Pewaliꞌána
Laluita to mopakanótó óntóꞌna sura
Sura deꞌe mopakanótóákeꞌ noumbá rárána Pueꞌ Ala mampopewaliꞌ duniáꞌ hai upu-upu óntóꞌna, hai mopakanótó woꞌo noumbá pantepuꞌuána dósá hai kapári. Óntóꞌna sura deꞌe peisá raparonggááꞌ:
1. I lalu gáláꞌna 1-11, tabásá noumbá Pueꞌ Ala mampopewaliꞌ duniáꞌ hai hinángkáꞌ óntóꞌna. Roo onoꞌ, rapolaluita woꞌo daritakáná Adama hai Hewá, Kaiꞌ hai Abeli, Noho hai pelábóꞌna uwai, hai támbi peántóꞌá i Bábeli.
2. I lalu gáláꞌna 12-50, tabásá noumbá pantepuꞌuána kaꞌáráraꞌ toioruraꞌ toSáráeliꞌ. Toioruraꞌ to rungu-runguna ia miꞌi Burahima. Mahile hangaꞌna láwiꞌ maróhó pepoináláina hai pengkoruꞌna i Pueꞌ Ala. Roo onoꞌ, tabásá daritakáná Isakiꞌ ánáꞌna Burahima, hai Iako ánáꞌna Isakiꞌ. Iako iti rahangaꞌ woꞌo Sáráeliꞌ. Hangko ionoꞌ, rapolaluita daritakáná ánáꞌna Iako to hampuloꞌ hai rodua to mewaliꞌ toioruraꞌ toSáráeliꞌ hampuloꞌ hai rontina. I kahópóꞌána sura deꞌe, tabásá mokana i hadua ánáꞌna Iako to rahangaꞌ Iusupu. Ia napakeꞌ Pueꞌ Ala bona mampelae toSáráeliꞌ hangko i tempó rimi. Ánti kamarimi iti, onoꞌ miꞌi haneꞌi Iako hai ánáꞌnaheꞌ hampohalaluá melimbáheꞌ lao i tampoꞌ Másiriꞌ.
Handaꞌ pákáꞌna to rapakanótó i lalu sura deꞌe, agáiáná to rapaioru ia miꞌi kamakuasaꞌna Pueꞌ Ala. I pantepuꞌuána sura deꞌe, Napopewaliꞌ duniáꞌ deꞌe, hai i kahópóꞌána Nadándi ina motulungiheꞌ oaꞌ taunáNa hai moántiheꞌ i hamboloꞌ tampoꞌ to ina Naweꞌiheꞌ. Tabásá woꞌo noumbá Pueꞌ Ala mohuku tauna to mobábehi salaꞌ hai noumbá Ia mowátiꞌ tauna to mengkoruꞌ i Hia. Ane tabásá sura deꞌe kana i pepoináláiraꞌ toSáráeliꞌ hangkoia, hangaa-ngaa ina mobunduꞌ i lalu katueꞌtaꞌ deꞌe-deꞌe.
Óntóꞌna
1. Pewaliꞌána duniáꞌ hai tauna (1:1–2:25)
2. Pantepuꞌuána dósá hai kapári (3:1-24)
3. Pemuleꞌánaheꞌ Adama haweꞌ i Noho (4:1–5:32)
4. Daritakáná Noho hai pelábóꞌna uwai (6:1–10:32)
5. Támbi peántóꞌá i Bábeli (11:1-9)
6. Pemuleꞌánaheꞌ Semuꞌ haweꞌ i Abura (Burahima) (11:10-32)
7. Daritakáná Burahima, Isakiꞌ, hai Iako (12:1–35:29)
8. Pemuleꞌánaheꞌ Esau (36:1-43)
9. Daritakáná Iusupu hai halalunaheꞌ (37:1–45:28)
10. Daritakáná toSáráeliꞌ i tampoꞌ Másiriꞌ (46:1–50:26)