Awilina Iosuá i toSáráeliꞌ
23
Bahangapa puloꞌna parena, ánti petulungina PUEꞌ, katueꞌraꞌ toSáráeliꞌ maroꞌa ntepuꞌu miꞌi, tiꞌarapoheꞌ raganggu ewáliraꞌ. Kahópóꞌána Iosuá sae ntepuꞌu miꞌi woꞌo, 2 onoꞌ miꞌi haneꞌi ia mokióꞌheꞌ upu-upu toSáráeliꞌ, tepasuaꞌ totosaeraꞌ, tadulako-tadulakoraꞌ, topobutusi hai tadulako surudadoꞌ, nauliꞌ, “Deꞌe-deꞌe matoama ntepuꞌumoꞌ. 3 Niꞌita miꞌi apa to nabábehi Pueꞌ Ala PUEꞌmi. Ia to motulungimokeꞌ upu-upu mampombealaꞌá tauna to toroꞌ i tampoꞌ deꞌe. 4 Nibuhinao noumbá kakubolobiaꞌna haneꞌi kugáláꞌ-gáláꞌákou tampoꞌ to mewaliꞌ tampoꞌ sosorami hantina-hantina. Tampoꞌ iti i hiliꞌna uwai Iarade hai tahiꞌ Tangaꞌ tándáꞌ i katámpuá alo, hai rakatoroꞌi tauna ntániꞌna, agáiáná tanangimoheꞌ. Hai ara mani toKánáꞌá to tiꞌara mani tanangi. 5 PUEꞌ Ala to tapenómbái, Ia miꞌi to ina mowuraheꞌ, hai ane laokou mampombealaꞌáheꞌ, ina melangkaheꞌ hangko i kómu. Tampoꞌraꞌ ina niala nodo to nadándi miꞌi PUEꞌ Ala i kómu.6 Nipakaróhó ntepuꞌu lalumi. Maingáꞌ-ingáꞌkou hai mampeuláꞌikou upu-upu to naukiꞌ Musa i sura áturána Pueꞌ bona tiꞌarakou moliungi hampákáꞌ peá hangko i áturá-áturá iti. 7 Ineeꞌkou mampohambokoá toKánáꞌá to ara mani i tampoꞌ deꞌe. Ineeꞌkou mekakae i ánituraꞌ. Ineeꞌkou mopakaróhó podándimi i lalu hangaꞌraꞌ ánituraꞌ. Ineeꞌkou menómbá i ánituraꞌ, hai ineeꞌkou molingkudu mengkoruꞌ i ánituraꞌ. 8 Ngkáliꞌna riꞌi, kómu hangaa-ngaa tetidaꞌkou menómbá i Pueꞌ Ala PUEꞌtaꞌ, nodo to nibábehi haweꞌ deꞌe-deꞌe.
9 PUEꞌ mowuramoheꞌ upu-upu tina to mahile hai maróhó hangko i kómu. Tiꞌara ara haweꞌ hadua to nabuku mantaha moewaꞌkou haweꞌ deꞌe-deꞌe. 10 PUEꞌ Ala to tapenómbái motulungimokeꞌ mombeala, hiolaꞌ hai dándiNa i kitaꞌ,a onoꞌ miꞌi haneꞌi hadua tauna peisá monangi hasábu ewáliraꞌ.
11 Onoꞌ miꞌi haneꞌi hangaa-ngaa nipokaꞌahiꞌ PUEꞌ Ala to nipenómbái, 12 láwiꞌ ane motaleukikou Pueꞌ, mohintuwuꞌkou hai toKánáꞌá to toroꞌ maniheꞌ i oloꞌmi, hai mampohambokoáheꞌ, 13 hangaa-ngaa niꞌisá, PUEꞌ Ala tiꞌara piꞌi ina mowuraheꞌ hangko i oloꞌmi, ngkáliꞌna riꞌi, hira to ina mopahurewuꞌkou, láwiꞌ hira ina mokeloꞌkou hai mopakanawoꞌkou. Ina rapopeahiahiꞌkou, hai ina mewaliꞌheꞌ nodo pehepe i káduꞌmi hai nodo dui i mátámi. Kómu ina mantódihákou oaꞌ, tiꞌara haweꞌ hadua i oloꞌmi to ina mentárá i tampoꞌ to maroꞌa deꞌe to naweꞌimokeꞌ PUEꞌ Ala to tapenómbái.
14-16 Tiꞌara piꞌi marue ina matemoꞌ. Onoꞌ miꞌi haneꞌi hangaa-ngaa niꞌisá ntepuꞌu, upu-upu to maroꞌa to nadándiámokou PUEꞌ Ala, Naweꞌimokou. Upu-upu dándiNa Nabukeki miꞌi, tiꞌara haweꞌ hampákáꞌ to tiꞌara Nabukeki. Agáiáná ane moliungikou podándi to Napárentáiákou, hai molingkudukou menómbá i pueꞌ ala to ntániꞌna, PUEꞌ ina mabukoꞌ ntepuꞌu haneꞌi kómu upu-upu ina kásáliu Napatunakou hangko i tampoꞌ to maroꞌa deꞌe to Naweꞌimokou nikatoroꞌi.”