Ruti membiáꞌ tulungi i Boasi
3
Hangkani tempó,
Naomiꞌ molaluita i Ruti,
nauliꞌ,
“Hangaa-ngaa kupopohambokokoꞌ,
bona ara to mokádipurákoꞌ.
2 Io mobágóꞌkoꞌ hingkakani hai towawine topobágóꞌna Boasi,
hai Boasi iti halaluna toámángkuꞌ.
Mewaliꞌ nupehádingi!
Deiná kalumbaꞌ,
ia ina lao mowiri pare wulu laiꞌ i pobántiána.
3 Mewaliꞌ medóimokoꞌ deꞌe-deꞌe,
mopakeꞌkoꞌ wongi-wongi hai mewaruꞌkoꞌ to mababe,a
haneꞌikoꞌ lao i kaꞌaraꞌána Boasi i pobántiá pare.
Nupegiá ionoꞌ haweꞌ upu mandeꞌ hai mainu.
Agáiáná ineeꞌ mpiiꞌkoꞌ naita.
4 Tempóna maturu,
nupailalu iumbá paturuána.
Ane letaꞌ miꞌi,
laomokoꞌ ionoꞌ,
hai nuhungkáki kómóꞌna to i bitina haneꞌi maturukoꞌ hungkuꞌ ionoꞌ.
Ina nahángáꞌáramokoꞌ apa to hangaa-ngaa nubábehi.”
5 Nauliꞌ Ruti,
“Maroꞌa,
Inaꞌ.
Ina kupeuláꞌi upu-upuna to nuꞌuliꞌ.”
6 Mewaliꞌ lao mpuꞌu miꞌi Ruti i pobántiá pare.
Ionoꞌ napeuláꞌi mpuꞌu miꞌi upu-upu to napatuntuá pengántiꞌina.
7 Karoona Boasi mandeꞌ hai mainu,
maroꞌa miꞌi pehádina,
lao miꞌi maturu hungkuꞌ i potámbungáꞌá pare.
Tiꞌara marue hangko ionoꞌ,
haweꞌ miꞌi Ruti ngkániiꞌ-niiꞌ hai lao mohungkáki kómóꞌna Boasi to i bitina,
haneꞌi maturu hungkuꞌ ionoꞌ.
8 Laembengi,
hangkaꞌ-hangkaꞌ pehádi miꞌi Boasi haneꞌi menggoli.
Ia tingkáráꞌ manginta ara hadua towawine to maturu hungkuꞌ i bitina.
9 Nakuneꞌ,
“Heánákoꞌ?”
Mehániꞌ Ruti,
“Kódóꞌnto tuá,
Ruti hawiꞌmu.
Io halalungkiꞌ to hungkuꞌ mani,
to hintotoꞌ mokádipurá katueꞌkuꞌ,
mewaliꞌ ane nupokanai,
kódóꞌ miꞌi mewaliꞌ toinámu.”b
10 Nauliꞌ Boasi,
“Hampóáꞌworia paꞌi PUEꞌ mowátiꞌkoꞌ,
láwiꞌ apa to nubábehi deꞌe-deꞌe,
melumbuꞌ mani kamaroꞌana hangko i apa to nubábehi miꞌi i pengántiꞌimu.
Tiꞌarakoꞌ mampeliꞌ to maleheꞌ mani to ina mewaliꞌ toámámu i oloꞌraꞌ tauna to pebuku ba to peahiahiꞌ.
11 Mewaliꞌ ineeꞌ karaoꞌ inaomu,
Ruti.
Upu-upu to nupembiáꞌ ina kubukeki,
láwiꞌ i wánuá deꞌe,
raisá miꞌi kaꞌiona towawine to maroꞌa ntepuꞌu.
12 Ambiꞌ toꞌu,
hangaa-ngaa kuhómpóki katueꞌmu láwiꞌ halalumiaꞌ to hungkuꞌ.
Agáiáná,
ara mani tauna ntániꞌna to hangaa-ngaa mohómpóki katueꞌmu,
hai ia woꞌo halalumi to hungkuꞌ mani i kómu haneꞌi kódóꞌ.
13 Mewaliꞌ wengi deꞌe ieneꞌmokoꞌ.
Kahalo mepulo ina laoaꞌ mekuneꞌ,
ba maui halalumi iti mokádipurákoꞌ ba tiꞌara.
Ane maui,
maroꞌa.
Agáiáná ane tiꞌarai mau,
kudándi i lindoꞌna PUEꞌ,
kódóꞌ miꞌi to ina mohómpóki katueꞌmu.
Maturumokoꞌ deꞌe-deꞌe duuꞌna mebabaeaꞌ.”
14 Mewaliꞌ maturu mpuꞌu miꞌi Ruti hungkuꞌ i bitina Boasi.
Mebabaeaꞌ mani,
mearó miꞌi Ruti hangko tiꞌara mani raisá tauna,
láwiꞌ nauliꞌ Boasi,
“Ineeꞌ raisá tauna ara towawine ieneꞌ i pobántiá pare.”
15 Nauliꞌ Boasi i Ruti,
“Ala mai iti kumbámu hai nuwálá i hindeꞌe.”
Naꞌala miꞌi Ruti kumbána haneꞌi nawálá.
Nabubuha Boasi pare wulu laiꞌ rekeꞌ-rekeꞌna rompuloꞌ kilóna i kumbána,
haneꞌi naꞌángkáꞌ nahumpádá i wángána Ruti.
Roo onoꞌ,
mesuleꞌ miꞌi Boasi lao i wánuá Beteleme.
16 Kahaweꞌna Ruti i támbi,
nakuneꞌ pengántiꞌina,
“Mewaliꞌ,
noumbá miꞌi?”
Onoꞌ haneꞌi napodarita miꞌi Ruti upu-upu to nabábehiá Boasi,
17 hai nauliꞌ,
“Ia to mampoweꞌiaꞌ pare wulu laiꞌ to handaꞌ deꞌe,
láwiꞌ nauliꞌ,
kódóꞌ tiꞌaraꞌaꞌ peisá mesuleꞌ ntooꞌ i hio.”
18 Nauliꞌ Naomiꞌ,
“Nupegiá peá.
Ina nuita apa to pewaliꞌ.
Boasi tiꞌara ina mengkaroo ane tiꞌara mani nabukeki dándina i hio i alo dehangaloá.”