sáráeliꞌ,a
tampoꞌ iti narampe rimi.
I tempó iti,
ara hadua tobaleilo to rahangaꞌ Elimeleꞌ.
Ia toEparata.
Ia toroꞌ i Beteleme i tampoꞌ Iudá.
Ánti kamarimi iti,
ia melimbá lao i tampoꞌ Moabiꞌb hingkakani hai toinána to rahangaꞌ Naomiꞌ hai roduaheꞌ ánáꞌna tobaleilo,
Maloni hai Kilio.
Toroꞌheꞌ ionoꞌ bahangapa parena kamaruena.
3 Tempóraꞌ mani ionoꞌ,
Elimeleꞌ mate miꞌi,
mewaliꞌ mentárá perái Naomiꞌ hai ánáꞌna rodua.
4 Ánáꞌna to rodua iti mehambokoheꞌ i ánáꞌntawine toMoabiꞌ to rahangaꞌ Oupa hai Ruti.
Maloni mohamboko hai Ruti,c
Kilio mohamboko hai Oupa.
5 Liu miꞌi hampuloꞌ parena,
matemoheꞌ woꞌo ánáꞌna to rodua,
mewaliꞌ Naomiꞌ napálehi miꞌi toámána hai ánáꞌna to rodua.
Naomiꞌ hai Ruti mesuleꞌ lao i Beteleme
6 Bahangapa kamaruena hangko ionoꞌ,
Naomiꞌ mohádi bámbári powiáꞌraꞌ toSáráeliꞌ nawátiꞌ PUEꞌ.
Hangko ionoꞌ,
ia hai mániánaheꞌ mangkádipurámoheꞌ ina mopálehi tampoꞌ Moabiꞌ.
7 Pohuꞌ mpuꞌumoheꞌ Naomiꞌ ina mesuleꞌ lao i tampoꞌ Iudá,
hingkakani hai mániánaheꞌ to rodua.
8 Tangaꞌraꞌ molumao,
molaluita miꞌi Naomiꞌ i mániánaheꞌ to rodua,
nauliꞌ node:
“Mesuleꞌmokou,
lao i támbina inámi hadua-hadua.
Kupembiáꞌ bona PUEꞌ mopatongawaꞌ ahiꞌNa i kómu nodo kamaꞌahiꞌmi i kódóꞌ hai i toámámi to matemoheꞌ.
9 Hampóáꞌworia paꞌi PUEꞌ moweꞌi wopakou toámámi bona maroꞌa katueꞌmi.”
Kaupuraꞌ peá napolaluitaꞌá,
Naomiꞌ mesabiꞌ miꞌi i mániánaheꞌ,
haneꞌiheꞌ naꞌángki.
Agáiáná Oupa hai Ruti liliuheꞌ teriaꞌ rapasimbuku,
10 hai molaluitaheꞌ i Naomiꞌ,
rauliꞌ,
“Tiꞌara Inaꞌ!
Bateꞌ-bateꞌkiꞌ peá meuláꞌ i hio,
lao toroꞌ hingkakani hai halalumu.”
11 Agáiáná nahániki Naomiꞌ,
nauliꞌ,
“Mesuleꞌmokou.
Moapa riꞌi haneꞌi meuláꞌ manikou i kódóꞌ?
Tiꞌara paꞌi niꞌisá,
kódóꞌ deꞌe tiꞌarapoꞌ ina moánáꞌ to ina nipotoama?
12 Mesuleꞌmokou,
láwiꞌ kódóꞌ deꞌe matoinamoꞌ,
tiꞌarapoꞌ ina motoama.
Rápáꞌna ane peisá maniaꞌ motoama wengi deꞌe,
hai moánáꞌaꞌ tobaleilo,
13 sabaraꞌkou paꞌi mampegiá haweꞌ kamanginaoáraꞌ?d
Ineeꞌnto onoꞌ mopatuhukou ina motoama.
Ineeꞌkou noꞌonoꞌ.
Tiꞌara paꞌi niꞌisá,
mapári mani i kódóꞌ haneꞌi i kómu,
láwiꞌ PUEꞌ moewaꞌaꞌ.”
14 Teriaꞌ wopaheꞌ mániána iti,
haneꞌi Oupa moángki pengántiꞌina,
mepálákáná,
agáiáná Ruti tiꞌara mau megááki hangko i pengántiꞌina.
15 Nauliꞌ Naomiꞌ,
“Ruti.
Peita.
Lagoꞌmu pohuꞌ miꞌi ina mesuleꞌ lao i tinána hai i ánituna.
Meuláꞌmokoꞌ i hia!”
16 Agáiáná nauliꞌ Ruti,
“Inaꞌ,
ineeꞌaꞌ nupasimbuku meuláꞌ i hia hai mopálehikoꞌ.
Kódóꞌ deꞌe-deꞌe,
bateꞌ-bateꞌkuꞌ peá meuláꞌ i hio.
Iumbá kalaoámu,
ionoꞌ woꞌo kalaoángkuꞌ.
Iumbá katoroꞌámu,
ionoꞌ woꞌo katoroꞌángkuꞌ.
Halalumu,
onoꞌ woꞌo to kupohalalu.
Pueꞌ Ala to nupenómbái,
Ia woꞌo to kupenómbái.
17 Iumbákoꞌ mate,
ionoꞌaꞌ woꞌo mate hai ratawu.
Mahile salaꞌkuꞌ i lindoꞌna PUEꞌ ane ara to mogááꞌkeꞌ
i rawa hangko i kapate.”
18 I kanaisána Naomiꞌ nasokaꞌ peá Ruti ina meuláꞌ,
ia tiꞌara piꞌi molaluita.
19 Hangko ionoꞌ,
rapaliliu polumaoraꞌ lao i Beteleme.
Kahaweꞌraꞌ ionoꞌ,
upu-upu tauna to i wánuá iti tingkáráꞌheꞌ.
Upu-upu towawine mombekuneꞌ-kuneꞌheꞌ,
rauliꞌ,
“Ee!
Tiꞌara paꞌi Naomiꞌ doꞌo?”
20 Nauliꞌ Naomiꞌ,
“Ineeꞌmoꞌ nikióꞌ Naomiꞌ {lempóna:
góeꞌ}.
Rángina nikióꞌmoꞌ Mara {lempóna:
mapári kuhádi},
láwiꞌ handaꞌ kapári to kulámbiꞌ hangko i Pueꞌ Ala to Makuasaꞌ.
21 I kapohuꞌkuꞌ hangko ieneꞌ,
katueꞌkuꞌ bukeꞌ hai kamaroꞌa.
Agáiáná deꞌe-deꞌe napopesuleꞌaꞌ ntooꞌ PUEꞌ.
Onoꞌ miꞌi haneꞌi ineeꞌmoꞌ nikióꞌ Naomiꞌ,
láwiꞌ PUEꞌ To Makuasaꞌ moewaꞌaꞌ haneꞌi handaꞌ kapári to kulámbiꞌ.”
22 Noꞌonoꞌ miꞌi daritakáná pesuleꞌna Naomiꞌ hangko i tampoꞌ Moabiꞌ hingkakani hai Ruti mániána,
toMoabiꞌ.
Kahaweꞌraꞌ i Beteleme tempóraꞌ mantepuꞌu mepare wulu laiꞌ.